මෛත්‍රී – රනිල් ආණ්ඩුව යටතේ අවුරුදු දෙකට පැහැරගැනීම් පනහක් – JDS

0
699
Ivory Agency Sri Lanka
HailHost
wedding people

යහපාලනය යටතේ ගතවු වසර දෙකක කාලයක් තුල පැහැරගැනීම් පනහකට වැඩි ප්‍රමාණයක් සම්බන්ධයෙන් වාර්තා පලවී ඇතැයි ප්‍රජාතන්ත්‍රවාදය සඳහා මාධ්‍යවේදියෝ (JDS)පවසයි.

සෑම මාසයකම පාහේ අඩුම තරමින් දෙදෙනකු පැහැර ගෙන ගොස් තිබෙන බව පවසන JDS සංවිධානය තම වාර්තාව සකස් කිරීමට පසුගිය 26 මාසයක කාලය තුල විවිධ මාධ්‍ය වල පළවූ තොරතුරු උපයෝගී කර ගෙන ඇත.

“තිත්ත ඇත්ත: නොකියවූ පත්තර” නමින් නිකුත් කර ඇති වාර්තාවේ සඳහන් තොරතුරුවල දැක්වෙන පරිදි නඩු නැති ඝාතන, ලිංගික දුෂණ, පැහැරගැනීම්, අතුරුදහන් කිරීම් සහ වධබන්ධන තවමත් නැවතී නැත.

එම වාර්තාවට අනුව අපරාධ වලට ගොදුරු වූ සාතිශය බහුතරය දෙමළ වන අතර චුදිතයන් රජයේ ආරක්ෂක අංශ සාමාජිකයන්ය.

තොරතුරු පළවූ ප්‍රකාශන වල මූලාශ්‍ර සහිතව පළ කර ඇති පිටු 19ක වාර්තාවේ එන සෑම තොරතුරක්ම තහවුරු කරගැනීමේ හැකියාවක් නොලද බව JDS පවසයි.

කෙසේ වෙතත් තවමත් සිදුවන මානව හිමිකම් උල්ලංඝන සම්බන්ධයෙන් ප්‍රධාන මාධ්‍ය ධාරාවේ හෝ මානව හිමිකම් ක්ෂේත්‍රයේ හෝ ප්‍රමාණවත් අවධානයක් යොමු නොවීම ගැන එම සංවිධානය කණගාටුව පළ කරයි.

තමන් විසින් ප්‍රසිද්ධියට පත් කර ඇති වාර්තාවේ එන සිදුවීම් සම්බන්ධයෙන් විමර්ශන සිදු කිරීම අත්‍යාවශ්‍ය බව පෙන්වා දෙන JDS එහි ඇති හෝ මෙතෙක් පල වී නැති තොරතුරු සම්බන්ධ වැඩිදුර විස්තර වේ නම්, [email protected] වෙත ඊ මේල් මගින් දැනුම් දෙන ලෙස ඉල්ලා සිටී.

Facebook Comments

HailHost