මානව හිමිකම් කොමිසම ටිරාන්ට කළ සිංහල ‘කැඳවීම’ ඉංග්‍රීසියෙන් ‘ඉල්ලීමක්’ කරයි

අයිතිවාසිකම් දිනාගැනීම වෙනුවෙන් සරසවි සිසුන් දියත් කළ අරගල කිහිපයකට එරෙහි පොලිස් ප්‍රචණ්ඩත්වය සම්බන්ධ පරීක්ෂණයකට පැමිණ තොරතුරු සැපයීම මහජන ආරක්ෂාව භාර අමාත්‍යවරයා විසින් ප්‍රතික්ෂේප කිරීමෙන් අනතුරුව ඔහුට කැඳවීමක් කළ බව පිළිගැනීමට ශ්‍රී ලංකා මානව හිමිකම් කොමිසම පසුබා තිබේ.

කොළඹ සහ කැලණිය සරසවි වල සිසුන් මාර්තු 7 සහ 8 යන දෙදින තුළ දියත් කළ උද්ඝෝෂණ මැඩපැවැත්වීමට ‘පොලිසිය ක්‍රියාත්මක වූ ආකාරය පිළිබඳව පරීක්ෂණයක්’ සඳහා ටිරාන් අලස් අමාත්‍යවරයා කැඳවූ බව මාර්තු 9 දා සිංහලෙන් නිවේදනය කළ කොමිසම ඉන් සිව් දිනකට පසු ඉංග්‍රීසියෙන් දැනුම් දී සිටියේ එය කැඳවීමක් නොව ‘පැහැදිලි කිරීම් සපයනු පිණිස කළ හුදු ඉල්ලීමක්’ බවයි.

“ඒ් අනුව මෙම උද්ඝෝෂණ මැඩපැවැත්වීමට සඳහා පොලිස් නිලධාරීන් අනුගමනය කරනු ලැබූ ක්‍රියාපිළිවෙත් පැහැදිලි කිරීමට මහජන ආරක්ෂාව පිළිබඳ අමාත්‍යංශයේ ගරු අමාත්‍යවරයා ලෙස කටයුතු කරන අමාත්‍ය ටිරාන් අලස් මහතා 2023 මාර්තු මස13 වන දින පෙරවරු 10.00 ශ්‍රී ලංකා මානව හිමිකම් කොමිෂන් සභාව වෙත කැඳවා ඇත,” යි එම කොමිසමේ මාධ්‍ය ප්‍රකාශක මාර්තු 9 වැනිදා සිංහල බසින් නිකුත් කළ නිවේදනයේ සදහන්ව තිබුනි.

අමාත්‍යවරයා කැඳවීම පරිදි කොමිසමට ගියේ නැත.

එදින ශ්‍රී ලංකා මානව හිමිකම් කොමිෂන් සභාවේ සභාපතිනිය ඉංශ්‍රීසි බසින් නිවේදනය කර ඇත්තේ ශ්‍රී ලංකාවේ පදිංචි ඕනෑම අයකු සාක්ෂි දීම සහ ලිපි ලේඛන ඉදිරිපත් කිරීම සඳහා කැඳවීමේ ‘පූර්ණ බලය සහ අධිකාරිය’ කොමිසම සතුව ඇතත්, අමාත්‍යවරයා කොමිසමට කැඳවූ බවට පළවන වාර්තා සාවද්‍ය බවයි.

“මේ අදියරේදී ශ්‍රී ලංකා මානව හිමිකම් කොමිසම සිය ලේකම්වරයා මගින් සිදුකර ඇත්තේ තමන්ගේ විෂය පථය යටතට ශ්‍රී ලංකා පොලිසිය වැටෙන අමාත්‍යවරයාට ශ්‍රී ලංකා මානව හිමිකම් කොමිසමට පැමිණ ඇතැම් පැහැදිලි කිරීම් සපයන ලෙස හුදෙක් ඉල්ලා සිටීමයි.”

සිංහලෙන් ප්‍රසිද්ධ කළ ‘කැඳවීම’ මානව හිමිකම් කොමිසම විසින් ඉංග්‍රීසියෙන් ‘ඉල්ලීමක්’ බවට පත්කර ඇත්තේ ඊට අභියෝග කළ පොලිසිය බාර ඇමැති ටිරාන් අලස් පරීක්ෂණය සඳහා එහි නොයන බවට ප්‍රසිද්ධියේ ප්‍රකාශ කිරීමත් සමගය.

“මෙම නිවේදනය නිකුත් කරනු ලබන්නේ ජනමාධ්‍ය තුළ පළ වන සාවද්‍ය ප්‍රකාශ සම්බන්ධයෙන් පැහැදිළි කිරීම සඳහාය,” යි ඉංග්‍රීසි බසින් ඇය නිකුත් කළ නිවේදනයේ වැඩි දුරටත් සදහන්ව ඇත.

ටිරාන් අලස් අමාත්‍යවරයා සිය කොමිසමට කැදවීම සම්බන්ධයෙන් ශ්‍රී ලංකා මානව හිමිකම් කොමිසම මාර්තු 9 වැනිදා සිංහල බසින් නිකුත් කළ නිවේදනය ඉංශ්‍රීසි බසින් නිකුත් කර නොමැති අතර මාර්තු 13 වැනිදා ඉංශ්‍රීසි බසින් නිකුත් කළ නිවේදනය සිංහල බසින් නිකුත් නොකිරීමටත් ඔවුන් වග බලාගෙන තිබේ. ඒ කිසිදු නිවේදනයක දෙමළ පරිවර්තනයක් මේ තාක් ප්‍රසිද්ධියට පත් කර නැත.

හිටපු සභාපති ඇමැති සමග

ශ්‍රී ලංකා මානව හිමිකම් කොමිසම හමුවේ 13 වැනිදා පෙනී නොසිටීමට තිරණය කළ මහජන ආරක්ෂක අමාත්‍ය ටිරාන් අලස් ජනමාධ්‍ය වෙත පවසා තිබුනේ අදාළ කැඳවීම නිසි ක්‍රමවේදයක් යටතේ සිදුකර නොමැති බැවින් තමන් එහි නොයාමට තීරණය කළ බවයි.

මානව හිමිකම් උල්ලංඝණය වීමක් සම්බන්ධ සිදුවීමකදී ශ්‍රී ලංකා මානව හිමිකම් කොමිසම පළමුව කළ යුත්තේ ඊට අදාළ රාජ්‍ය ආයතනයේ නිලධාරීන් හරහා වාර්තාවක් කැඳවා අධ්‍යයනය කිරීම මිස එහි විෂය භාර ඇමතිවරයා කැඳවීම නොවන බව එම කොමිසමේ හිටපු සභාපති, නීතීඥ ප්‍රතිභා මහානාමහේවා ජනමාධ්‍ය වෙත පවසා තිබුනි.

විරෝධතා විසුරුවාහැරීමේ සිදුවීම්වලට අදාළව මානව හිමිකම් කොමිසම පළමුව කළ යුතුව තිබුණේ මහජන ආරක්ෂාව භාර ඇමතිවරයා කැඳවීම නොව විෂය භාර අමාත්‍යංශයේ ලේකම්වරයාගෙන් වාර්තාවක් කැඳවා එය අධ්‍යයනය කිරීම යැයි ආචාර්ය මහානාමහේවා ප්‍රකාශ කළ බව එම වාර්තාවල වැඩි දුරටත් දැක්වේ.

“මෙම උද්ඝෝෂන දිනවල උද්ඝෝෂන පාලනය කිරිම සදහා ක්ෂේත්‍රයේ කටයුතු කළ ජ්‍යේෂ්ඨතම පොලිස් නිලධාරීන්ගේ නාම ලේඛනයක් (එක් එක් ක්ෂේත්‍රය වෙන්වෙන් වශයෙන්) 2023 මාර්තු මස 10 වන දිනට පෙර ශ්‍රී ලංකා මානව හිමිකම් කොමිෂන් සභාව වෙත යොමු කරන ලෙස පොලිස්පතිවරයා වෙත 2023 මාර්තු මස 09 වන දින ලිඛිතව දන්වා යවන ලදී,” යනුවෙන්ද කොමිසම නිවේදනය කර ඇත.

එම නාම ලේඛනය ලැබී ඇති දැයි කොමිසම හෝ එහි සභාපතිනි රෝහිණී මාරසිංහ හිටපු ශ්‍රේෂ්ඨාධිකරණ විනිසුරුවරිය හෝ ප්‍රසිද්ධිට පත් කර නැත.