ජනාධිපතිවරයා ජාතිවාදය, ආගම්වාදය පතුරා හරිමින් මිලිටරිකරණයට රට නතු කරමින්, රට දැවැන්ත අර්බුදයක ගිල්වා ඇති මොහොතක විපක්ෂය තමන්ගේ කාර්යය කුමක්ද යන්න හෝ නිවැරදිව වටහාගෙන නොමැතිව කටයුතු කරන බවට “මන්ත්‍රී දේශපාලනයට” සමුදෙමින් විපක්ෂයේ ප්‍රබල මන්ත්‍රීවරයෙකු චෝදනා කර තිබේ.
ගෝඨාභය රාජපක්ෂ ජනාධිපතිවරයාගේ පාලන කාලය අකාර්යක්ෂම හා අදූරදර්ශී පාලනයක් බව ඉතා කෙටි කාලයක් තුළ පෙන්වා දී ඇතැයි තිස් දෙවසරක පාර්ලිමේන්තු දේශපාලනයෙන් සමුගන්නා මංගල සමරවීර හිටපු අමාත්‍යවරයා ප්‍රකාශ කර ඇත.
රට ගොඩනැගීමට නම් එක්සත් ජාතික පක්ෂයේ මූලික ප්‍රතිපත්ති ක්‍රියාත්මක විය යුතු බව අවධාරණය කර හිටපු මන්ත්‍රීවරයා පක්ෂය බෙදී වෙන්වීම පිළිබඳව ද සිය කනස්සල්ල පළ කර තිබේ.
සමගි ජන බලවේගයෙන් මාතර දිස්ත්‍රික්කයට මෙවර නාම යෝජනා දී ඇති හිටපු මන්ත්‍රීවරයා මැතිවරණයට තරග නොකරන අතර “මන්ත්‍රී දේශපාලනයෙන් ඉවත් වන බවට 09 අඟහරුවාදා මාතර දිස්ත්‍රීක්කයේ පළාත් පාලන නියෝජිතයන් ප්‍රමුඛ ක්‍රියාකාරීන් පිරිසක් හමුවේ පවසා ඇත.
තම ඉවත් වීම සම්බන්ධයෙන් එක්සත් ජාතික පක්ෂ නායක රනිල් වික්‍රමසිංහට හා සමගි ජන බලවේගයේ නායක සජිත් ප්‍රේමදාසට දන්වා ඇතැයි ද ඔහු පවසයි.
කෙසේ වෙතත් මෙය කිසිඳු ලෙසකින් දේශපාලනයෙන් සමුගැනීමක් හෝ විශ්‍රාම ගැනීමක් නොවන බවද අවධාරණය කරන ඔහු රට තුළ ප්‍රජාතන්ත්‍රවාදය, සංහිඳියාව හා සංවර්ධනය වෙනුවෙන් පාර්ලිමේන්තු දේශපාලනයෙන් ඔබ්බට තබන්නාවූ අලුත් පියවරක් බවද පවසයි.
තම නව දේශපාලන ඇරඹුම රටේ ප්‍රජාතන්ත්‍රවාදය ගරු කරන, සමාජ අනන්‍යතා සංස්කෘතීන් ඉවසන, එකිනෙකා කෙරේ වෛරයෙන් නොබැඳුණු මිනිස් කැළක් හා එක්ව නිවැරදි සංවර්ධන දිශානතියක් ගොඩනැංවීම වෙනුවෙන් දියත් කරන බවයි ඔහු පෙන්වා දෙන්නේ.
ඒ සඳහා උප්පත්තියෙන් හිමිකර ගත් ජාතිය, කුලය, ආගම, ජන වර්ගය හෝ ලිංගික අනන්‍යතා සාධක තම හිස මත පුරවා නොගත්, දේශපාලන, සංස්කෘතික හා සමාජ කුහකත්වයෙන් තොර සියලු මිනිසුන්ට මංගල සමරවීර ආරාධනා කර සිටී.
Facebook Comments
