මානව හිමිකම් නීතිඥවරියට දිගටම මරණ තර්ජන

මරණ තර්ජනයක් ගැන වසරකට ඉහතදී කරන ලද පැමිණිල්ලක් සම්බන්ධයෙන් අපරාධ පරීක්ෂණ දෙපාර්තමේන්තුව කිසිදු නීතිමය පියවරක් ගෙන නොමැති බව ශ්‍රේෂ්ඨාධිකරණ නීතිඥවරියක විසින් හෙලි කර තිබේ.

සමාජ මාධ්‍ය ඔස්සේ එල්ල වන මරණ තර්ජන පිළිබදව දෙවැනි වරටත් අපරාධ පරීක්ෂණ දෙපාර්තමේතුවට කරන පැමිණිල්ලකින් නීතිඥ අචලා ශානිකා සෙනවිරත්න දන්වා ඇත්තේ වසරකට ඉහතදී සිදු කළ පැමිණිල්ල සම්බන්ධයෙන්ද මේ තාක් යුක්තිය ඉටු වී නොමැති බවයි.

“2019.04.28 දින පාස්කු ප්‍රහාරය සිදුවු කාල වකවානුව තුළ මේ ආකාරයෙන්ම ලංකාව තුළ කැළඹිලි සහගත තත්වයක් පැවැති අවස්ථාවකදී මගේ ජායාරූප භාවිත කරමින් මේ ආකාරයෙන්ම මාහට අපහාසාත්මක හා මරණීය තර්ජන සිදු කරමින් මාහට එරෙ හිව මහජන කැලඹීමක් ඇති වන පරිදි සමාජ ජාලා භාවිතා කරමින් සිදු කරන ලද අපරාධය සම්බන්ධයෙන් 2019.04.30 වන දින අපරාධ පරීක්ෂණ දෙපාර්තමේන්තුවට C 192/19CD යටතේ කරන ලද පැමිණිල්ල සම්බන්ධයෙන් මේ වන තෙක් කිසිදු පියවරක් ගෙන ඇති බවක් හෝ නඩු පැවරීමක් හෝ නීතිය ක්‍රියාත්මක වීමක් සිදුවී නොමැති බව කණගාටුවෙන් වුවද ප්‍රකාශ කර සිටිමි,” අපරාධ පරීක්ෂණ දෙපාර්තමේන්තුවේ පරිගණක අපරාධ අංශයේ අධ්‍යක්ෂ වෙත ලිඛිතව දැනුම් දී තිබේ.

නීතිඥ අචලා සෙනවිරත්න විසින් අපරාධ පරීක්ෂණ දෙපාර්තමේන්තුව වෙත භාර දෙන ලද පැමිනිලි පිටපතේද සදහන්ව ඇති පරිදි ඇය විසින් මනුෂ්‍ය ඝාතන හා අතුරුදහන් කිරීමවලට අදාලව නඩු වල වින්දිත පාර්ශවය වෙනුවෙන් පෙනී සිට ඇති අතර එම නඩු වල බහුතරයක සැකකරුවන් බවට පත්ව ඇත්තේ ආරක්ෂක සේවාවන්ට අදාල පුද්ගලයන්ය.

එමෙන්ම එම නඩු බොහෝමයක පැමිණිල්ල මෙහෙයවා ඇත්තේ අපරාධ පරීක්ෂණ දෙපාර්තමේන්තුව විසිනි.

” නාවික හමුදා පිරිසක් විසින් තරුණයන් 11 දෙනකු පැහැරගෙන ගොස් අතුරුදහන් කිරීමට අදාල නඩු කරය, මුතොටමුල්ල කුණු කන්දේ තරුණයකු පැහැරගෙන ගොස් ඝාතනය කිරීමට අදාල නඩු කරය, කොටහේන ප්‍රදේශයේ පුද්ගලයන් දෙදෙනෙකු අතුරුදහන් කිරීමට අදාල නඩුකරය, වැලිකඩ සිරකරුවන් ඝාතනය කිරීමට අදාල නඩුකරය, හිටපු ත්‍රිවිධ හමුදා මාණ්ඩලික ප්‍රධානී රවීන්ද්‍ර විජේගුණරත්න නඩුකරය, අධිකරණයට අපහාස කිරීම හා සාක්ෂිකරුවන්ට බලපෑම් කිරීමට අදාල නීතිඥ මේජර් අජිත් ප්‍රසන්න ඇතුලු සැකකරුවන් පස් දෙනෙකුට අදාල නඩුකරය, ආදී නඩුකරයන්ගේ අගතියට පත් පාර්ශවය වෙනුවෙන් නීතිඥයකු ලෙස පෙනී සිටිමි.”

සැකකරුවන් දිගටම වැඩ

නීතිඥ අචලා සෙනවිරත්න සිය නව පැමිණිල්ල මගින් පෙන්වා දී ඇත්තේ තමාට සාධාරණයක් ඉටු නොවුවත් තමන්ගේ පුර්ව පැමිණිල්ලට අදාල සැකකරුවන් විසින් එකී සමාජ ජාලාවම භාවිත කරමින් තමා වෙත දිගින් දිගටම මරණ තර්ජන සිදු කිරීම පමණක් තවමත් සිදු වෙමින් පවතින බවයි.

“තවද අද දින ඉදිරිපත් කරනු ලබන මෙකී නව පැමිණිල්ලට අදාල සිදුවීමේදීද ඉහත පුර්ව පැමිණිල්ල සදහා සැකකරු වන පුද්ගලයා විසින්ද එකී මුහුණු පොතම භාවිත කරමින් නැවතත් මරණ තර්ජන සිදු කර තිබීමෙන් රටේ පුරවැසියා විසින් විශ්වාස කළ යුතු මෙන්ම ගරු කරනු ලබන නීතිය ක්‍රියාත්මක වීම සම්බන්ධව මා අතිශය කනගාටු වෙමි.”

අපරාධ පරීක්ෂණ දෙපාර්තමේන්තුවේ, පරිගණක අපරාධ අංශයේ අධ්‍යක්ෂ වෙත ” වෘත්තීමය ජීවිතයට බලපාන අයුරින් සහ ජීවිතයට මරණ තර්ජන සිදු කරමින් සමාජ ජාලා භාවිතා කරමින් සිදු අපරාධයක් සම්බන්ධයෙන් වන පැමිණිල්ල ” මැයෙන් මැයි 22 දින නීතිඥ අචලා ශානිකා සෙනවිරත්න සිදු කරනු ලබන වන පැමිණිල්ල මගින් අවධාරණය කර ඇත්තේ මේ වසරේ මාර්තු මාසයේ සිට තම මුහුණු පොතේ ඇති වෘත්තීමය නිල ඇදුම සහිත ඡායාරූප භාවිත කරමින් ජනතාව අතර තමන් කෙරෙහි ද්වේශය ඇති වන අයුරින් කටයුතු කර ඇති බවයි.

” වර්ෂ 2020.03.27 වන දින සිට මේ දක්වා මාගේ මුහුණු පොතෙහි මා සතුව පවතින මාගේ වෘත්තිමය නිල ඇදුම සහිත ඡායාරූප උපුටා ලබා ගනිමින් එකී වෘත්තිය නිල ඇදුම සහිත මගේ ඡායාරූප විකෘති කරමින් හා එකී ඡායාරූප මත අසභ්‍ය සහ අසත්‍ය වචන ලේඛනය කරමින් ඒවා ද්වේශ සහගත ලෙස ප්‍රතිනිර්මාණය කරමින් සහ මා සම්බන්ධයෙන් අසභ්‍ය හා ද්වේශ සහගත ලෙස කරුණු දක්වමින් මහජනතාව අතර මා සම්බන්ධයෙන් ද්වේශසහගත කැලඹීමක් ඇති වන පරිදි හා එමගින් මා හට මරණ තර්ජන ඇති කරමින්ද මාගේ වෘත්තිමය ජීවිතවට බලපාන පරිදි විවිධ ප්‍රකාශ සහිතව එකී ඡායාරූප භාවිත කරමින් දැන්වීම් සහක් කොට සමාජ ජාල හරහා විශාල ප්‍රමාණයකින් හුවමාරු කිරීමට මේ වන තෙක් සංවිධානාත්මකව සිදු කරගෙන යමින් පවති. ”

නීතිඥ වෘත්තියේ වසර 13 ක අත්දැකීම් සහිත අචලා ශානිකා සෙනවිරත්න සිය පැමිණිල්ල මගින් වැඩි දුරටත් අවධාරණය කර ඇත්තේ තමා විසින් වෘත්තිමය ලෙසින් පෙනී සිටින නඩුකර සම්බන්ධයෙන් තමාගේ පෙනී සිටීම වැලැක්වීම සදහා බිය වැද්දීම සහ තර්ජනය කිරීම මගින් බලපෑම් කිරීමටද කරන ලද සංවිධානාත්මක ක්‍රියාවලියක් බවට විශ්වාස කරන බවයි.

සිය පැමිණිල්ල මගින් නීතිඥ අචලා සෙනවිරත්න අපරාධ පරීක්ෂණ දෙපාර්තමේන්තුවෙන් ඉල්ලා සිටින්නේ තමාගේ මුලික මිනිස් අයිතිවාසිකම් උල්ලංඝනය කරමින් සමාජ මාධ්‍ය ඔස්සේ සිදු කෙරෙන අකටයුතුදායක, නීති විරෝධි සිදුවීම සම්බන්ධයෙන් වහාම පරීක්ෂණයක් සිදු කර අදාල සැකකරුවන්ට එරෙහිව නීතිය ක්‍රියාත්මක කරන ලෙසයි.