විරෝධය හමුවේ හකුලා ගන්නා ලද ධීවර පනත නව ආණ්ඩුව විසින් ක්‍රියාත්මක කළහොත් ධීවර උද්ඝෝෂණ පැන නැගීම වැළක්විය නොහැකි බවට දීපව්‍යාප්ත ධීවර සංගමයක් අවධාරණය කර තිබේ.
ධීවරයන්ට හා කර්මාන්තයට හානි කරන කරුණු රැසකින් යුත් මෙම ධීවර පනත අහෝසි කර ජන සහභාගිත්වයෙන්, කතිකාවකින් අනතුරුව ජාතික ධීවර ප්‍රතිපත්තියක් සකස් කොට පසුව නව පනතක් කළ යුතු බවට ජාතික ධීවර සහයෝගිතා ව්‍යාපාරය පවසයි.
“කලින් ආණ්ඩුවේ ධීවර ඇමැති ඩග්ලස් දේවානන්දා විසින් ඉදිරිපත් කරපු පනතම කිසිම වෙනසක් නොකර ක්‍රියාත්මක කරන්න අලුත් ආණ්ඩුවේ කැබිනට්ටුව අනුමත කරලා තියෙනවා. මේ යෝජනාව කැබිනට්ටුවට ඉදිරිපත් කර තියෙන්නේ අලුත් ධීවර ඇමැති රාමලිංගම්. එදා දේවානන්දා ඇමැතිවරයා පනත හකුලා ගත්තේ රටපුරා ධීවරයන්ගේ විරෝධය හමුවේ,” යැයි ජාතික ධීවර සහයෝගිතා ව්‍යාපාරයේ සභාපති මෙන්ම ලෝක ධීවර සම්මේලනයේ මහ ලේකම් හර්මන් කුමාර පෙන්වා දෙයි.
විදේශීය ධීවරයන්ට ලංකා මුහුදට ඇතුල් වීමට අවසර ලබා දීමක් යුරෝපා සංගමයේ අනුග්‍රහයෙන් සකස් කළ මෙම ධීවර පනත ඔස්සේ ක්‍රියාවට නැංවීමට නියමිතය. ඊට අමතරව සුළු පන්න ධීවරයන් සඳහා කෝටා ක්‍රමයක් හදුන්වා දී ඇති අතර වැරදි කරන ධීවරයන්ට දඩුවම් පැමිණවීමක් ලෙස බලපත්‍රද අහෝසි කරනු ලබයි. අනුග්‍රහය දුන් යුරෝපා සංගමය දන්වා ඇත්තේ පනත සකස් කිරීමට දිගු කලක් මිඩංගු කළ බැවින් හැකි ඉක්මනින් එය සම්මත කොට ක්‍රියාත්මක කරන ලෙස ඊට අනුග්‍රහය දැක්වූ යුරෝපා සංගමය දන්වා ඇති බැවින් ආණ්ඩුව කඩිමුඩියේ අනුමැතිය ලබා ගෙන ඇති බවට ද ධීවර සහයෝගිතා ව්‍යාපාරය චෝදනා කරයි.
ඉකුත් දෙසැම්බර් 23 වැනිදා පැවති අමාත්‍ය මණ්ඩල රැස්වීමට ධීවර ඇමැති රාමලිංගම් චන්ද්‍රසේකරන් විසින් යෝජනාව කැබිනට්ටුවට ඉදිරිපත් කොට තිබේ.
“විදේශීය ධීවරයන්ට අපේ මුහුදට එන්න දෙනවා කියන්නේ, අපේ ධීවරයන්ට රැකියාව අහිමි වෙනවා කියන එකයි. මොකද විදේශීය ධිවරයන්ට වගේ අපේ ධීවරයන්ට සුපිරි තාක්ෂණික උපකරණ නැහැ. දැනටමත් ධීවර රස්සාවේ පිරිවැය වැඩියි ලාබය අඩුයි.”
“ධීවර කෝටා ක්‍රමයක් හරහා මුදලට, දේශපාලන බලයට ලයිසන් ලබා දීමක් ඇති වෙන්න පුළුවන්. වරදකදී අවුරුදු දෙකක් වැනි කාලයක් ලයිසන් අවලංගු කිරීම, දඩ ගැහීම් වැනි දඩුවම් මගින් ධීවරයා කර්මාන්තයෙන් ඉවත් කිරීමේ තර්ජනයක් පෙන්නුම් කරන්නේ” යැයි ජාතික ධීවර සහයෝගිතා ව්‍යාපාරයේ සභාපතිවරයා පෙන්වා දෙයි.
ධීවර සහයෝගිතා ව්‍යාපාරය ආණ්ඩුවෙන් ඉල්ලා සිටින්නේ මෙම පනත අහෝසි කර ඉන්දීය ට්‍රෝලර් යාත්‍රා පැමිණීම හා හානිකර ආම්පන්න භාවිතය ගැන ගැටලුවලට කඩිනම් විසදුම් ලබා දෙන ලෙසයි.
“බලයට පත් වෙන්න කලින් මේ ගැටළු විසඳන බවට ජාතික ජනබලවේගයේ නායකයන් පොරොන්දු වුණා. මෙතෙක් ඒවා ඉටු නොවීම ගැන ධීවරයෝ කනස්සල්ලෙන් ඉන්නේ. මේ නිසා ඔවුන් කල් නොඇරම ආණ්ඩු විරෝධී උද්ඝෝෂණ වලට තල්ලු වෙන්න පුළුවන්” යැයි ධීවර සහයෝගිතා ව්‍යාපාරයේ සභාපති හර්මන් කුමාර අනතුරු අඟවයි.
Facebook Comments
