ඇමරිකානු යුද නැවක් ත්‍රිතුණාමළය වරායට සේන්දු වෙයි

ඇමරිකා එක්සත් ජනපද නාවික හමුදාවට අයත් යුද නෞකාවක් වන ‘ඇන්කරේජ්’ නෞකාව සිව් දින පුහුණු අභ්‍යාසයක් සඳහා ත්‍රිකුණාමලය වරායට සේන්දු වී තිබේ.

‘ඇන්කරේඡ්’ නෞකාව ත්‍රිකුණාමලය වරායට 24 සිකුරාදා සේන්දු වීමෙන් අනතුරුව ශ්‍රී ලංකා නාවික හමුදාව විසින් නාවික සම්ප්‍රදායානුකූලව එම නෞකාව පිළිගන්නා ලදී.

අණදෙන නිලධාරි කපිතාන් ඩෙනිස් ජැකෝ ඇතුළු නිලධාරින් පිරිසක් නැගෙනහිර නාවික මුලස්ථානයේදී නැගෙනහිර නාවික විධානය භාර ආඥාපති, රියර් අද්මිරාල් සුමිත් විරසිංහ හමුවූ අතර, එහිදී ඔවුන් ‍අන්‍යෝන්‍ය වශයෙන් වැදගත් කරුණු කිහිපයක් පිළිබඳව සුහද පිළිසඳරක නිරත විය.

සිව් දින පුහුණු සංචාරයක් සඳහා පැමිණි ‘ඇන්කරේජ්’ නෞකාව, ශ්‍රි ලංකා නාවික මැරින් බළකාය සමඟ පුහුණු අභ්‍යාසයන් වල නිරිත විමට නියමිතව ඇත.

දිව‍යිනේ රැඳි සිටින කාල සීමාව තුළදී නැව් මුළුව ශ්‍රී ලංකාවේ වැදගත් ස්ථානයන්හි සංචාරය කිරීමට සහ ශ්‍රී ලංකා නාවික හමුදාව විසින් සංවිධානය කරනු ලබන වැඩසටහන් කිහිපයකට ද සහභාගී වීමට නියමිතව ඇති බවයි නාවික හමුදාව නිවේදනය කරන්නේ.

දිගින් මීටර් 208.5 ක් සහ පළලින් මීටර් 32 කින් යුත් ‘ඇන්කරේජ්’ නෞකාව ටොන් 25000 ක ධාරිතාවයකින් යුක්ත වන අතර, එය නිලධාරීන් සහ නාවිකයන් 600 දෙනෙකුගෙන් යුත් නැව් මුළුවකින් ද සමන්විතය. සංචාරය නිමා කිරීමෙන් අනතුරුව එළඹෙන අගෝස්තු 28 වන දින එම නෞකාව දිවයිනෙන් පිටත්වීමට නියමිතව ඇත.