සභාපති ධුරයේ කටයුතු වාරණය කරමින් GMOA පාදෙණියට අතුරු තහනමක්

0

වියත් මග ක්‍රියාධාරී වෛද්‍ය අනුරුද්ධ පාදෙණිය රජයේ වෛද්‍ය නිලධාරීන්ගේ සංගමයේ සභාපති ධුරයේ කටයුතු කිරීම වලක්වාලමින් උසාවි නියෝගයක් පනවා තිබේ.

මොරටුව දිසා අධිකරණය මගින් මෙම අතුරු තහනම් නියෝගය පනවා ඇත්තේ එම සංගමයේ සාමාජික වෛද්‍ය ජයරුවන් බණ්ඩාර යොමු කළ පැමිණිල්ලක් ඊයේ [22]විභාගයට ගත් අවස්ථාවේදීය.

වෛද්‍ය ජයරුවන් බණ්ඩාර සිය පැමිණිල්ල මගින් ඉල්ලා ඇත්තේ සංගමයේ සභාපති වරයා ඇතුළු සෙසු නිලධාරින් 19 දෙනාම විත්තිකරුවන් කරමින් ඔවුන්ගේ කටයුතු අත්හිටුවන ලෙසය.

පසුගිය වසර පහක කාලයක් තිස්සේ රජයේ වෛද්‍ය නිලධාරීන්ගේ සංගමයේ (GMOA) තනතුරු දරමින් සිටි අනුරුද්ධ පාදෙණිය ඇතුළු විත්තිකරුවන් මෙතෙක් නව නිලධාරි මණ්ඩලයක් පත් කර ගැනීමට අසමත්ව ඇතැයි පවසන ජයරුවන් බණ්ඩාර සිය පැමිණිල්ලේ වැඩි දුරටත් සඳහන් කර ඇත්තේ රජයේ වෛද්‍ය නිලධාරීන්ගේ සංගමය මෙවර කැඳවා තිබූ නිලවරණයද සෞඛ්‍ය හේතුමත යැයි පවසමින් කල් දමා පාදෙණිය ඇතුළු පිරිස බලහත්කාරයෙන් සිය තනතුරු හොබවන බවය.

අදාළ පැමිණිල්ල සළකා බලමින් මොරටුව දිසා විනිසුරු දමින්ද රාමනායක වැලිගොඩපිටිය නිකුත් කළ නියෝගය මගින් රජයේ වෛද්‍ය නිලධාරීන්ගේ සංගමයේ විධායක සභාවේ නිලවරණයේ කටයුතු අත්හිටුවීම, අතුරු කමිටුවක් පත් කිරීමෙන් තොරව නිලවරණයක් නොපැවැත්වීම, අනුරුද්ධ පාදෙණිය පාර්ශව විසින් නාම යෝජනා ප්‍රතික්ෂේප කරනු ලැබූ ජයරුවන් බණ්ඩාරගේ නාමයෝජනා නැවත පිළිගැනීම, නිලවරණ කාර්ය පාටියකින් බැහැරව නිලවරණයක් නොපැවැත්වීම සඳහා නියෝග පනවා තිබේ.

දින 14 ක කාලයකට මෙම වාරණය බලාත්මක වේ.

මෙවර රජයේ වෛද්‍ය නිලධාරීන්ගේ සංගමයේ නිලවරණය සඳහා වෛද්‍ය ජයරුවන් බණ්ඩාර සභාපතිධුරයට ඉදිරිපත් වී සිටි අතර, ඔහුගේ පාර්ශවයෙන් ලේකම් ධුරයට වෛද්‍ය ප්‍රියන්ත ප්‍රනාන්දුත්, උප සභාපති තනතුරට වෛද්‍ය චමල් සංජීවත් ඉදිරිපත් වී තිබිණි.

නමුත් ජයරුවන් බණ්ඩාරගේ නාමයෝජනාව ප්‍රතික්ෂේප විය.

Facebook Comments

wedding people