එක්සත් ජාතික පෙරමුණේ ඉදිරි ජනාධිපතිවරණ අපේක්ෂකත්වය තීන්දු කිරීමේ බලය දේශපාලන පක්ෂ සහ සිවිල් සංවිධාන එක්ව නිර්මාණය කරන නව සන්ධානයට ලබා දීමට අගමැති රනිල් වික්‍රමසිංහ තීරණය කර තිබේ.
“ප්‍රජාතන්ත්‍රවාදී ජාතික පෙරමුණ” නමින් ගොඩනඟන නව සන්ධානයේ කටයුතු මේ වන විට අවසන්ව ඇති අතර ඒ අනුව එජාපයේ ජනාධිපතිවරණ අපේක්ෂකයා කවුද යන්න තීන්දු කිරීමෙ බලය එම පෙරමුණට හිමිවනු ඇත.
ජනාධිපති අපේක්ෂකයා මෙන්ම ඉදිරි අගමැති හා ඇමැති මණ්ඩලය නම් කිරීමේ බලය ද මෙම නව සන්ධානයට ලබා දීමට එජාප නායක රනිල් වික්‍රමසිංහ තීන්දු කර ඇති බවයි සිරිකොත ආරංචි මාර්ග පවසන්නේ.
මෙම සන්ධානයේ පක්ෂ කාර්යාලය ලෙස චතුර සේනාරත්නට අයත් ‘ අංක 146, ශ්‍රී සම්බුද්ධ ජයන්ති මාවත කොළම 05 ලිපිනයේ ආරම්භ කිරීමට ද කටයුතු සුදානම් කර තිබේ.
ජනාධිපතිවරණ අපෙක්ෂකයා තේරීම එජාප කෘත්‍යධිකාරී මණ්ඩලයෙන් හා එජාප පාර්ලිමේන්තු කණ්ඩායමෙන් ඉවත් කර වෙනත් පාර්ශවයකට පවරා ඇත්තේ සජිත් ප්‍රේමදාස ඇමැතිවරයා ජනපති අපේක්ෂකත්වයට තෝරා පත් කර ගැනීම වළක්වාලීමට බවටයි එජාප පසුපෙල මන්ත්‍රීවරුන් චෝදනා කරන්නේ.
කෙසේ වෙතත් එජාප බහුතර පිරිසක් මෙම තීරණයට එකඟ නොමැති බව සහ මෙය එජාපය විනාශ කිරීමේ පියවරක් දැයි සාක සහිත බවට නම හෙළි නොකළ එජාප පසුපෙල මන්ත්‍රීවරයෙකු කියා සිටියේය.
“ප්‍රජාතන්ත්‍රවාදී ජාතික පෙරමුණ” නමින් දේශපාලන පක්ෂ හා සිවිල් සංවිධාන එක්ව පිහිටුවන නව සන්ධානය අගෝස්තු 05 වනදා එළිදැක්වීමට කටයුතු යොදා තිබේ.
Facebook Comments
