ආරක්ෂා සහිතව උතුරු නැගෙනහිර නිදහසේ ජීවත්වීම සඳහා එල්ටීටීඊ සංවිධානයේ අවශ්‍යතාව මතුව ඇති බවට කරන ලද ප්‍රකාශයක් සම්බන්ධව අත්අඩංගුවට ගත් විජයකලා මහේෂ්වරන් මන්ත්‍රීවරිය ඇප මත නිදහස් කිරීමට අධිකරණය කටයුතු කර තිබේ.
සංවිධානාත්මක අපරාධ විමර්ශණ කොට්ඨාශය විසින් 08 සඳුදා අත්අඩංගුවට ගත් ඇය රුපියල් ලක්ෂ 5 ක ශරීර ඇපයක් මත මුදාහැරීමට කොළඹ ප්‍රධාන මහේස්ත්‍රාත් රංග දිසානායක නියෝග කළේය.
මන්ත්‍රීවරිය රිමාන්ඩ් බන්ධනාගාර ගත කරන ලෙසට සංවිධානාත්මක අපරාධ කොට්ඨාශය භාර නියෝජ්‍ය පොලිස්පති කමල් සිල්වා ඉල්ලා ඇතත් මහේස්ත්‍රාත්වරය එම ඉල්ලීම ප්‍රතික්ෂේප කර ඇත්තේ සැකකාරිය රිමාන්ඩ් භාරයට පත් කිරීම සඳහා සුවිශේෂ කරුණු කිසිවක් නොමැති නිසාවෙනි.
“අප ජීවතුන් අතර සිටීමට නම් අපට මහ මග නිදහසේ ඇවිදීමට නම් අපගේ දරුවන් පාසල් වෙත ගොස් නැවත නිවසට පැමිණිය යුතු විමට නම් උතුරු නැගෙනහිර පළාත්වල එල්ටීටීඊ පාලනයක් ඇතිවිය යුතුයි,” යනුවෙන් එවක ළමා හා කාන්තා කටයුතු පිළිබඳ රාජ්‍ය ඇමැතිනිය වු විජයකලා මහේෂ්වරන් යාපනයේ පැවති උත්සවයක් අමතමින් කියා තිබුණි.
එම ප්‍රකාශය හෙලා දකිමින් විමල් වීරවංශ සහ දයාසිරි ජයසේකර මන්ත්‍රීවරුන් කතානායකවරයාට දැඩි ලෙස කියා සිටියේ රාජ්‍ය අමාත්‍යවරිය පාර්ලිමේන්තුවෙන් පලවා හරින ලෙසයි.
කෙසේ වෙතත් එම සිදුවීමෙන් පසුව අගමැති රනිල් වික්‍රමසිංහ සමඟ සාකච්ඡාවකින් පසුව ඇය සිය ඇමැති ධුරයෙන් ඉල්ලා අස්වූවා ය.
නඩුවේ වැඩිදුර විභාගය ලබන දෙසැම්බර් 7 වැනිදා සිදුකිරීමට නියමිතයි.
Facebook Comments
