බලහත්කාර අතුරුදහන් කරවීම් වලට එරෙහි ජාත්‍යන්තර දින සැමරුමට කල ආරාධනයට ජනාධිපතිවරයා සහභාගි නොවන බව දැනුම් දී ඇතැයි අතුරුදහන්වුවන්ගේ අයිතීන් වෙනුවෙන් පෙනී සිටින මානව හිමිකම් ක්‍රියාධාරයෙකු පවසයි.
ඒ සම්බන්ධයන් අගමැතිවරයාට කරන ලද ආරාධනයට ද මෙතෙක් පිලිතුරුක් දී නොමැති බවට අතුරුදහන්වුවන්ගේ පවුල් එකතුව චෝදනා කරයි.
සැමරුමට පැමිණ අතුරුදහන් කරවීම් සම්බන්ධව අණ්ඩුවේ ස්ථාවරය කුමක්ද යන්න ජනපති හා අගමැති විසින් අතුරුදහන් වුවන්ගේ ඥාතින් වෙත හෙළි කල යුතු බවයි එම සංවිධානයේ සභාපති බ්‍රිටෝ ප්‍රනාන්දු අවධාරණය කරන්නේ.
අතුරුදහන් කරවීම් වලට එරෙහි ජාත්‍යන්තර දිනය වෙනුවෙන් අතුරුදහන් වුවන්ගේ පවුල් එකතුව 30 වන බදාදා සැමරුමක් සංවිධානය කර ඇති අතර අතුරුදහන් වුවන් පිළිබඳව කාර්යාලය පිහිටුවන ලෙස බල කරමින් ජනාධිපති ලේකම් කාර්යාලය ඉදිරිපිට පැවැත්වෙන සත්‍යග්‍රහයකින් අනතුරුව කොළඹ විහාර මහාදේවී එලිමහන් රංග පීඨයේදී සිහිකිරිමක් සිදුවන බව එම සංවිධානය පවසයි.
හමුදාපතිවරු
ප්‍රථම වතාවට වත්මන් යුද හමුදාපතිවරයා සහ නාවික හමුදාපතිවරයා “රණවිරුන්ට මිනීමරුවන් වෙන්න බැහැ මිනීමරුවන්ට රණවිරුවන් වෙන්න බැහැ” යි කී බව සිහි කල අතුරුදහන් වුවන්ගේ පවුල් එකතුවේ සභාපතිවරයා “රණවිරුවන්ට නීති දෙකකට යටත් වෙන්න ඕන හමුදා නීතියට හා රටේ නීතියට ඒ නීති දෙකට යටත්ව වැඩ කරන්න වෙනව ඒ නීති වලට පිටින් වැඩ කරල තියෙනවනම් මොන රණවිරුවට වුනත් රට බේරගන්න හැදුවත් ඔහුට දඬුවම් ලැබිය යුතුයි” යැයි හමුදාපතිවරුන් කල ප්‍රකාශය අගය කළේය.
මහින්ද රාජපක්ෂ විසින් රණවිරුවන් බිල්ලට දෙන්න යන බවට කරන ප්‍රකාශ මත ජනාධිපතිවරයා සහ යහපාලන රජයට ඇතිව තිබෙන බියට මෙම ප්‍රකාශ පිළිතුරුක් බව බ්‍රිටෝ ප්‍රනාන්දු පෙන්වා දෙයි.
හමුදාපතිවරුන් වැරදි කල වුවන්ට දඬුවම් දිය යුතු බවට ප්‍රකාශ කර තිබියදීත් යහපාලන රජය යුක්තිය ඉටු කිරීමට පස්ස ගහන්නේ ඇයි දැයි අතුරුදහන්වුවන්ගේ පවුල් එකතුවේ සභාපතිවරයා ආණ්ඩුවෙන් ප්‍රශ්න කර සිටී.
Facebook Comments
