වතු කම්කරුවන්ගේ ඉටුනොවූ රුපියල් දහසේ වැටුප් පොරොන්දුව ලබා දී වසරක් සපිරෙන මොහොතේ වතු සමාගම් හා වෘත්තීය සමිති අතර සාමුහික ගිවිසුම යළි ක්‍රියාත්මක කරන ලෙස ඉල්ලා වතු වෘත්තීය සමිතියක් උද්ඝෝෂණයක් දියත් කර තිබේ.
හැටන් නගරයේ පිහිටි කම්කරු කාර්යාලය ඉදිරිපිටට රැස්වූ ලංකා කම්කරු රතු කොඩි සංගමයේ සාමාජිකත්වය දරන කම්කරුවෝ සිකුරාදා උදෑසන පැයක පමණ කාලයක් උද්ඝෝෂණයක නිරත වුහ.
කම්කරු දෙපාර්තමේන්තුව විසින් හාම්පුතුන් සමග එක්ව වතු කම්කරුවන්ගේ රැකියා අයිතිය උල්ලංඝණය කිරීමේ වැඩසටහන නවතා දමන ලෙසත්, කොන්දේසි විරහිතව දෛනික වැටුප රුපියල් 1000 ලබා දෙන ලෙසත්,හාම්පුතුන් හා සමිති අතර පැවති සාමුහික ගිවිසුම යළි අත්සන් කරන මෙන් ඉල්ලා බැනර් හා පුවරු රැගෙන රතු කොඩි කම්කරුවන් උද්ඝෝෂණයේ යෙදුනු බව කඳුකරයේ මාධ්‍යවේදියෝ පවසති.
අනතුරුව වතු කම්කරුවන්ගේ ඉල්ලීම් අඩංගු සංදේශයක් කම්කරු කාර්යාලය වෙත බාර දෙන ලදී.
සටන්කාමි වෘත්තීය සමිති නායකයකු වූ දිවංගත එම්.ඒ රාමයියා නායකත්වය දුන් රතු කොඩි වතු වෘත්තීය සමිතිය එන්.ශන්මුගදාසන්ගේ නායකත්වයෙන් පැවති ලංකා කොමියුනිස්ට් පක්ෂයේ චීන පිලට අනුබද්ධව ක්‍රියාත්මක වූ වෘත්තීය සමිතියකි.
“වතු කම්කරුවන්ගේ අයිතිවාසිකම් දිනා ගැනීමේ සටනේ දෙවැනි පියවර තමයි දැන් ක්‍රියාත්මක වන්නේ. පළමු පියවර ලෙසින් ලිපි ලියලා, සාකච්ජා මාර්ගයෙන් නිරාකරණය ගන්න තමයි උත්සහා කළේ.අපි අදියරෙන් අදියර ඉදිරියට යනවා.වතු කම්කරුවන්ගේ අයිතීන් ආරක්ෂා කිරීමේ වගකීම ආණ්ඩුවට තියෙනවා.ඒක ආණ්ඩුව කරන්නේ නැත්නම් අපිට නීතියේ පිට පතා උසාවි යනවා,“යි රාමයියාගේ මරණයෙන් පසු රතු කොඩි සමිතියේ බලය අත්පත් කරගෙන සිටින රාජ්‍ය නොවන සංවිධාන ක්‍රියාකාරිනියක ලෙස සැලකෙන මේනහා කන්දසාමි සඳහන් කළාය.
ලංකා කම්කරු රතු කොඩි සංගමයේ හැටන් කාර්යාලයේ දී කඳුරට මාධ්‍යවේදීන් අමතා එම සංගමයේ නායිකාව වැඩි දුරටත් කියා සිටියේ වතු පාලකයන් කෝවිඩ් වසංගතය යොදා ගෙන කම්කරුවන්ගේ ශ්‍රමය සුරා කෑ මුත්, ප්‍රශ්න ඉදිරිපත් කිරීමේදී කෝවිඩ් නිසා විසදුම් ලබා දීමට නොහැකි බව පවසා මග හරින බවයි.
වතු කම්කරුවන්ගේ දෛනික වැටුප රුපියල් දහසකින් වැඩි කිරීමට අදාළ නිර්දේශ පඩි පාලක සභාව විසින් නිකුත් කිරීමට එරෙහිව වතු පාලකයන් විසින් අධිකරණයට පෙත්සමක් ගොනු කර තිබේ. ඒ සමගම වසර දෙකින් දෙකට අත්සන් කෙරෙන සාමුහික ගිවිසුම ද අහෝසි විණි.
“රුපියල් 1000 ගෙවනවා කියලා අද වෙනකොට අවුරුද්දක් ගත වෙලා. අවුරුදු 20 ක් තිස්සේ ක්‍රියාවට නංවලා තිබුණු සාමුහික ගිවිසුමත් පාලකයෝ අත්සන් කරන්නේ නැහැ. ගිවිසුමේ කොම්පැනි හා සමිති එකතුව ඉල්ලීම් 20 ක් ඇතුලත් කරලා තිබ්බා. දැන් වතු පාලකයෝ කම්කරුවන්ව බිය ගන්වලා,පඩිය කප්පාදු කරලා,සෞඛ්‍ය පහසුකම් කපා දමලා තියෙන්නේ,“යැයි රතු කොඩි සංගමයේ නියෝජ්‍ය සභාපති සෙල්ලයියා සිවසුන්දරම් මාධ්‍ය හමුවට එක්වෙමින් පැවසීය.
සිවසුන්දරම් පෙන්වා දෙන අන්දමට `ජාතික ආර්ථිකයට` වතු කම්කරුවන් කෙතරම් දායක වුවද අද වන විට ඔවුන් වෙනත් රැකියාවන් සොයා මහ මග රස්තියාදු වන බවයි.
වතු සමාගම් හා වෘත්තීය සමිති අතර පැවති සාමුහික ගිවිසුම යළි අත්සන් කළ යුතු බවට උද්ඝෝෂණ ව්‍යාපාරයක් රාජපක්ෂ ආණ්ඩුවේ හවුල්කාර පාර්ශවයක් වන ලංකා වතු කම්කරු කොංග්‍රසය ද දියත් කර තිබිණි.
Facebook Comments
