පාස්කු ඉරිදා ප්‍රහාරයෙන් පසුව එල්ල කෙරුණ මුස්ලිම් විරෝධී ප්‍රහාර සම්බන්ධ සැකකරුවන් වෙනුවෙන් සිංහල බෞද්ධ පදනමකින් පෙනී සිටි මාරවිල නීතිඥ සංගමය ආචාර ධර්ම කඩකිරීම ගැන රජයේ ඉහලම ආයතනයක් පැමිණිල්ලක් ගොනු කර තිබේ.
මුස්ලිම් විරෝධි ආකාරයෙන් කටයුතු කළ නිතිඥවරු සම්බන්ධයෙන් සොයා බලන ලෙස මානව හිමිකම් කොමිසමේ සභාපතිනි ආචාර්ය දිපිකා උඩුගමගේ විසින් නීතිඥ සංගමයේ සභාපතිවරයාට ලිඛිත පැමිණිල්ලක් ඉදිරිපත් කරමින් ඉල්ලා ඇත.
මුස්ලිම් සැකකරුවන් වෙනුවෙන් පෙනී හිඳීම ප්‍රතික්ෂේප කිරීමේත්, තවත් පිරිසක් ජාතිවාදී ප්‍රචණ්ඩ ක්‍රියා සම්බන්ධයෙන් සැක කෙරෙන කණ්ඩායමකට ඇප නොදීමට එරෙහිව විරෝධතා පැවැත්වීමේත් “වෘත්තියට නොගැලපෙන, ආචාරධර්ම විරෝධී” චර්යාවක නිරත වී ඇති බව මානව හිමිකම් කොමිසම විසින් නීතිඥ සංගමයේ සභාපති කාලිංග ඉන්දතිස්සට ලිඛිතව පැමිණිලි කර ඇත.
“අප්‍රේල් 21 ප්‍රහාරයෙන් පසු ත්‍රස්තවාදය වැළක්වීමේ පනත අත් අඩංගුවට ගන්නා ලද මුස්ලිම් ජාතිකයන් හය දෙනකු වෙනුවෙන් පෙනී හිඳීම මාරවිල මහේස්ත්‍රාත් අධිකරණයට නිතිපතා සහභාගි වන නීතිඥයන් විසින් ප්‍රතික්ෂේප කිරීම එක අවස්ථාවක් ලෙස දැක්විය හැකියැ,” යි කොමිසමේ සභාපතිනි ආචාර්ය දීපිකා උඩගම විසින් යවන ලද ලිපියක සඳහන් වෙයි.
“ඇත්ත වශයෙන්ම, ඇප ඉල්ලා සිටීමේ සීමිත කටයුත්තට (මහේස්ත්‍රාත් අධිකරණයේ නීතිඥයකුගේ ඉතා සාමාන්‍ය රාජකාරිය) පෙනී හිඳීමට පිටතින් පැමිණි නීතිඥවරියක් එකඟ වූ අවස්ථාවේ, නිතිපතා එන නීතිඥයන් ඇයට බරපතල ලෙස එදිරිවාදිකම් පා තිබේ. ඉතිරි සැකකරුවන් දෙදෙනා (හතර දෙනකු නිදහස් කරන ලදී) වෙනුවෙන් පෙනී සිටින්නේ සාමාන්‍යයෙන් මාරවිල අධිකරණයේ රාජකාරි නොකරන නීතිඥවරුන් විසිනි.”
මීට පෙරද මුස්ලිම් විරෝධි ප්‍රචණ්ඩ ක්‍රියා සම්බන්ධව අත්අඩංගුවට ගත් සිංහල සැකකරුවන් වෙනුවෙන් කිසිදු ගැස්තු අය කිරීමකින් තොරව සිංහල බෞද්ධ පදනමකින් පෙනී සිටීමට මාරවිල නිතිඥ සංගමය තීන්දු කළ බව එහි සභාපති ලලන්ත සරත්චන්ද්‍ර ප්‍රසිද්ධියේ කියා තිබුනි.
ත්‍රස්තවාදය වැළක්වීමේ පනත හෝ හදිසි නීතිය යොදාගෙන අප්‍රේල් 21 දායින් පසු චෝදනාවට ලක්වූ කිහිප දෙනකුම වෙනුවෙන් පෙනී සිටීම ප්‍රදේශබද නීතිඥවරුන් විසින් ප්‍රතික්ෂේප කිරීම නිසා චුදිතයන්ට විශාල වියදමක් දරා පිටින් නීතිඥයන් ගෙන්වීමේ රටාවක් රටේ පළාත් කිහිපයකින්ම වාර්තාවී ඇති බව ආචාර්ය උඩගම පෙන්වා දෙයි.
පාස්කු ඉරුදින ප්‍රහාරය සම්බන්ධයෙන් අත් අඩංගුවට ගෙන සිටින සැකකරුවන් වෙනුවෙන් පෙනී නොසිටීමට කිසිදු ප්‍රාදේශීය නීතිඥ සංගමයක් නිල වශයෙන් තීන්දු කොට නැති බව ශ්‍රී ලංකා නීතිඥ සංගමයේ ලේකම් මානව හිමිකම් කොමිසමට දැනුම් දී තිබේ.
Facebook Comments
