කාන්තා පෑඩ් මත පනවා ඇති බදු බර හෑල්ලු කිරීමට ඉල්ලීමක්

කාන්තා සනීපාරක්ෂක තුවා සඳහා පනවා ඇති බදු මුදල් සම්පුර්ණයෙන්ම අහෝසි කරන ලෙසට අපේ ශ්‍රී ලංකා සංවිධානය රජයට බල කර සිටී.

කාන්තා ජනගහනය තම ජිවිත කාලයේ දී අනිවාර්යෙන් අත්විඳින ආර්තවය හෙවත් මාසික ඔසප් වීමෙන් මුදල් උපයන රටක පුරවැසියෙක් වීම ලැජ්ජාවක් බව එම සංවිධානයේ සභාපති විමුක්ති දුෂාන්ත 18 අඟහරුවාදා කොළඹ දී මාධ්‍ය වෙත කියා සිටියේය.

“මේ රටේ කාන්තාවන්ට 25% ක දේශපාලන සහභාගිත්වය තහවුරු කිරීම වගේ කාරණා ගැන තිබෙන උනන්දුව මේ වගේ සංවේදී ඒ වගේ ලෝකයේ බොහෝ රටවල අවධානය යොමු වුණ ප්‍රශ්නයක් ගැන අපේ රටේ මාධ්‍ය හෝ බලධාරීන් සංවේදී නොවීම ලැජ්ජාවට කාරණාවක් ලෙසයි මම දකින්නේ,” යි සභාපතිවරයා ප්‍රකාශ කළේය.

වැට්, සෙස් රේගු බදු, සහ ජාතිය ගොඩනැඟීමේ බද්දත් සනීපාරක්ෂක තුවා සහ ඒ ආශ්‍රිත නිෂ්පාදනයන්ට පනවා ඇති බව පෙන්වා දෙන අපේ හ්‍රී ලංකා සංවිධානය සීයයට 100% කටත් වැඩි මුදලක් රජය උපයන බවයි පෙන්වා දෙන්නේ.

එක්සත් ජාතීන්ගේ සහ වෙනත් වාර්තා අනුව සනීපාරක්ෂක තුවා භාවිතා කරන්නේ කාන්තාවන්ගෙන් 30%කට පමණ ආසන්න ප්‍රමාණයක් බව කී විමුක්ති දුෂාන්ත එය රටේ විශාල සෞඛ්‍ය ගැටලුවක් බව අවධාරණය කළේය.

ඉන්දීයාව පවා සනීපාරක්ෂක තුවා සඳහා පනවා තිබු 12% බදු මුදල් ඉවත් කල බව පෙන්වා දුන් අපේ ශ්‍රී ලංකා සංවිධානයේ සභාපති විමුක්ති දුෂාන්ත මුදල් අමාත්‍ය මංගල සමරවීර ද බදු ඉවත් කරනු ඇති බවට විශ්වාසය පළ කර සිටියේය.

අපේ ශ්‍රී ලංකා ජාතික ව්‍යාපාරයේ සම්බන්ධීකරණයෙන් පැවති මාධ්‍ය හමුවට කාන්තා ක්‍රියාකාරීනී, පාඨශාලා ආචාරිනී ඩයනා හෙට්ටිආරච්චි, Sex Edu.lk සහ Sex Faculty ලිපි මාලාවේ සංස්කාරක රවිදු ප්‍රනාන්දු සහභාගී වී සිටියහ.