මහජන දායකත්වයක් නොමැතිව වසංගත සමයේ ජනාධිපතිවරයා විසින් පිහිටවු ජනාධිපති කාර්ය සාධක බලකාය ශ්‍රී ලංකාවේ පාර්ලිමේන්තු ප්‍රජාතන්ත්‍රවාදයට පටහැනි බවට අනතුරු අඟවන සිවිල් සංවිධාන ප්‍රමුඛ ක්‍රියාධරයන් රැසක් ජනාධිපතිවරයාගෙන් ප්‍රශ්න මාලාවක් විමසා තිබේ.
ජනාධිපතිවරයා විසින් අලුතින් පත්කළ එම කාර්ය සාධක බලකා වල විෂය පථයන් පුළුල් මෙන්ම අපහැදිලි බවයි සිවිල් සංවිධාන ක්‍රියාධරයන් 59 දෙනකු සහ සංවිධාන 16 ක් ඒකාබද්ධව නිකුත් කළ නිවේදනයක දැක්වෙන්නේ.
“ආණ්ඩුක්‍රම ව්‍යවස්ථාවේ 33 වන ව්‍යවස්ථාවෙන් ජනාධිපතිතුමා වෙත පැවරී ඇති බලතල ප්‍රකාරව” බලකාය ස්ථාපනය කර තිබෙන බව ජනාධිපති කාර්ය සාධක බලකා පිහිටුවමින් නිකුත් කළ ගැසට් නිවේදනවල සඳහන් වෙයි.
ජනාධිපති වෙත සෘජුවම වාර්තා කිරීමේ බලතල සහිත කාර්ය සාධක බලකා නියෝග ක්‍රියාත්මක කිරීමට සියලුම රජයේ ආයතන බැඳී සිටී.
“කිසියම් රාජ්‍ය සේවකයෙකු හෝ අමාත්‍යාංශයක්, රජයේ දෙපාර්තමේන්තුවක්, රාජ්‍ය සංස්ථාවක් හෝ වෙනත් එබඳු ආයතනයක් කාර්ය සාධක බලකාය විසින් පවරනු ලබන රාජකාරී හා වගකීම් ඉටුකිරීම ප්‍රමාද කරන හෝ පැහැර හරින හෝ සියලු අවස්ථා ජනාධිපතිතුමා වෙත වාර්තා කරන ලෙස බලකායට විධාන කර ඇත,” යි ජනාධිපති ලේකම් පී.බී ජයසුන්දර අත්සන් කළ ගැසට් නිවේදනයෙන් නියම කර ඇත.
මෙවැනි පසුබිමක් යටතේ ස්ථාපිත කර තිබෙන ජනාධිපති කාර්ය සාධක බලකායන් හතරක් පිළිබදව ප්‍රශ්න කරන සිවිල් සංවිධාන ප්‍රමුඛ ක්‍රියාධරයන් අවධාරණය කරන්නේ දැනට පවතින යාන්ත්‍රණ සමග මේවා සම්බන්ධ වන්නේ කෙසේද යන්න පැහැදිලි නොමැති බවයි.
“අනෙක් අතින් කාර්ය සාධක බලකායන් පිහිටුවන අවස්ථාව වන විට ඒවායේ කාර්යන් හා බලතල සම්බන්ධයෙන් අධීක්ෂණය කිරීමට පාර්ලිමේන්තුව සක්‍රීයව නොපවතී. එසේම මේ මොහොතේ පවතින බරපතළ සෞඛ්‍ය, ආර්ථික සහ සමාජ අර්බුදය හමුවේ පුරාවිද්‍යාව සම්බන්ධ කාරනා මූලිකත්වයට පැමිණීමේ හේතුව පැහැදිලි නැත.”
කොවිඞ් 19 හේතුවෙන් රට අගුළු දමා තිබු වතාවරණයක මෙම කාර්ය සාධක බලකායන් ස්ථාපිත කිරීම සම්බන්ධව පුරවැසියන්ට ඔවුන්ගේ යොජනා සහ අදහස් ප්‍රකාශ කිරීමට අවස්ථාවක් නොවු බවත් සිවිල් සංවිධාන ක්‍රියාධරයන් විසින් ඒකාබද්ධව නිකුත් කළ නිවේදනයේ වැඩි දුරටත් සඳහන්ය.
සියලුම කාර්ය සාධක බලකායන් හමුදා සාමාජිකත්වයෙන් සමන්විත වන බවට පෙන්වා දෙන ඒකාබද්ධ නිවේදනයෙන් වැඩි දුරටත් ප්‍රශ්න කර ඇත්තේ ‘සුරක්ෂිත රටක්, විනයගරුක, ගුණගරුක හා නීතිගරුක සමාජයක් ගොඩනැගීම’ සඳහා වන ජනාධිපති කාර්ය සාධක බලකායෙහි සම්පූර්ණ සාමාජිකත්වය හමුදා සහ පොලිස් නිලධාරීන්ගෙන් සමන්විත වීම සම්බන්ධයෙනි.
“2019 නොවැම්බරයේ පැවති ජනාධිපතිවරණයෙන් පසුව ශ්‍රී ලංකාවේ සෞඛ්‍ය හා අධ්‍යාපන අංශය, සංවර්ධන ක්‍රියාදාමය, රාජ්‍ය පරිපාලනය සහ අධිකරණ ක්‍රියාදාමයන් තුළ සිවිල් ක්‍රියාකාරකම් මිලිටරීකරණය කිරීම සඳහා වන රජයේ අඛණ්ඩ අභිප්‍රාය මෙමඟින් තවදුරටත් පෙන්නුම් කරයි.”
මේ තත්වය ශ්‍රී ලංකාවේ දීර්ඝ කාලීනව ස්ථාපිත වූ පාර්ලිමේන්තු ප්‍රජාතන්ත්‍රවාදයට කිසිසේත් යහපත් නොවන බව සිවිල් සමාජය විසින් නිකුත් කළ නිවේදනය මගින් අවධාරණය කර තිබේ.
රටේ ජන විවිධත්වය නොසලකා හරිමින් වැඩිපුරම සිංහල සාමාජිකත්වයකින් මෙම කාර්ය සාධක බලකා සමන්විත වීම සම්බන්ධයෙන් ප්‍රශ්න කරන සිවිල් සමාජය පෙන්වා දෙන්නේ. නැගෙනහිර පලාත සඳහා පත්කර ඇති කාර්ය සාධක බලකායේ බෞද්ධ භික්ෂූන් සඳහා සැලකිය යුතු ඉඩක් ලැබී තිබුනත් එම පළාතේ විශාලම ජනගහනය වන මුස්ලිම් සහ දෙමළ ප්‍රජාව නොසලකා හැර ඇති බවයි.
“එයින් හැඟී යන්නේ මෙම කාර්ය සාධක බලකා වෙනත් ජන කණ්ඩායම් නොසලකා හරිමින් බහුතරය අනුව කටයුතු කළ යුතු බව ආණ්ඩුවේ ප්‍රතිපත්තිය වී ඇති බවයි.”
වියදම් කපා හැරීම පිළිබඳ රජය මූලික අවධානයක් යොමු කළ යුතු අවස්ථාවක මෙම කාර්ය සාධක බලකා සඳහා මුදල් වෙන් කෙරෙන්නේ කෙසේද යන්න විමසා සිටින සිවිල් සංවිධාන ක්‍රියාධරයන් අමාත්‍යංශය වලට දැනට පැවරී ඇති කාර්යන්ම නැවත සිදුකිරීමක් වේද, එසේ නම් රජයේ අතිරේක වැය බර අඩු කළ යුතු මෙවැනි මොහොතක එය කෙතරම් සුදුසුද යන්නත් ප්‍රශ්න කර තිබේ.
Facebook Comments
