යහපාලන රජයේ හැසිරීම පෙර පැවති ආණ්ඩුවට වඩා බොහෝ යහපත් වුවද බොහෝ උත්සාහයන් නොගෙන කළ හැකි දේශපාලන ප්‍රතිසංස්කරණ වලට පවා අනවශ්‍ය ප්‍රමාදයක් දක්වන බවට විපක්ෂ නායක බලවත් ජාත්‍යන්තර රාජ්‍ය නියෝජිතයකු හමුවේ කණස්සල්ල පල කර තිබේ.
එක්සත් ජාතීන්ගේ මානව හිමිකම් කවුන්සිලය සමඟ හවුලේ ගිවිස ගත් දෑ ඉටු කිරීමට ලබා දුන් අමතර වසර දෙකක කාලය තුල පවා රජය එම යෝජනා ක්‍රියාත්මක කිරීම ඉතා මන්දගාමී බව දෙමළ ජාතික සන්ධානයේ නායකයා පවසා ඇත්තේ ආසියානු සහ ශාන්තිකර කලාපය භාර බ්‍රිතාන්‍ය රාජ්‍ය අමාත්‍ය මාක් ෆීල්ඩ් කොළඹදී හමුවූ අවස්ථාවේය.
යුද්ධය නිමාවී දශකයකට ආසන්න කාලයක් ගතව ඇතත් රජයේ ආරක්ෂක අංශ සතුව ඇති දෙමළ ජනයාගේ ඉඩම් සහ ත්‍රස්තවාදය වැළැක්වීමේ පනත යටතේ රඳවා ඇති දේශපාලන සිරකරුවන් නිදහස් කිරිමේ අවශ්‍යතාවය ද ආර්. සම්බන්ධන් බ්‍රිතාන්‍ය රාජ්‍ය නියෝජිතයා හට පෙන්වා දී ඇත.
දිගු කලක් ගතවී අතුරුදහන් වුවන් සොයා බැලීමට කොමිසමක් පත් ක සත්‍ය කොමිසම මෙතෙක් පත් කර නොමැති බව පෙන්වා දී ඇති විපක්ෂ නායකවරයා සත්‍ය සොයා ගැනීමට හා යුක්තිය ඉටු කරවා ගැනීමට සත්‍ය කොමිසමේ ඇති අවශ්‍යතාවය අවධාරණය කර තිබේ.
දෙමළ ජනතාව අපේක්ෂා කරන බලය විමධ්‍යගත කිරීම ඇතුලත් වන ජාතික ප්‍රශ්නයට දේශපාලන විසඳුම් ලැබෙන ආකාරයෙන් ශ්රී ලංකාවට නව ව්‍යවස්ථාවක් සම්පාදනය කිරීම ප්‍රමාද නොකළ යුතු බව ආර්. සම්බන්ධන් සඳහන් කළේය.
එක්සත් නොබෙදුනු සහ නොබෙදිය හැකි රටක් තුල විසඳුමක් අවශ්‍ය බව කී විපක්ෂ නායක සෑම මැතිවරණයක දීම දෙමළ ජනයා එ් සඳහා වරම ලබා දී ඇති බව ද සිහිපත් කරනු ලැබීය.
“ආත්ම ගෞරවයෙන් හා අභිමානයෙන් රටේ ජිවත් වීමට සහ ජනතාවගේ ප්‍රජාතන්ත්‍රවදී තීන්දුවක් ගැන තීරණය කිරීමට ජනතාවට බලය තිබිය යුතුයි,” යනුවෙන් විපක්ෂ නායකයා ප්‍රකාශ කළ බව දෙමළ ජාතික සන්ධානය නිකුත් කළ මාධ්‍ය නිවේදනයක සඳහන් වේ.
නව ව්‍යවස්ථාවක් හරහා දෙමළ ජනයාට විසඳුම් ලබා දීමට නායකයින් හට දේශපාලන අභිප්‍රායක් නොමැති බවට සාකච්ඡාවට එක්වු පාර්ලිමේන්තු මන්ත්‍රී එම්.ඒ. සුමන්දිරන් චෝදනා කර ඇත.
කෙසේ නමුත් ජනාධිපතිවරයා ඉදිරියේ විපක්ෂ නායක ඔහුගේ ක්‍රියා කලාපය මහත් ප්‍රශංසාවට ලක් කර තිබුණි.
ත්‍රිකුණාමලයේ පැවති “සිරිසර පිවිසුම” සංවර්ධන වැඩසටහනට එක් වෙමින් විපක්ෂ නායකවරයා නොබෙදුණු රටක සියලු ජනතාව සංවර්ධනයේ වරප‍්‍රසාද ලබමින් සාමයෙන් සහ සහයෝගයෙන් ජීවත්වන රටක් නිර්මාණය කළ හැකි රාජ්‍ය නායකත්වය අද ශ්රී ලංකාවට හිිමිව තිබෙන බව පැවසීය.
Facebook Comments
