සන්ධනයට ජාතිවාදීන් එක්කර ගන්නේ නැහැ – මහින්ද අමරවීර

ශ්‍රී ලංකා නිදහස් පක්ෂ ප්‍රමුඛ එක්සත් ජනතා නිදහස් සන්ධානයට මින් පසු ජාතිවාදී පක්ෂ එක්කර නොගන්නා බවට එක්සත් ජනතා නිදහස් සන්ධාන මහලේකම්වරයා පවසයි.

පසුගිය කාලයේ සන්ධානයට එක් වූ ජාතිවාදී පක්ෂ නිසා ශ්‍රී ලංකා නිදහස් පක්ෂයට හා පක්ෂයේ ප්‍රතිපත්තිවලට විශාල හානියක් සිදු වූ බවත් මේ පිළිබඳව අවධානය යොමු කරන විට විමල් වීරවංශ ගේ ඉවත්වීම කාලෝචිත බවයි ධීවර ඇමැති මහින්ද අමරවීර පෙන්වාදෙන්නේ.

එක්සත් ජනතා නිදහස් සන්ධානය සමඟ අත්වැල් බැඳ ගැනීමට පක්ෂ රැසක් කැමැත්ත පළ කර තිබෙන බව පවසන මහින්ද අමරවීර ඇමතිවරයා මේ වන විට එම පක්ෂ සමඟ සාකච්ඡා සිදු කරන බවත් ඒ අනුව ඉදිරියේ දී දැනටත් වඩා ශක්තිමත් එක්සත් ජනතා නිදහස් සන්ධානයක් බිහිවනු ඇතැයි ද අවධාරණය කරයි.

ශ්‍රී ලංකා නිදහස් පක්ෂ ඡන්දවලින් පාර්ලිමේන්තුවට ගිය අය පක්ෂය හෝ සන්ධානය හැර දමා යන්නේ නම් එම පුද්ගලයන්ට පාක්ෂිකයන්ගේ ඡන්ද නැවත කිසි දිනක නොලැබෙන බව පෙන්වා දෙන මහලේකම්වරයා පෞද්ගලික වාසි තකා සන්ධානය හැර යන අයට ඉදිරි මැතිවරණවල දී “තමන් ගේ තරම” දැන ගැනීමට හැකිවනු ඇති බවටයි විශ්වාසය පළ කරන්නේ.