වසර ගණනාවක් තිස්සේ වන්නි වාසි හින්දු බැතිමතුන් පිරිසකගේ වන්දනාවට පාත්‍ර වු පර්වතයක් කඩා බිඳ දැමීම සදහා රජය අනුමැතිය දීම සම්බන්ධයෙන් ප්‍රදේශවාසී ජනතාවගේ විරෝධය එල්ල වී තිබේ.
පළාත් බද වාර්තාකරුවන් පවසන පරිදි වව්නියා දිස්ත්‍රික්කයේ පූවරසන්කුලම් ප්‍රදේශයේ පිහිටි පර්වතයක් කළු ගල් කැඩීම සදහා ප්‍රදේශිය ලේකම්වරයා විසින් පිටස්තර පුද්ගලයකුට බලපත්‍රයක් නිකුත් කර ඇත.
එම පර්වතයේ කළු ගල් කැඩීම නතර කරන ලෙස බලධාරීන්ගෙන් ඉල්ලා සිටින ගම්වාසී විරෝධතාකරුවන් පෙන්වා දෙන්නේ එම කන්ද වසර ගණනාවක සිට තමන් ආගමික කටයුතු වෙනුවෙන් භාවිත කරන ස්ථානයක් බවයි.
එම ප්‍රදේශයේ ජනතාව අනාදිමත් කාලයක සිට එම පර්වතය මුදුනේ ගණ දෙවියන් වන්දනාමාන කරන බව පළාත් බද වාර්තාකරුවෝ වැඩි දුරටත් පවසති.
ගම් වැසියන් අස්වනු නෙලීමෙන් පසු වාර්ෂිකව එම පර්වතය මුදුනේ විශේෂ ආගමික වතාවත් වල නිරත වන බවයි ඔවුන් වැඩි දුරටත් පවසන්නේ.
ජනතාවගේ විරෝධතා හමුවේ වව්නියාව ප්‍රදේශිය ලේකම් එන්.කමලදාසන් සහ ප්‍රාදේශීය සභා සභාපති ටී.යෝගරාජා මාර්තු 8 වැනිදා එම ස්ථානයේ නිරීක්ෂණ චාරිකාවකට එක්ව තිබේ.
එහිදී ගම් වැසියන් පෙන්වා දී ඇත්තේ තමන් අනාදිමත් කාලයක සිට එම ස්ථානයේ වන්දනාමාන කළ ශිලා ස්ථම්භය මේ වන විට අස්ථානගත වී මෑත කාලීන ගණ දෙවි පිළිමයක් එම ස්ථානයේ තැන්පත් කර ඇති බවයි.
එම පර්වතය වන්දනාමානයට පාත්‍ර වන ස්ථානයක් බව දැනගත් ප්‍රාදේශීය ලේකම්වරයා ඒ ගැන තමන් ගන්නා පියවර සම්බන්ධයෙන් පුරා විද්‍යා දෙපාර්තමේන්තුව හා පරිසර අධිකාරිය සමග සාකච්ඡා කර ප්‍රදේශවාසීන්ට දැනුම් දීමට පොරොන්දු වු බව පළාත් බද වාර්තාකරුවෝ පවසති.
ආරක්ෂක අමාත්‍යංශය, මහවැලි අධිකාරිය, සංචාරක මණ්ඩලය, පුරාවිද්‍යා දෙපාර්තමේන්තුව, වන සංරක්ෂණ හා වනජීවි දෙපාර්තමේන්තු උතුරු නැගෙනහිර දෙමළ ජනයාගේ ඉඩම් බලහත්කාරයෙන් අත්පත්කරගන්නා බවට දිගින් දිගටම චෝදනාවට ලක්ව සිටි.
Facebook Comments
