ආරක්ෂක හමුදාවන් කඳවුරු ලා සිටින උතුරේ ඉඩම් මුල් පදිංචි කරුවන්ට පවරන බව පවසන රජය යුද්ධයෙන් පසු මේතාක් නිදහස් නොකළ තවත් ඉඩම් අත්පත් කරගෙන නාවික හමුදාවට පැවරීම වෙනුවෙන් සැලසුම් දියත් කිරීමට එරෙහිව මුලතිව් වැසියන් විරෝධතාවක් පවත්වා තිබේ.
ඉඩම් අමාත්‍ය ගයන්ත කරුණාතිලකගේ අත්සනින් යුතුව මේ වසරේ අගෝස්තු 4 දා නිකුත් කරන ලද අති විශේෂ ගැසට් නිවේදනයක ඉඩම් අක්කර 617 ක් “පොදුජන කටයුත්තක් සඳහා” රජයට පවරා ගන්නා බවට කියා තිබුණද එය කුමන කටයුත්තක් සඳහා පවරා ගන්නේ දැයි සඳහන් වී නොතිබුණි.
උතුරු පළාතේ, මුලතිව් දිස්ත්‍රික්කයේ, මුහුදුබඩපත්තුව ප්‍රාදේශීය ලේකම් කොට්ඨාසයේ, අංක එම්යූඅයි/98 මුල්ලිවයික්කාල් නැගෙනහිර නමැති ග්‍රාම නිළධාරී වසමේ වඩ්ඩුවාහල් සහ වෙල්ලමුල්ලිවයික්කාල් ගමේ පිහිටි ඉඩම් එසේ පවරා ගන්නා බව ගැසට් නිවේදනයේ දැක්වෙයි.
මෙම ඉඩම් මැනීමේ කටයුතු සඳහා මිනින්දොරු දෙපාර්තුමේන්තුවේ නිලධාරි 22 බ්‍රහස්පතින්දා දෙවන වරටත් දරන ලද උත්සාහය එම ඉඩම් අයිති ජනයාගේ විරෝධය මත හකුලා ගෙන යාමට සිදු වු බවයි අප වාර්තාකරු පවසන්නේ.
පසුගිය වසරේ ඔක්තෝම්බර් මාසයේදී ඉඩම් මැනීමට උත්සහ කරන ලද අවස්ථාවේදී මුලතිව් වට්ටුවාහල් පුදුකුඩුඉරිප්පු මාර්ගය අවහිර කරමින් ජනතාව විරෝධය පල කිරිම හේතුවෙන් එම කටයුතු නවතා දැමු අතර විරෝධතාවය පැවති ස්ථානයට පැමිණි මුලතිව් සහකාර ප්‍රදේශිය ලේකම්වරයා මැනුම් කටයුතු තාවකාලිකව නවතා දමන බවට සහ ජනතාවගේ ගැටලු සම්බන්ධව වගකිව යුත්තන් සමඟ සාකච්ඡා කරන බවට පොරොන්දු දී තිබුණි.
“යුද මුක්ත කලාපය”
තමන්ට අයත් අක්කර 617ක් මෙසේ පවරා ගෙන නාවික හමුදාවට ලබා දීමට යන බවට චෝදනා කරන එම ප්‍රදේශයේ මුල් පදිංචි කරුවෝ යුද්ධයේ අවසාන භාගයේ ශ්‍රී ලංකා යුද හමුදාවේ බර අවි ප්‍රහාරයට ගොදුරුවීමෙන් විශාල ජන සංඛ්‍යාවක් මියගිය “යුද මුක්ත කලාපය” පිහිටියේ එම ප්‍රදේශයේ බව පෙන්වා දෙති.
යුද්ධයට පසු මෙම ඉඩම් සමීපයේ ඉදිකරන ලද ගෝඨාභය නාවික නෞකා කඳවුර මේ වන විට ස්ථිර කඳවුරක් බවට පත් කර ඇති බවට චෝදනා කරන ජනතාව එයට එරෙහිව අධිකරණ හමුවේ අභියෝග කිරීමට සුදානම් වෙති.
Facebook Comments
