දෙමළ පත්තරයක කතුවැකියක් නිසා කර්තෘට පොලිසියෙන් ප්‍රශ්න

ජනාධිපතිගේ උතුරේ නියෝජිතයාගේ ක්‍රියාකලාපය සම්බන්ධයෙන් පළ කළ කතු වැකියක් නිසා ප්‍රදේශයේ ප්‍රමුඛ පෙලේ දෙමළ පුවත්පතක ප්‍රධාන කතුවරයාට පුරා පැය දෙක හමාරක කාලයක් පොලීසියට කටඋත්තර දීමට සිදුව තිබේ.

යාපනයේ පොලිස්ථානයේ දී අප්‍රේල් 22 වැනිදා ප්‍රකාශ ලබා දුන් උතුරේ දෛනිකව පළ කෙරෙන පුවත්පතක් වන වලම්පුරි පුවත්පතේ ප්‍රධාන කර්තෘ නල්ලයියා විජයසුන්දරම් පෙන්වා දෙන්නේ තමාගෙන් මෙලෙස ප්‍රශ්න කිරීම අදහස් ප්‍රකාශ කිරීමේ නිදහස උල්ලංඝනය කිරීමක් ලෙසිනි.

“උතුරු පළාත් ආණ්ඩුකාරයාට හදිසි ලියුමක්” යන ශිර්ෂය යටතේ මාර්තු 18 වැනිදා වලම්පුරි පුවත්පතේ පළ කළ කතුවැකිය පී.එස්.එම්. චාල්ස් ආණ්ඩුකාරවරියගේ ක්‍රියාකාරකම්වලට සහ කීර්තිනාමයට බලපාන පරිදි ලියා ඇති බව සදහන් කරමින් ආණ්ඩුකාර කාර්යාලයේ ගණකාධිකාරි අන්නාමලේ කලෙයිචෙල්වන් විසින් පොලීසියට පැමිණිලි කර තිබේ.

මහාමාර්ග අනතුරු වැඩිවීම හෝ පොල් වගාවට කෘමින්ගෙන් සිදුවන හානිය හෝ වැලැක්වීම වැනි ජනතාවගේ එදිනෙදා ගැටළු වලට විසඳීම් ලබාදීමට වත් රනිල් වික්‍රමසිංහ ජනාධිපතිවරයා පත්කළ ආණ්ඩුකාරවරිය අසමත් වී ඇති බවට කතුවැකියෙන් චෝදනා කෙරේ.

“මොනවා කරන්නද කල වැරදුනු කලට කීවා සේ, උතුරේ ආණ්ඩුකාර ධුරයට දෙමළ අයකු සිටිය යුතුයයි ඉල්ලා අප විසින් කරගෙන ඇත්තේ අපේම ඔලුවට පස් හලා ගැනීමකි,” යි එහි සඳහන් වේ.

අප්‍රේල් 22 වැනිදා උදෑසන 10.00 සිට පස්වරු 12.30 දක්වා යාපනය පොලීසියට ප්‍රකාශ ලබාදුන් වාලම්පුරි ප්‍රධාන කර්තෘ නල්ලයියා විජයසුන්දරම් ප්‍රදේශයේ මාධ්‍යවේදීන් සමග පවසා ඇත්තේ පුවත්පතේ කතු වැකිය සම්බන්ධයෙන් පැමිණිලි කිරීමත්, ඒ සම්බන්ධයෙන් පොලීසියට කැදවා ප්‍රශ්න කිරීමත් අදහස් ප්‍රකාශ කිරීමේ නිදහස උල්ලංඝනය කිරීමක් බවට තමා පොලීසිය හමුවේ පැවසු බවයි.

“පත්තරේ ලියා ඇති කතුවැකිය ගැන පැමිණිලි කිරීම, මේ සම්බන්ධයෙන් කැඳවා ප්‍රශ්න කිරීම අදහස් ප්‍රකාශ කිරීමේ නිදහස උල්ලංඝනය කිරීමක් බව මම මගේ කටඋත්තරය දෙන වෙලාවේ කිව්වා. මේ කතුවැකිය ආණ්ඩුකාරවරයාගේ ක්‍රියාකාරකම්වලට සහ කීර්තිනාමයට බලපාන පරිදි ලියා ඇති බවට පැමිණිල්ලේ සඳහන් කරලා තියනවා. මේක එයාගේ කීර්ති නාමයට බලපෑවේ කොහොමද කියලා මම ඇහුවා.”

වාලම්පුරි ප්‍රධාන කර්තෘ නල්ලයියා විජයසුන්දරම් පවසන්නේ මෙවැනි පැමිණිලි මගින් තමන් අඩපන කිරීමෙන් සෙසු මාධ්‍යවේදීන්ද පසුබානු ඇතැයි යන සිතුවිල්ලෙන් ආණ්ඩුකාර කාර්යාලය කටයුතු කරන බවයි.

“ආණ්ඩුව සමග ගැටුමක් ඇති නොකර කොහොමද වැඩ කරගන්න තමයි මෙයාලට ඕන. ආණ්ඩුවට විරුද්ධව ක්‍රියා නොකර හැමදාම ඔය කාර්යාලය උදේට ඇරලා, හවසට වහලා දැම්මොත් මෙයාලට ඇති. ඒක තමයි දැනටත් මෙතන වෙන්නේ. ඒ අයට මාව අඩපන කළොත් අනිත් අය යටපත් වෙනවා කියන සිතුවිල්ල තමයි ඒ ගොල්ලෝ හිතන්නේ.”