විස්සේ වගකීම ගන්න කවුරුත් නෑ

විසි වන ආණ්ඩුක්‍රම ව්‍යවස්ථා සංශෝධනය කෙටුම්පත් කිරිමේ වගකීමෙන් ආණ්ඩු පාක්ෂික මන්ත්‍රීවරුන් දෙනෙකුම බැහැර වී තිබේ.

ව්‍යවස්ථා සංශෝධනය කෙටුම්පත් කළේ තමන් විසින් නොවන බව සහ නීති කෙටුම්පත් දෙපාර්තමේන්තුව පවතින්නේ අධිකරණ අමාත්‍යවරයා වශයෙන් තමන් යටතේ බැවින් කැබිනට් මණ්ඩලය වෙනුවෙන් ඊට සම්බන්ධීකරණ කටයුතු පමණක් තමන් සිදුකළ බවයි අධිකරණ අමාත්‍ය මොහොමඩ් අලි සබ්‍ පවසන්නේ.

ජනාධිපතිවරයාගේ නීති උපදේශකයින් කිහිප දෙනෙකු විසින් කෙටුම්පත්කර ඇති අදාල 20 වන ව්‍යවස්ථා යෝජනාවලියෙන් අගමැතිවරයා ‘නිකමෙකු’ කර ඇතැයි ‘මහින්දවාදීන්’ ගෙන් බරපතල විවේචනයක් එල්ල වෙමින් තිබිය දි අධිකරණ ඇමතිවරයා මේ බව ප්‍රකාශ කර සිටියේ 12 සෙනසුරාදා මාධ්‍යවේදීන් නැඟූ ප්‍රශ්න වලට පිළිතුරු දෙමිනි.

“ශ්‍රී ලංකාවේ ව්‍යවස්ථාවේ 42 වන ව්‍යවස්ථාව අනුව කැබිනට් මණ්ඩලයට තමයි නීති සම්පාදනය කිරීමේ බලය තියෙන්නෙ. ඔවුන් ලබාදෙන උපදෙස් අනුව ඒක කෙටුම්පත් කරනවා. කෙටුම්පත් කරන දෙපාර්තමේන්තුව මං යටතේ තියෙන හින්දා, රේඛීය අමාත්‍යාංශය මං යටතේ තියෙන හින්දා තමයි මම ඔවුන් එක්ක සම්බන්ධීකරණය කළේ කැබිනට් මණ්ඩලය වෙනුවෙන්. මගේ කිසිදෙයක් අලුතින් නෑ මේකෙ. මේකෙ තියෙන්නෙ 19ට පෙර තිබුණු 18 තත්වය”

මේ අතර අමාත්‍යවරයා කණ්ඩායම් නායක රැස්වීමේදී ආන්දෝලනයට තුඩු දී ඇති ප්‍රතිපාදන 20 වැනි සංශෝධනයට ඇතුලත් කළේ කවුරුන්දැයි තමා නොදන්නා බව මහාචාර්ය ජී.එල්. පීරිස් අමාත්‍යවරයා පවසා ඇතැයි මාධ්‍ය වාර්තා කර ඇත.

අධිකරණ අමාත්‍යවරයා විසින් එම කෙටුම්පත අමාත්‍ය මණ්ඩලයට ඉදිරිපත් කළ නිසා එහි වගකීම එම අමාත්‍යවරයාට පැවරෙන බවයි අමාත්‍ය විමල් වීරවංශ සඳහන් කරන්නේ.

අගමැති කමිටුව

20 වන ආණ්ඩුක්‍රම ව්‍යවස්ථා සංශෝධනය අධ්‍යයනය කිරීම සඳහා පාර්ලිමේන්තු නියෝජිතයින්ගෙන් සමන්විත කමිටුවක් පත් කිරීමට අග්‍රාමාත්‍ය මහින්ද රාජපක්ෂ පියවර ගෙන තිබේ.

කැබිනට් අමාත්‍යවරුන්, රාජ්‍ය අමාත්‍යවරුන් හා පාර්ලිමේන්තු මන්ත්‍රීවරුන්ගෙන් සැදුම්ලත් නව දෙනෙකුගෙන් යුත් අදාළ කමිටුවේ සභාපතීත්වය හිමිව ඇත්තේ අමාත්‍ය මහාචාර්ය ජී.එල්.පීරිස් වෙතය.

එම කමිටුව සඳහා කැබිනට් අමාත්‍යවරුන් වන උදය ගම්මන්පිල, අලි සබ්රි, නිමල් සිරිපාල ද සිල්වා, විමල් වීරවංශ යන අය පත්කර තිබේ.

ඊට අමතරව රාජ්‍ය අමාත්‍යවරුන් වන සුසිල් ප්‍රේමජයන්ත, එස්.විලේන්ද්‍රන් සහ පාර්ලිමේන්තු මන්ත්‍රීවරුන් වන ඩිලාන් පෙරේරා, ප්‍රේමනාත් සී.දොලවත්ත යන අය කමිටුවට පත්කර ඇති බව අග්‍රාමාත්‍ය කාර්යාලය සඳහන් කළේය.

මෙම කමිටු වාර්තාව සැප්තැම්බර් මස 15 වන දින අග්‍රාමාත්‍ය මහින්ද රාජපක්ෂ මහතා වෙත භාරදීමට නියමිතව තිබේ.