වසර ගණනාවක් තිස්සේ ශ්‍රී ලංකාවේ සිදු වන මානව හිමිකම් කඩවීම් සම්බන්ධව ජාත්‍යන්තර ක්ෂේත්‍රයේ මැදිහත්වීම් කරමින් සිටින “සිංහල ක්‍රියාධරයකු” ත්‍රස්තවාදියකු ලෙස නම් කරමින් රජය විසින් තහංචි පැනවීමට එරෙහිව උතුරේ දෙමළ ජනයා සිය විරෝධය දක්වා තිබේ.
ජර්මනිය මුලස්ථානය කොටගත් ජාත්‍යන්තර මානව හිමිකස් සංගමය (IHRA) ප්‍රධානී විරාජ් මෙන්ඩිස් තහනම් පුද්ගලයෙකු ලෙස නම් කරමින් ආරක්ෂක ලේකම් ජෙනරාල් ශාත්න කෝට්ටේගොඩගේ අත්සනින් යුතුව ගැසට් නිවේදනයක් නිකුත් කර ඇත.
“යුද අපරාධ හෙළිකළ විරාජ් මෙන්ඩිස් ත්‍රස්තවාදියකුදැ,” යි ප්‍රශ්න කරන සටන් පාඨ හඬ නගමින් එම තහනම වහාම ඉවත් කරගන්නා ලෙස රජයට බලකර සිටියේ යාපනය නගරයේ පැවති විරෝධතාවකදීය.
දෙමළ ජාතික ජනතා සන්ධානය විසින් මෙහෙයවන ලද විරෝධතාවට නායකත්වය දුන් හිටපු පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් මාධ්‍යවේදීන්ට ප්‍රකාශ කළේ රාජ්‍ය අපරාධකාරිත්වය ලොවට හෙළිකරන මානව හිමිකම් ක්‍රියාධාරීන් දඩයම් කිරීම ආණ්ඩුවේ අරමුණ වී ඇති බවයි.
සිංහල තරුණ තරුණියන් හැට දහසකට වැඩි සංඛ්‍යාවක් ඝාතනය කරමින් මර්දනය කරන ලද 80 අග භාගයේ දෙවැනි ජවිපෙ කැරැල්ල සමයේ පටන් ශ්‍රී ලංකාවේ මානව හිමිකම් කඩ කිරීම් වලට විරුද්ධව හඬ නැගු විරාජ් මෙන්ඩිස් අඩුම වශයෙන් හැත්තෑදහසක් නිරායුද වැසියන් ඝාතනය කළ බවට ගණන් බලා ඇති උතුරේ යුද්ධයෙන් අනතුරුව එහි සිදුවූ අපරාධ විභාග කරන ජාත්‍යන්තර මහජන විනිශ්චය සභා දෙකක් යුරෝපයේ සංවිධානය කරන ලදී.
Facebook Comments
