විදෙස් රටවල සිදුවන මානව හිමිකම් උල්ලංඝනය වීම් සම්බන්ධයෙන් හඩ නගන ශ්‍රී ලාංකිකයන් තම රට තුළම සිදුවන මානව හිමිකම් කඩකිරීම් ගැන නිහඩ පිළිවෙතක් අනුගමනය කරන්නේ ඇයි දැයි ශ්‍රී ලංකාවේ ප්‍රමුඛතම මානව හිමිකම් ක්‍රියාධරයෙක් ප්‍රශ්න කර තිබේ.
ඇමරිකාවේ පොලිස් නිලධාරියකුගේ දනිස් වලට හිරවී දී ඝාතනයට ලක් වු කළු ජාතික ජෝර්ජ් ෆ්ලොයිඩ්ගේ මරණය සම්බන්ධයෙන් ලොව පුරා සිදුවන උද්ඝෝෂණ යහපත් තත්වයක් බවයි මානව හිමිකම් ක්‍රියාධර රුකී ප්‍රනාන්දු පවසන්නේ.
“ඇමරිකාවේ වේවා, ඉන්දියාවේ වේවා ඕනෑම රටක පොලිසියෙන් හෝ රාජ්‍ය නිලධාරීන්ගෙන් ඕනෑම කෙනෙකුගෙන් වන මර්දනයට විරුද්ධව අපි නැගී සිටිය යුතුයි. ”
සිරකරු අයිතිවාසිකම් සුරැකීමේ කමිටුව විසින් ජුනි 8 සදුදා කොළඹදී පැවැත්වු මාධ්‍ය හමුවකදී මානව හිමිකම් ක්‍රියාධරයා ප්‍රශ්න කළේ ලංකාවේ සිදුවන මානව හිමිකම් කඩකිරීම් සම්බන්ධයෙන් ඒ අයුරින් නැගී නොසිටින්නේ ඇයි ද යන්නයි.
” ඒත් අපි ලංකාවේ පොලීසියෙන්, බන්ධනාගාර නිලධාරීන්ගෙන් වන මර්දනයට විරුද්ධව ඇයි මේ විදිහට නැගී සිටින් නැත්තේ. ”
එම තත්වයට ලංකාවේ මාධ්‍ය ද වග කිව යුතු බව ජාත්‍යන්තර වශයෙන් කිර්තියක් දිනා සිටින මානව හිමිකම් ක්‍රියාධරයකු වන රුකී ප්‍රනාන්දු අවධාරණය කළේය.
” ඇයි ලංකාවේ මාධ්‍ය වලින් මේ ජෝර්ජ් ෆ්ලොයිඩ් ගැන දෙන ආවරණය ලංකාවේ මරණ අය, ඝාතනයට ලක් වන අය සම්බන්ධයෙන් ලබා දෙන් නැත්තේ. ඇයි ලංකාවේ සමාජය මේක ගැන නැගිටීමක් නැත්තේ ”
බරපතල මානව හිමිකම් උල්ලංඝනය වූ බවට විශ්වසනීය සාක්ෂි හෙළිවී ඇති ශ්‍රී ලංකාවේ යුද්ධයට ආධාර කළ ක්‍රියාධාරීන්ගෙන් සැදුම්ලත් පක්ෂයක්, ඇමරිකාවේ කළු ජාතික ජෝර්ජ් ෆ්ලොයිඩ් ඝාතනයට විරෝධය දක්වා කොළඹ දී පැවැත්වීමට සැලසුම් කර ඇති උද්ඝෝෂණයක් පිළිබදවත් මානව හිමිකම් ක්‍රියාධරයා එහිදී සිහිපත් කළේය.
ජාත්‍යන්තර වශයෙන් සිදුවන අසාධාරණකම් හා මර්දනකාරී ක්‍රියාවන්ට එරෙහිව නැගී සිටින අතරතුර තම දොරකඩම සිදු වන අසාධාරණකම් වලට එරෙහිව නැගී සිටින ලෙසත් රුකී ප්‍රනාන්දු ශ්‍රී ලාංකිකයන්ගෙන් ඉල්ලා සිටියේය.
ශ්‍රී ලංකාවේ බන්ධනාගාර තුළ රැදවියන්ට පවතින ගැටලු සහ මාසයකට ඉහතදී මහර බන්ධනාගාරය තුලදී මිය ගිය කාවින්ද ඉසුරු නැමැති තරුණ රැදවියාගේ ඝාතනය සම්බන්ධයෙන් තොරතුරු අනාවරණය කිරීම සදහා සිරකරු අයිතිවාසිකම් සුරැකීමේ කමිටුව විසින් සංවිධානය කර තිබු මාධ්‍ය හමුවේදී මානව හිමිකම් ක්‍රියාධර රුකී ප්‍රනාන්දු තව දුරටත් අවධාරණය කර තිබුනේ ශ්‍රී ලංකාවේ බන්ධනාගාර තුළ සිටින සිරකරුවන්ගේ මුලික අයිතිවාසිකම් දැඩි ලෙස උල්ලංඝනය වී ඇති බවයි.
ලංකාවේ බන්ධනාගාර තුළ ඉඩ පහසුකම් ඇත්තේ දස දහසක් පමණ වු පිරිසකට වුවත් මේ වන විට එහි විසි හය දහසක් පමණ සිටින බව ඔහු අනාවරණය කළේය.
එතරම් විශාල පිරිසක් කුඩා ඉඩ කඩක් තුළ අවම පහසුකම් යටතේ සිටින විට ඔවුන් දැඩි පීඩාවකට හා මර්දනයකට ලක් වන බව රුකී ප්‍රනාන්දු මාධ්‍ය හමුවේදී පෙන්වා දුන්නේය.
එහිදී ඔහු තව දුරටත් අවධාරණය කර තිබුනේ ශ්‍රී ලංකාවේ බන්ධනාගාර තුලට ඇතුල් වන බහුතරය සැක කරුවන් පමණක් වන බවයි.
බන්ධනාගාර දෙපාර්තමේන්තුවේ 2018 වසරේ සංඛාලේඛන අනුව බන්ධනාගාරගතවු පිරිසෙන් සියයට අසු එකකටත් වඩා වැඩි පිරිසක් අධිකරණ මගින් දඩුවම් හිමි නොවු සැකකරුවන් පමණක් බව රුකී ප්‍රනාන්දු සදහන් කළේය.
එමෙන්ම අධිකරණයෙන් දඩුවම් නියම වී බන්ධනාගාර ගත වන පිරිසෙන් සියයට හැටකටත් වඩා බන්ධගාගාර ගත වීමට සිදුව ඇත්තේ දඩ ගෙවා ගැනීමට නොහැකි විමෙනි.
මෙම මාධ්‍ය හමුවේදී සිරකරු අයිතිවාසිකම් සුරැකීමේ කමිටුවේ ලේකම් සුදේෂ් නන්දිමාල් සිල්වා, සභාපති නීතිඥ සේනක පෙරේරා සහ ක්‍රියාකාරී සාමාජිකා ශමිලා ලියනාරච්චි ද අදහස් දක්වා තිබේ.
Facebook Comments
