කිරි ගවයන්ගේ දිනය උතුරු නැගෙනහිරට කළු දවසක් වේ

මාස හතරකට වැඩි කාලයක් තිස්සේ අඛණ්ඩ විරෝධතාවයක නිරතව සිටින නැගෙනහිර පලාතේ කිරි ගොවීන්ගේ ගැටළු විසදීම සදහා කඩිනම් පියවර ගන්නා ලෙස බලකරමින්, කෘෂිකර්මාන්තයට සහාය ලබා දෙන ගවයන්ට දෙමළ ජනයා කෘතගුණ සැලකීමේ දිනයේ දී උතුරු නැගෙනහිර දෙපළාතේ විරෝධතා දියත් කර තිබේ.

මයිලත්තමඩු, මාදවනෙයි කිරි ගොවීන්ගේ අඛන්ඩ විරෝධතාවට දින 126 ක් සපිරුන පට්ටි පොංගල් දිනය යෙදී තිබු ජනවාරි 16 වැනි අගහරුවාදා මඩකලපුව ගාන්ධි උද්‍යානය ඉදිරිපිට දී මෙන්ම යාපනයේ නල්ලෙයි ආදීනම් ආශ්‍රමය ඉදිරිපිට දී දියත් කළ විරෝධතා එක්සත් දෙමළ ව්‍යුහය විසින් සංවිධානය කර තිබු බවයි පළාත් බද වාර්තාකරුවන් පවසන්නේ.

මඩකලපුව සිත්තාන්ඩි පාසල ඉදිරිපිටදී 2023 වසරේ සැප්තැම්බර් 15 වැනි සිකුරාදා දෙමළ කිරි ගොවීන් මුල් වරට විරෝධතාව ආරම්භ කර තිබුනේ සැප්තැම්බර් 13 වැනිදා මඩකලපුව දිස්ත්‍රික් ලේකම් කාර්යාලයේ පැවැති ගොවි කමිටු රැස්වීමේදී කිරි ගොවීන් මුහුණ දී සිටින ගැටළුවට විසදුම් ලබා දීමට තමන්ට නොහැකි බව දිස්ත්‍රික් ලේකම් කමලාවතී පද්මරාජා පැවසීමෙන් පසුවයි.

දේශපාලනඥයන්, ආගමික නායකයන්, සිවිල් සංවිධාන ක්‍රියාකාරීන් සමග ජනවාරි 16 වැනිදා පෙරවරුවේ මඩකලපුව ගාන්ධි උද්‍යානය ඉදිරිපිට රැස්වී උද්ඝෝෂණයක් දියත් කළ දෙමළ කිරි ගොවීන් විරෝධතා පෙළපාලියකින් දිස්ත්‍රික් ලේකම් කාර්යාලය දක්වා ගොස් එහිදී දිස්ත්‍රික් ලේකම්වරිය සමග සිය ගැටළු සාකච්ඡා කර තිබේ.

පසුගිය වසරේ දෙසැම්බර් මස මැදදි මඩකලපුව දිස්ත්‍රික් ලේකම්වරිය ලෙස පත්වීම් ලැබු ජස්රිනා යුලේකා මුරලිදරන්, තමා අළුතින් පත්වා ආ බැවින් කිරි ගොවීන්ගේ ගැටළු සම්බන්ධයෙන් සොයා බලා විසඳුමක් ලබා දීමට පොරොන්දු වු බව පළාත් බද වාර්තාකරුවෝ පවසති.

“පට්ටි පොංගල් යනු ගොවීන්ගේ කළු දිනයයි.” යනුවෙන් සදහන් බැනරය පෙරටු කරගත් විරෝධතාකරුවන් උද්ඝෝෂණය දියත් කර තිබුනේ ‘විනාශ කරන්න එපා – විනාශ කරන්න එපා, ගවයන් විනාශ කරන්න එපා. ඕන ඕන තෘණ භුමි ඕන, නීති විරෝධි සංක්‍රමණිකයන් පිටුවහල් කරන්න, අධිකරණ නියෝගය ක්‍රියාත්මක කරනු’ ආදී සටන් පාඨ ප්‍රදර්ශනය කරමිනි.

කිරි ගොවීන් අඛණ්ඩ විරෝධතාවයේ යෙදී සිටින දින ගණනට සමාන ලෙස මැටි මුට්ටි වල අංක 1 සිට අංක 126 දක්වා දින යොදා එම මුට්ටිවල කළු පටි බදිමින් ඔවුන් විරෝධතාවය සහ විරෝධතා පෙළ පාලිය දියත් කර තිබුනි.

මඩකලපුව කිරි ගොවීන් මුහුණ දී සිටින ගැටළු සදහා කඩිනම් විසදුම් ඉල්ලමින් යාපනයේ නල්ලෙයි ආදීනම් ආශ්‍රමය ඉදිරිපිට දී දියත් කළ සාමකාමි විරෝධතාවය සදහාද දේශපාලනඥයන්, ආගමික නායකයන් මෙන්ම සිවිල් සංවිධාන ක්‍රියාකාරීන් ද එක්ව සිටි බවයි පළාත් බද වාර්තාකරුවන් පවසන්නේ.

අඛන්ඩ විරෝධතාවයේ නිරත කිරි ගොවියන් පෙන්වා දෙන්නේ සිය ගවයන් තණකොළ කෑම සදහා භාවිත කළ ඉඩම් අක්කර දෙදාස් පන්සීයක් පමණ භුමි භාගයක් සිංහල ගොවීන් විසින් වගා කටයුතු වෙනුවෙන් මේ වන අත්පත්කරගෙන තිබීම නිසා කිරී ගොවීන් දැඩි අර්බුදයකට මුහුණ දී සිටින බවයි.

මඩකලපුව, මයිලත්තමඩු, මාදවනෙයි ප්‍රදේශයේ පිහිටි තෘණ භුමිය හිටපු ජනාධිපති ගෝඨාභය රාජපක්ෂ විසින් නැගෙනහිර ආණ්ඩුකාරධුරය සඳහා පත් කරන ලද වියත් මග ක්‍රියාකාරිණි අනුරාධා යහම්පත් විසින් මෑතකාලීනව පදිංචි කළ සිංහල පවුල් 150 ට පමණ බඩ ඉරිඟු ඇතුළු බෝග වගා කිරීම සඳහා පවරා දීමත් සමග පාරම්පරිකව කිරි ගවයන් පාලනය කරන්නන් සහ වගාකරුවන් අතර පසුගිය කාලයේ අවස්ථා කිහිපයකදීම ගැටුම් ඇති වී තිබුනි.

කිරි ගොවීන් පෙන්වා දෙන්නේ ගවයන්ට කැවීම සඳහා භාවිත කළ තණ බිම් අක්කර 6000 ක භුමියෙන් සිංහල ගොවියන් බලහත්කාරයෙන් අල්ලා ගෙන සිටින්නේ සරුසාරෙට තෘණ වැවෙන අක්කර 2500 ක ප්‍රදේශයක් බවයි.

ජනාධිපතිවරයා පසුගියදා නැගෙනහිර පලාතේ සංචාරයක නිරත වු අවස්ථාවේ සිය ගැටළු වලට විසදුම් ඉල්ලා විරෝධතා දියත් කළ කිරි ගොවීන්ට පොලීසිය විසින් පහර දී තිබුනි.

මයිලත්තමඩු මාදවනෙයි කිරි ගොවි සමිතියේ සභාපති සීනිතම්බි නිමලන් පවසන පරිදි අඛණ්ඩ විරෝධතා දියත් වන දින 126 ක කාලය තුලදී කිරි ගවයන් 250 ට වැඩි ප්‍රමාණයක් ඝාතනය කර තිබේ.