දෙමළ ප්‍රශ්න දකුණට පහදා දීමට අන්තරේට දස වැදෑරුම් යෝජනාවලියක් (VIDEO)

0
1

දශක ගණනාවක් තිස්සේ දෙමළ ජනතාව සිංහල බහුතර ආණ්ඩුවල හමුදාකරණය යටතේ පීඩාවට පත්කරන දැවෙන ප්‍රශ්න සම්බන්ධයෙන් සටන් වදින්නේ නම්, දකුණේ අරගලවලට සම්බන්ධවීම පිළිබදව සලකා බැලිය හැකි බව උතුරේ දෙමළ ශිෂ්‍ය සංගම් නායකත්වය රටේ ප්‍රමුඛතම ශිෂ්‍ය සංගමයට සහතික වී තිබේ.

උතුරට ගිය අන්තර් විශ්වවිද්‍යාල ශිෂ්‍ය බල මණ්ඩලයේ කැදවුම්කරු වසන්ත මුදලිගේට යාපනය විශ්වවිද්‍යාලයීය මහා ශිෂ්‍ය සංගමය සති අන්තයේ ඒ සහතිකය දී ඇත්තේ ත්‍රස්තවාදය වැලැක්වීමේ පනත සහ මේ මොහොතේ රට තුළ උද්ගතව ඇති තත්වය පිළිබදව යාපනයේදී පවත්වන ලද සාකච්ඡාවකදීය.

දින 150 කට වැඩි කාලයක් ත්‍රස්ත පනත යටතේ සිරගත කොට සිටි අවිශිබම නායකයා ඇප ලබා නිදහස් වී උතුරට යාමට පෙර කොළඹදී කියා සිටියේ දෙමළ ජනතාවගේ ප්‍රශ්න පිළිබඳ අවබෝධයක් ලබා ගැනීම තම සංචාරයේ අරමුණ බවයි.

දකුණෙන් ගිය සිවිල් සංවිධාන නියෝජිතයන් කිහිප දෙනකුගේද සහභාගිත්වයෙන් යාපනයේ පැවැති සාකච්ඡාව තුලදී උතුරේ දෙමළ සමාජය පීඩා විදින මුලික කරුණු 10 ක් පිළිබදව දකුණේ ශිෂ්‍ය සංගම් නායකයන්ට පහදා දීමට යාපනය විශ්වවිද්‍යාලයීය මහා ශිෂ්‍ය සංගමය කටයුතු කර තිබේ.

වසන්තගෙන් ප්‍රශ්නයක්

ත්‍රස්තවාදය වැළක්වීමේ පනතට (PTA) එරෙහිව දකුණේ අරගල කරද්දී උතුරේ ජනතාව ඔවුන් හා සම්බන්ධ නොවුනේ ඇයිදැයි අවිශිබම නායකයා විමසු බව යාපනයේ උපාධි අපේක්ෂකයන්ගේ නායකත්වය පවසයි.

“අපිට නිදහස ලැබුනයි කියන 1948 ඉඳලා අපි දිගටම හිටියේ මර්දනයක් යටතේ. ඒ තත්වය තුල PTA කියන්නේ දෙමළ ජනතාවට හුරුපුරුදු ප්‍රශ්න ගණනාව අතරින් එකක් විතරයි. අපේ මූලික ප්‍රශ්නය තමයි අපේ ඉඩකඩම්, අපේ අයිතිවාසිකම් අපිට අහිමි වෙමින් යනවා. දෙසීයකට වැඩිය බෞද්ධ විහාර දෙමළ ප්‍රදේශවල ඉදි කරමින් බෞද්ධ ජාතිවාදය පතුරවමින් යනවා. ඊට අමතරව හමුදා මර්දනය උතුරු නැගෙනහිර බරපතල විදියට තියෙනවා,” යි යාපනය මහා ශිෂ්‍ය සංගමයේ සභාපති අලගරාසා විජයකුමාර් දකුණෙන් පැමිණි සිසු නායකයා හා එක්ව සරසවි පරිශ්‍රයේ පැවැත්වූ මාධ්‍ය හමුවේ දී කියා සිටියේය.

එම ප්‍රශ්න සම්බන්ධයෙන් දකුණේ මතවාදයක් ගොඩනගමින් අරගලයක් දියත් කරන්නේ නම්, ඒ හා එක්වීම ගැන සැලකිලිමත් විය හැකි බව දෙමළ ශිෂ්‍ය නායකයා අවධාරණය කළේය.

වර්ග සංහාරය හා ආර්ථික අර්බුදය

දකුණේ සිංහල ජනයා අරගල කිරීමට තුඩු දුන් ආර්ථික අර්බුදයට දෙමළ ජනයාට එරෙහි වර්ග සංහාරක යුද්ධය මූලික හේතුව වූ බව පිළිගන්නවාදැයි, යාපනය විශ්ව විද්‍යාල සිසුන් නැගූ ප්‍රශ්නයට, අන්තර් විශ්වවිද්‍යාල ශිෂ්‍ය බලමණ්ඩලයේ කැඳවුම්කරු වසන්ත මුදලිගේ “ඔව්, පිලිගන්නවා” යැයි පිළිතුරු දුන් බව ශිෂ්‍ය නායක විජයකුමාර් හෙළි කළේය.

අවිශිබම කැදවුම්කරු ජනමාධ්‍ය වෙත සඳහන් කළේ “ඉඩම් අහිමිවීමේ ප්‍රශ්නේ ඉඳලා, දේශපාලන අයිතිවාසිකම් පිළිබඳ ප්‍රශ්නේ ඉඳලා, භාෂණයේ නිදහස අහිමිවීමේ ප්‍රශ්නේ ඉඳලා” උතුර පීඩාවට පත් කරන සියළු ප්‍රශ්න සදහා අඛණ්ඩ මැදිහත්වීමක් සිදු කිරීමට බලාපොරොත්තු වෙන බවයි.

” ත්‍රස්තවාදය වැළක්වීමේ පනත අහෝසි කරන්න කියන යෝජනාවෙන් පටන් අරගෙන, ඒ වගේම දේශපාලන රැඳවියන් නිදහස් කරන්න කියන යෝජනාවෙන් පටන් අරගෙන, උතුරේ සමාජයේ තියෙන සියලු ප්‍රශ්න සඳහා අඛණ්ඩ මැදිහත්වීමක් කළ යුතුයි කියන මැදිහත්වීම අපි කියනවා වගේම ඒකට අදාළ පුළුල් මැදිහත්වීමක් කරන්න අපි බලාපොරොත්තු වෙනවා,” යි වසන්ත මුදලිගේ මාධ්‍යවේදීන් සමග කියා සිටියේය.

” තවදුරටත් බෙදිලා ඉන්නේ නැතුව ඇත්ත ප්‍රශ්න වලට උත්තර හොයාගෙන උතුරේ, දකුණේ, නැගෙනහිර කියන මේ සියළු ප්‍රශ්න වලට උත්තර හොයාගන්න අපි එකතුවෙලා විවිධ මැදිහත්වීම් කරමු.සටන් කරමු, එකතු වෙමු සංවිධානය වෙමු කියන යෝජනාව අපි අද දවසේදී කරනවා.”

දකුණේ සමාජය තුළ අරගල කරන්නට දෙමළ ශිෂ්‍ය නායකත්වය අවිශිබමට ලිඛිතව ලබා දී ඇත්තේ පහත දැක්වෙන ඉල්ලීම් මාලාවයි.

1. උතුරු නැගෙනහිර පළාත් නිජභූමිය කොටගත් දෙමළ ජනතාව තමන්ගේම භාෂාවක්, ආගමක් සහ සංස්කෘතික අනන්‍යතාවක් සහිත සුවිශේෂී ජාතියක් බව පිළිගත යුතුය.

2. ඒකාබද්ධ උතුරු නැගෙනහිර පළාත් දෙමළ ජනතාවගේ පාරම්පරික නිජබිම බව පිළිගත යුතුය.

3. දෙමළ ජනයාට ස්වයං පාලනයට හිමිකම් ඇති බව පිළිගත යුතුය.

4. සියලුම ජාතීන් ඇතුලත්ව, දෙමළ ජාතිකයන්ට ද ස්වයං නිර්ණ අයිතිය ඇති බවත් ඒ හරහා තමන්ගේ දේශපාලන ඉරණම තීරණය කිරීමට ඔවුන්ට අයිතියක් ඇති බවත් පිළිගත යුතුය.

5. ජාත්‍යන්තරව අධීක්‍ෂණය කෙරෙන ජනමත විචාරණයක් හරහා දෙමළ ජනයාට තම දේශපාලන ඉරණම තීරණය කිරීමට අවස්ථාවක් දිය යුතු බව පිළිගත යුතුය.

6. දෙමළ ජනතාවට එරෙහිව සිදු කරන ලද වර්ග සංහාරය, යුද අපරාධ, මානව වර්ගයාට එරෙහි අපරාධ සහ බලහත්කාරයෙන් අතුරුදහන් කරවීම් සඳහා ජාත්‍යන්තර යුක්ති යාන්ත්‍රණ හරහා යුක්තිය ඉටු කළ යුතු බව පිළිගත යුතුය.

7. දෙමළ නිජබිමේ වාඩිලා සිටින ආක්‍රමණික සිංහල යුද හමුදාව වහාම ඉවත් කළ යුතු බව පිළිගත යුතුය.

8. ආක්‍රමණය කර තිබෙන දෙමළ ජනතාවගේ ඉඩම් වහා නිදහස් කළ යුතු බව පිළිගත යුතුය.

9. ශ්‍රී ලංකා ආණ්ඩුක්‍රම ව්‍යවස්ථාවේ 6 වැනි සංශෝධනය අහෝසි කර දෙමළ ජනතාවට තම දේශපාලන අභිලාෂයන් ඉදිරිපත් කිරීමට දේශපාලන අවකාශයක් ස්ථාපිත කළ යුතු බව පිළිගත යුතුය.

10. ත්‍රස්තවාදය වැළැක්වීමේ පනත අහෝසි කර, දීර්ඝ කාලයක් බන්ධනාගාරවල සිටින දෙමළ දේශපාලන සිරකරුවන් කිසිදු කොන්දේසියකින් තොරව වහාම නිදහස් කළ යුතු බව පිළිගත යුතුය.

Facebook Comments

wedding people