ත්‍රිපුද්ගල විශේෂ මහාධිකරණ වලට එරෙහිව රාජපක්ෂවරු කෑගසන්නේ පසුගිය සමයේ සිදුවූ වංචා දූෂණ වලට සම්බන්ධ බව ඔවුන්ගේ හෘදය සාක්ෂිය දන්නා නිසා බවට කොළඹ දිස්ත්‍රික් එක්සත් ජාතික පක්ෂ පාර්ලිමේන්තුවරයෙකු කියා තිබේ.
“අපි දැන් ත්‍රිපුද්ගල මහාධිකරණ පිහිටුවා දිනපතා නඩු අසන්න කටයුතු කර තිබෙනවා. දැන් බැසිල් රාජපක්ෂ මහතා කියලා තිබෙනවා ඒ අය බලයට ආව දවසක මේ විශේෂ මහාධිකරණ අහෝසි කරනවා කියලා. ඇයි මේවාට බය වෙන්නේ? ඇයි හැංගෙන්නේ? ඇයි තමන්ගේ නඩු අහනකොට ඉහළ අධිකරණවලට ගිහින් ඒ නඩු අහන්න එපා කියලා නියෝග ඉල්ලන්නේ?” යි පාර්ලිමේන්තු මන්ත්‍රී මුජිබර් රහුමාන් 28 අඟහරුවාදා මාධ්‍ය හමුවක දී කියා සිටියේය.
තමන් පිරිසුදු නම් වංචා දූෂණ වලට සම්බන්ධ නැති නම් ඕනෑම උසාවියකට ගොස් බය නැතිව නඩුවලට මුහුණ දෙන්න පුළුවන් ශක්තියක් හා ආත්ම විශ්වාසයක් තිබිය යුතු බවයි මන්ත්‍රීවරයා පවසන්නේ.
රාජපක්ෂවරුන්ගේ හෘද සාක්ෂිය ඔවුන් සිදු කල වංචා දුෂණ පිළිබඳව දන්නා බව කී මන්ත්‍රීවරයා ඔවුන් ජනතාවගේ මුදල් අවභාවිත කල බවට චෝදනා කළේය.
කාගෙන් ගැලවුණත් තමන්ගේ හෘදය සාක්ෂියෙන් ගැලවෙන්න බෑ. හෘදය සාක්ෂියට මුහුණ දෙන්න බැරි නිසා තමයි ඒ අය කියන්නේ අපි ආවාම මේවා අහෝසි කරනවා කියන්නේ, එසේත් නැතිනම් මේ නඩු අහන්න එපා කියලා ඉහළ අධිකරණවලින් නියෝග ඉල්ලන්නේ මේ තිබෙන බය නිසයි.
හෘද සාක්ෂියට එකඟව ජනතාවගේ මුදල් අවභාවිත කර නැතිනම් හෝ වැරදි සිදු කර නැති නම් අධිකරණ ක්‍රියාවන්ට බිය විය යුතු නැති බවයි එක්සත් ජාතික පක්ෂ පාර්ලිමේන්තු මන්ත්‍රී මුජිබර් රහුමාන් වැඩි දුරටත් පෙන්වා දෙන්නේ.
Facebook Comments
