කොරෝනා මර්දනයට මුවා වී ආණ්ඩුව විසින් විරුද්ධ මතධාරීන් මර්දනය කරන බවට චෝදනා කරන සමාජ ක්‍රියාකාරීන් පිරිසක් ඊට එරෙහිව විරෝධතාවයක් දියත් කර තිබේ.
“කොරෝනාවලට මුවා වී රටේ කට නොවසනු! අපි විරුද්ධයි” මැයෙන් සමාජ ජාලා ඔස්සේ මෙසේ විරෝධතාවක් දියත් කර ඇත්තේ සමාජ මාධ්‍ය හරහා ප්‍රකාශ නිකුත් කිරීම නිසා පුද්ගලයන් කිහිප දෙනකු අත් අඩංගුවට ගැනීමට එරෙහිවය.
සමාජ මාධ්‍ය ජාල ඔස්සේ කොරෝනා වසංගත සමය තුළ අදහස් පලකල 17 දෙනකු මේ වන විට අත්අඩංගුවට ගෙන ඇති බව පොලිස් මාධ්‍ය ප්‍රකාශක පොලිස් අධිකාරී ජාලිය සේනාරත්න පසුගියදා පවසා තිබුනි.
නිවාස වලට සීමා වී සිටින විරුද්ධ මතධාරීන් දඩයම් කිරීමට ආරක්ෂක බලධාරීන් කොරෝනා සමයේ ඇඳිරි නීතිය අයුතු ලෙස ප්‍රයෝජනයට ගනිමින් සිටින්නේද යන සැකයද සමාජ ක්‍රියාකාරීන් විසින් සිය විරෝධතාවයෙන් මතු කර ඇත.
භාෂණයේ නිදහස අහිමි කරමින් ආණ්ඩුව ගමන් කරමින් සිටින්නේ මිලිටරි පාලනයක් ගොඩ නැංවීමට නොවේ දැයි ජාතික ජන බලවේගයෙන් මහ මැතිවරණයට ඉදිරිපත් වී සිටින සාහිත්‍යධර විමල් කැටපේආරච්චි සිය විරෝධය දැක්වීමට නිකුත් කරන ලද විඩියෝවකින් ජනතාවගෙන් ප්‍රශ්න කරයි.
“ආණ්ඩුව මේ කරන්නේ දේශපාලන දඩයමක්. අකුරු වලින් කතා කරන, අකුරු වලින් අරගල කරන එක වෙනුවට වෙන මොනවයින් අරගන කරන්න පොළඹවන්නද හදන්නෙ කියලා අපි ආණ්ඩුවෙන් අහනවා,” යි ඔහු විමසා සිටී.
අන්තවාදී රාජ්‍යයක් කරා ගමනක්
සමාජයට විකෘති හා ජාතිවාදී අදහස් ඉදිරිපත් කරන ප්‍රධාන ධාරාවේ මාධ්‍ය හා පුද්ගලයන් පිළිබඳව ආණ්ඩුව නිහඬ පිලිවෙතක් අනුගමනය කිරීම ගැන පුදුමය පළ කරන රංගන ශිල්පිනි සමනලී ෆොන්සේකා තෝරා ගත් පිරිසක් පමණක් නිතිය ක්‍රියාත්මක කිරිම කෙතරම් ශිෂ්ඨ සම්පන්න දැයි රජයෙන් ප්‍රශ්න කරයි.
“මෙවැනි මර්දන බලයන් තුලින් අපි ගමන් කරමින් සිටින්නේ, ප්‍රකාශනයේ අයිතිය භාෂනයේ නිදහස නැති කරමින් අප ගමන් කරමින් සිටින්නේ, ඒකාධිපති රාජ්‍යයක් කරා ද නැතිනම් අන්තවාදී රාජ්‍යයක් කරාද කියන ප්‍රශ්නය අපි ඉදිරියේ තියෙනවා.”
“තරුණයන් මේ විදියට සමාජ මාධ්‍ය හරහා තමන්ගේ අදහස් ප්‍රකාශ කරන්නේ රටේ ප්‍රධාන පෙලේ මාධ්‍ය තමන්ගේ වගකීම හරිහැටි ඉටු නොකිරීම නිසා. රටක ප්‍රධාන පෙලේ මාධ්‍ය හරිහැටි වැඩ කරනවා නම් ජනතාව මෙහෙම ප්‍රකාශ නිකුත් කරන්නේ නැහැ. ඒ නිසා අපි පාලකයන්ගෙන් බලධාරින්ගෙන් ඉල්ලා සිටිනවා තරුණයන්ගේ කතා කිරිමේ අයිතිය මේ වෙලාවේ උදුර ගන්න එපා,” යැයි එක්සත් ජාතික පක්ෂයෙන් මහ මැතිවරණයට තරග කිරීමට බලා සිටින මාධ්‍යවේදී මහේෂ් සේනානායක ඉල්ලා ඇත.
ප්‍රකාශනයේ නිදහස උදෙසා සාමුහිකය විසින් දියත් කරන ලද මෙම විරෝධයට මේ වන විටත් සිවිල් හා සමාජ ක්‍රියාකාරින් ඇතුළු විවිධ පිරිස් විඩියෝ පණිවුඩ එක් කරමින් එය සහාය දීමට එක්ව සිටිනු දක්නට ඇත.
ජනතාව ඔබ මොබ යාමේ හැකියාව සීමා කිරීම සඳහා වසංගත උවදුරෙන් ලැබී ඇති අවස්ථාව විරුද්ධවාදීන් මර්දනය සඳහා අයුතු ලෙස ප්‍රයෝජනයට ගන්නේද යන ප්‍රශ්නයද ඔවුන් විසින් මතුකොට තිබේ.
“විශේෂයෙන්ම සිවිල් සමාජ ක්‍රියාධරයන්ට මානව හිමිකම් ක්‍රියාධරයන්ට හා මාධ්‍යවේදීන්ට මේ රටේ වැඩ කරන්න බැරිව නිවෙස් වෙලට සීමා වෙලා ඉන්න තත්ත්වයක් යටතේ ලැබිලා තියෙන අවස්ථාව ප්‍රයෝජනයට අරගෙන තමන්ගේ දේශපාලන ව්‍යපෘතිය ක්‍රියාත්මක කර ගන්න ඒ වගේ තමන්ගේ විරුද්ධ අදහස් දරන අයව මර්දනය කරන්න ආණ්ඩුව සුදානම් වෙනවා නම් ඒක නවත්වන්න කියන එක ඉතා බරපතල ලෙස අපි ආණ්ඩුවට ප්‍රකාශ කරන්න ඕනා.” යි තරුණ ජනමාධ්‍යවේදීන්ගේ සංගමයේ සඳුන් ප්‍රියංකර විතානගේ විරෝධයට සහාය පිණිස නිකුත් කරන ලද විඩියෝවේ කියා තිබේ.
විවේචනයේ අයිතිය
අසත්‍ය හෝ ද්වේශ සහගත පණිවුඩ, ප්‍රවෘත්ති හෝ තොරතුරු පතුරුවා හරින හෝ බෙදා ගන්නා අයට එරෙහිව දැඩි නීතිමය ක්‍රියා මාර්ග ගන්නා බවට 2020 අප්‍රේල් 1 වැනි දින වැඩබලන පොලිස්පති චන්දන වික්‍රමරත්නගේ උපදෙස් පරිදි පොලිස් මුලස්ථානය විසින් සියලු මාධ්‍ය ආයතන වෙත නිවේදනයක් නිකුත් කර තිබුනි.
ඊට අභියෝග කරමින් මානව හිමිකම් වෙනුවෙන් පෙනී සිටින ප්‍රමුඛ සංවිධාන නමයක් සහ ක්‍රියාකාරීන් හතලිස් හය දෙනකුගේ එකගතාවයෙන් යුතුව වැඩ බලන පොලිස්පතිවරයා වෙත යොමු කර ඇති ලිපියක් මගින් පෙන්වා දී ඇත්තේ රාජ්‍යය විවේචනය කරන පුද්ගලයන් අත්අඩංගුවට ගැනීමට කිසිම නීතිමය ප්‍රතිපාදනයක් නොමැති බවයි.
“එමෙන්ම ඇතැම් වාර්ගික සහ ආගමික ජන කොටස්වලට අයිති පුද්ගලයන් කොවිඩ් පැතිරවීම වැඩි කිරීමට කටයුතු කරන්නේ යැයි කියමින් එම ජනකොටස්වල පුද්ගලයන් ඒ හේතුවෙන් තර්ජන, බිය ගැන්වීම් සහ ප්‍රචණ්ඩත්වයේ අවදානමට ලක් කර, ඔවුනට එරෙහිව ‘වෙනස් කොට සැලකීම, සතුරුභාවය සහ ප්‍රචණ්ඩත්වය ඇති කිරීමට හේතුවිය හැකි වෛරය’ පැතිරවීමට සම්බන්ධ වන අයට එරෙහිව නීතිය දැඩි සේ ක්‍රියාත්මක කරන ලෙස ද අපි ඔබෙන් විශේෂයෙන්ම ඉල්ලා සිටිමු,” යි එම ලිපියේ වැඩි දුරටත් සදහන්ව තිබේ.
Facebook Comments
