යාපනේ විරෝධතාවලට තහනමක් ඉල්ලා පොලිසිය උසාවි යයි

ආණ්ඩු විරෝධී උද්ඝෝෂණවලට විරුද්ධ නැතැයි පවසන ජනාධිපතිවරයා මේ මස අග උතුරේ සංචාරයක යෙදෙන විට පැවැත්වීමට සුදානම් කොට ඇති බවට සැකකෙරෙන විරෝධතා තහනම් කරන ලෙස පොලීසිය අධිකරණයෙන් ඉල්ලා තිබේ.

යාපනය පොලීසිය මහේස්ත්‍රාත් අධිකරණයෙන් කළ ඉල්ලීමට ප්‍රතිචාර දක්වමින් මහේස්ත්‍රාත් වරයා පොලීසිය විසින් නම් කර ඇති මන්ත්‍රීවරයා ඇතුළු දෙමළ ක්‍රියාධාරීන් පිරිසකට නියෝග කර ඇත්තේ අධිකරණය හමුවේ කරුණු දැක්වීමට බ්‍රහස්පතින්දා (30) අධිකරණය හමුවේ පෙනී සිටින ලෙසයි.

යාපනය මහේස්ත්‍රාත් අධිකරණයේ රෙජිස්ට්‍රාර් විසින් අත්සන් තබා ඇති නියෝගයේ සදහන්ව ඇත්තේ ජනාධිපති අනුර කුමාර දිසානායක යාපනය දිස්ත්‍රික් ලේකම් කාර්යාලයේ පැවැත්වීමට නියමිත ඇති රැස්වීමට සහභාගි වන මොහොතේ යාපනය දිස්ත්‍රික් පාර්ලිමේන්තු මන්ත්‍රී වෛද්‍ය රාමනාදන් අර්ජුනා, උතුරු පළාතේ රැකියා විරහිත උපාධිධාරීන්ගේ සංගමයේ නායක සර්වානන්ද ශිවම් සශිකරන්, විරෝධතා කණ්ඩායමේ යාපනය දිස්ත්‍රික් නායක පෝන්රාජ් ප්‍රේම් ඩග්ලස් ප්‍රභාකරන්, අනියම් සෞඛ්‍ය නිලධාරී සංගමයේ නායිකා එස්. ජස්මින්, `හඬක් නැතිවුන්ගේ හඬ`සංවිධානයේ නායක මුරුගයියා කෝමගන් යන අය විසින් විරෝධතා දියත් කිරීමට නියමිත බවට තොරතුරු වාර්තා වී ඇතැයි යාපනය පොලිසියේ මුලස්ථාන පොලිස් ස්ථානාධිපතිවරයා විසින් ජනවාරි 29 දා අධිකරණයට කරුණු වාර්තා කර ඇති බවයි.

අධිකරණ නියෝගයේ සදහන් වන පරිදි 1979 අංක 15 දරණ අපරාධ නඩු විධාන සංග්‍රහයේ 106 ( 1) ( 2) ( 3) වගන්ති යටතේ මුලස්ථාන පොලිස් ස්ථානාධිපතිවරයා අධිකරණයෙන් ඉල්ලා ඇත්තේ එම විරෝධතා තහනම් කරමින් අධිකරණ නියෝගයක් නිකුත් කරන ලෙස යි.

අධිකරණය නියෝග කර ඇත්තේ පොලිසිය විසින් නම් කර ඇති ඉහත නම් සදහන් පස් දෙනාට ඔවුන්ගේ කරුණු දැක්වීම සදහා නීතිඥයන් මාර්ගයෙන් හෝ සෘජුව ජනවාරි 30 වැනි බ්‍රහස්පතින්දා උදේ 9.30 ට යාපනය මහේස්ත්‍රාත් අධිකරණය හමුවේ පෙනී සිටින ලෙසයි.

ජනාධිපති අනුර කුමාර දිසානායක යාපනයේ දිස්ත්‍රික් ලේකම් කාර්යාලයේ පැවැත්වෙන දිස්ත්‍රික් සම්බන්ධිකරණ කමිටු රැස්වීමට ජනවාරි 31 දා සහභාගී විමට නියමිතව ඇත.

ආණ්ඩුවට එරෙහිව පවත්වන විරෝධතාවලට තමන් හරස්වන්නේ නැති බව බලයට පත්වීමට පෙර වීදි සටන් කිරීමේ දීර්ඝ ඉතිහාසයක් ඇති පක්ෂ නායකයකු වන ජනාධිපතිවරයා ප්‍රසිද්ධියේ ප්‍රකාශ කර ඇත.