මාධ්‍යවේදී මයිල්වාගනම් නිමලරාජන්ගේ ඝාතනයේ ප්‍රධාන සැකකරු වන සෙබස්තියන් පිල්ලෛ රමේෂ් නොහොත් නැපෝලියන් නමැත්තා හට වෙනත් ඝාතනයක් සම්බන්ධව යාපනය මහාධිකරණය විසින් මරණ දඬුවම නියම කර ඇත.
2011 වසරේදී දෙමළ ජාතික සන්ධානයේ ආධාරකරුවන් දෙදෙනකු ඝාතනය කොට 18කට තුවාල සිදු කළ වරදට ඊපීඩීපී සංවිධානයේ සාමාජිකයන් වන නැපෝලියන් හා තවත් දෙදෙනෙකුටයි මෙසේ මරණ දඬුවම ලබා දී තිබෙන්නේ.
2000 වසරේ ඔක්තෝබර් 19 දින ඇඳිරි නීතිය පනවා ඇති රැයක යාපනයේ අධි ආරක්ෂිත කලාපයක් තුළදී නිමලරාජන් වෙඩි තබා ඝාතනය කරන ලදී.
මරා දමන විට බීබීසී සිංහල හා දෙමළ සේවයට මෙන්ම හරය හා රාවය වැනි සිංහල මාධ්‍ය කිහිපයකටම නිමලරාජන් සිය වාර්තා කරනය සිදු කරමින් සිටියේය.
උතුරේ දම්ළ ජනයා විඳි දුක් ගැහැට ලංකාවේ දකුණට මෙන්ම ඉන් බැහැර ලෝකයට වාර්තා කිරීම හේතුවෙන් රජයේ හමුදා සමඟ ක්‍රියාත්මක වු අතුරු හමුදා මඟින් ඔහු ඝාතනය කරන ලද බව
නිමලරාජන්ගේ සමීපතමයින් හා මාධ්‍ය සංවිධාන පෙන්වා දෙයි.
ඊළාම් මහජන ප්‍රජාතන්ත්‍රවාදී පක්ෂය (EPDP) විසින් 2000 මැතිවරණයේදී කයිට්ස් දුපතේ සිදු කළ මැතිවරණ අක්‍රමිකතා පිළිබඳ නිමලරාජන් සැපයු සවිස්තර වාර්තාවෙන් දින කිහිපයකට පසු ඔහුට මරණිය තර්ජන එල්ල වූ අතර ඉන් දින කිහිපයකට පසුව ඔහු මරා දමන ලදී.
2003 වසරේදී නිමලරාජන්ගේ නිතීඥයන් විසින් ඔහුගේ ඝාතනයට සෙබස්තියන් පිල්ලෛ රමේෂ් නොහොත් නැපෝලියන් සැක බවට යාපනය මහේස්ත්‍රාත් වෙත කරුණු වර්තා කළ අතර එම කරුණු සලකා බැලු මහේස්ත්‍රාත් ඔහු අත්අඩංගුවට ගන්නා ලෙස නියෝග කළද නැපෝලියන් නමැත්තා එවකට පැවති ආණ්ඩුවේ දේශපාලඥනයන්ගේ සහාය ඇතිව රටින් පලා ගියේය.
කෙසේ වෙතත් නැපෝලියන් හට මරණ දඩුවම හිමි වු ද්විත්ව ඝාතන නඩුවට අදාළව ඔහු අත්අඩංගුවට ගන්නා ලෙසට යාපනය මහාධිකරණය ජාත්‍යන්තර වරෙන්තුවක් නිකුත් කර ඇත.
ඔහු දැනට බ්‍රිතාන්‍යයේ ජීවත් වන බව එරට දෙමළ ක්‍රියාධරයෝ පවසති.
Facebook Comments
