රජයේ හමුදා විසින් බලහත්කාරයෙන් අතුරුදහන් කරන ලද හා ඔවුන්ට බාර වූ තම සමීපතමයන් උගන්ඩාවේ පිහිටි රාජපක්ෂ පවුලට අයත් බවට විශ්වාස කෙරෙන කර්මාන්ත ශාලාවල වහල් සේවයේ යොදවා සිටින බවට අතුරුදහන් කළවුන්ගේ ඥාතීන් සැක මතු කොට තිබේ.
“රාජපක්ෂ පවුලට අයිති උගන්ඩාවේ තියෙන කර්මාන්ත ශාලා 11 ක අපේ දරුවන්ව පඩි ගෙවන්නේ නැතිව කම්කරුවන් විදිහට වැඩට යොදලා ඇති කියලා අපි විශ්වාස කරනවා.”
බාරදීලා අතුරුදහන් කරපු අපේ දරුවන්ට මොකද වුණේ කියලා කියන්න බැරි අය අපේ දරුවන්ව කුලී කාරයෝ විදිහට තියා ගෙන ඇති. ඒ කර්මාන්ත ශාලා කළමනාකරණය කරන වේලුපිල්ලේ කනනාදන් කියලා දෙමළ කෙනෙක් ඉන්නවා,“යැයි උතුරු – නැගෙනහිර පළාතේ බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ නායිකා යෝගරාසා කලෙයිරංජනී පවසයි.
මේ වසර මුලදී මහින්ද රාජපක්ෂ ඇතුළු පවුලේ සාමාජිකයන්ට තිරුපති වන්දනාවේ යාමට පෞද්ගලික ජෙට් යානයක් ලබා දුන්නේ උගන්ඩාවේ කෝටිපති ව්‍යාපාරික සහ කෙන්යාවේ ශ්‍රී ලංකා මහකොමසාරිස් වේලුපිල්ලේ කනනාදන් බවට විශ්වාස කෙරේ.
කිලිනොච්චියේදී වන්නි මාධ්‍යවේදීන් ඇමතූ කලෙයිරංජනී මාතාව කියා සිටින්නේ විදෙස් ගතව සිටින දෙමළ ප්‍රජාව එක්ව සිය දරුවන් උගන්ඩාවේ සිටීද යන්න සැක හැර දැන ගැනීමට සහාය ලබා දිය යුතු බවයි.
“ඇත්තෙන්ම අපේ දරුවන් මැරුවේ නැහැ. ඔවුන් සියලු දෙනාම මේ රාජපක්ෂ පවුලේ වහලුන් ලෙස ජීවත් වේ යැයි අපට සැකයක් තියෙනවා. අපි අවුරුදු 13ක් තිස්සේ අපේ ඥාතින්ව හොයනවා. අපේ දරුවන්ට වෙච්ච දේ මේ ආණ්ඩුව අපිට කියයි කියලා විශ්වාස කරන්නේ නැහැ. මේ ආණ්ඩු වෙනසින් අපිට නම් ලොකු දෙයක් වෙන්නේ නැහැ.“
ඇය ජාත්‍යන්තර ප්‍රජාවෙන් ඉල්ලා සිටින්නේ ලංකාව ගැන සොයා බලා දෙමළ ජනතාවට දේශපාලන විසඳුමක් සහ බලහත්කාරයෙන් අතුරුදහන් කළවුන්ගේ ඥාතීන්ට යුක්තිය ඉටු කරන ලෙසයි.
ලොව පුරා වෙසෙන දෙමළ ජනතාව එක්සත් වී, අතුරුදහන් කළවුන්ට යුක්තිය පතා ගෙන යන අරගලයට හා දේශපාලන විසදුමක් වෙනුවෙන් වූ සටනට අවශ්‍ය සහාය සහ නායකත්වය ලබා දෙන ලෙස ද ඇය ඉල්ලා සිටින්නීය.
“පළවා හැරුණු රාජපක්ෂ පවුල අනාථයන් ලෙස පාරවල් වල ඇවිදින මේ මොහොතේ ජන ඝාතකයා අත්අඩංගුවට ගැනීමට ජාත්‍යන්තරය ඉදිරිපත් විය යුතුයි. ගෝඨාභය රාජපක්ෂව අත්අඩංගුවට ගෙන සාධාරණය ඉටු කරනු ඇතැයි අපි බලාපොරොත්තු වෙනවා.“
මේ වනවිට සිංගප්පුරුවේ සිටින හිටපු ජනාධිපති ගෝඨාභය රාජපක්ෂ අත් අඩංගුවට ගන්නා ලෙස බලකෙරෙන උද්ඝෝෂණ එරටත්, මැලේසියාව, ඇමරිකාව, බ්‍රිතාන්‍යය හා ප්‍රංශය ඇතුළු රටවල් ගණනාවක පවත්වා තිබේ.
ජාත්‍යන්තර මානව හිමිකම් නීතිවේදිනී යැස්මින් සූකාගේ ප්‍රධානත්වයෙන් යුත් සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) හිටපු ජනපතිට එරෙහිව සිංගප්පුරු නීතිපති හමුවේ පැමිණිල්ලක් ගොනු කර තිබේ.
Facebook Comments
