අන්තර් විශ්ව විද්‍යාල ශිෂ්‍ය සංගමයේ ක්‍රියාකාරික, රුහුණු මහා ශිෂ්‍ය සංගමයේ හිටපු සභාපති ඇන්තනි වෙරංග පුෂ්පික පැහැර ගැනීමට ලක්ව ඇති බව වාර්තා වේ.
කොළඹ පැවති විරෝධතාවයකට පැමිණ පෙරළා යමින් සිටි සිසු නායකයා සිවිල් හැඳගත් පුද්ගලයන් පිරිසක් විසින් බසයකින් බලහත්කාරයෙන් බස්සවා පැහැරගෙන ගොස් තිබේ.
“වෘත්තීය සමිති හා බහුජන සංවිධාන එකමුතුව කැඳවූ උද්ඝෝෂණයකට සහභාගීව පෙරළා යමින් සිටි රුහුණු සරසවි සිසුවකු හා අවිශිබම ක්‍රියාකාරිකයකු වන වෙරංග පුෂ්පික, සුළු මොහොතකට පෙර සිවිල් හැඳගත් පුද්ගලයන් විසින් කොටුව දුම්රියපොළ ඉදිරිපිට බසයකින් බලහත්කාරයෙන් බස්සවා පැහැරගෙන ගොස් තිබේ.” යැයි ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සංවිධානය වාර්තා කරයි.
මෙම පැහැර ගැනීම සම්බන්ධයෙන් ඇසින් දුටුවන් සමාජ මාධ්‍ය ජාලවන්හී පළකර ඇත්තේ සිවිල් පිරිසක් විසින් GC-0342 දරණ නිල් පැහැති ජීප් රථයෙන් පැමිණ පැහැරගෙන ගොස් ඇති බවයි.
ඇන්තනී වෙරංග අනිද්දා පුවත්පතේ කර්තෘ මණ්ඩලයේ සාමාජිකයකු ලෙස ද කටයුතු කර ඇති අතර මේ වන විට ඔහු නිදහස් මාධ්‍යවේදියෙකු ලෙස කටයුතු කරමින් සිටී.
Facebook Comments
