අධිකරණයට අපහාස කල බවට වරදකරු කරමින් සිරගත කරන සිටින බොදුබල සේනා සංවිධානයේ නායක ගලගොඩඅත්තේ ඥානසාර හිමියන් හට ජනාධිපති සමාවක් නොදෙන ලෙසට සන්ධ්‍යා එක්නැළිගොඩ ඉල්ලා ඇත.
නීතිපතිට සහ අධිකරණ අමාත්‍යවරියට 28 සඳුදා සිය ඉල්ලීම ලිඛිතව ලබා දුන් බවයි අතුරදහන් මාධ්‍යවේදී ප්‍රගීත් එක්නැළිගොඩගේ බිරිඳ පවසන්නේ.
2016 වසරේ ජනවාරි මස මාධ්‍යවේදී ප්‍රගීත් එක්නැලිගොඩ අතුරුදන් කිරීමට අදාළ නඩුව හෝමාගම මහේස්ත්‍රාත් අධිකරණයේ විභාගයට ගත් අවස්ථාවේදී අධිකරණ භූමිය තුළ කලහාකාරී ආකාරයෙන් හැසිරීම තුළින් අධිකරණයට අපහාසයක් සිදු කිරීම, රජයේ නීතිඥවරුන්ට අපහාසයක් සිදු කිරීම ඇතුළු චෝදනා කිහිපයකට ඥානසාර හිමි වැරදිකරු ලෙස තීන්දු කෙරුණී.
එම තීන්දුවට එරෙහිව කරන ලද ඇපෑලෙන්ද උන්වහන්සේ වරදකරු බවට තීන්දුව ලබා දුන් අභියාචනාධිකරණය වසර 6කින් ගෙවී යන ලෙස බොදුබල සේනා සංවිධානයේ නායක ගලගොඩඅත්තේ ඥානසාර හිමියන්ට වසර 19 ක සිරදඬුවම් නියම කළේය.
ඥානසාර හිමියන් වෙත එලෙස පොදු සමාවක් ලබා දුන් හොත් උන්වහන්සේ අගතියට පත් පාර්ශව වන තමන් , මහෙස්ත්‍රාත් , රජයේ නීතිඥවරුන්ට සිදු කරන්නාවූ අසාධාරණයක් වන බවටයි සන්ධ්‍යා එක්නැළිගොඩ පෙන්වා දෙන්නේ.
“ඉහත වැරදිකරු නිදහස් වුවහොත් මාගේ ස්වාමිපුර්ෂයා අතුරුදහන්වු නඩුකරය ඇතුළු අනෙකුත් නඩුකර වලට උන්වහන්සේ විසින් අගතිගාමී හෝ අයුතු ලෙස බලපෑම් සිදු කරන බවට ද මම විශ්වාස කරමි.” යනුවෙන් සන්ධ්‍යා එක්නැළිගොඩ ජනාධිපතිවරයාට ද යවන ලද ලිපියේ සඳහන් කර ඇත.
Facebook Comments
