උසස් පෙළ හා ශිෂ්‍යත්ව විභාග පරීක්ෂකයන් ලෙස පෞද්ගලික හා ජාත්‍යන්තර පාසල්වල ගුරුවරු කැඳවීමට විභාග කොමසාරිස් ජනරාල් සනත් පූජිත තීරණය කර ඇති බව පවසන දිවයිනේ ප්‍රමුඛතම ගුරු සංගමයක් එයට දැඩි විරෝධය පළ කර තිබේ.
විභාග දෙපාර්තමේන්තුව ජාත්‍යන්තර පාසල්වල සහ පෞද්ගලික පාසල්වල ගුරුවරු පිළිතුරු පත් ඇගයීම් සහ විභාග කටයුතුවලට යොදවා ගැනීමේ තීරණය නතර නොකළහොත් සෙසු වෘත්තීය සමිති සමග ඒකාබද්ධව දැඩි වෘත්තීය ක්‍රියාමාර්ගවලට යොමු වන බවයි ලංකා ගුරු සංගමය පවසන්නේ.
එම සංගමයේ ප්‍රධාන ලේකම් ජෝසප් ස්ටාලින්ගේ අත්සනින් නිකුත් කර තිබෙන නිවේදනයක් මගින් පෙන්වා දී ඇත්තේ මෙය ජාත්‍යන්තර පාසල් හා පෞද්ගලික පාසල්වල ක්‍රියාකාරීත්වය රට තුළ නීතිගත කරමින් නිදහස් අධ්‍යාපනය විනාශ කිරීමේ ක්‍රියාමාර්ගයේ දිගුවක් බවයි.
රජයේ පාසල්වල ගුරුවරු බඳවා ගැනීම සිදු කරන්නේ ශ්‍රී ලංකා ගුරු සේවා ව්‍යවස්ථාවට අනුව තරග විභාග පවත්වා විධිමත් ක‍්‍රමවේදයක් යටතේ බව පෙන්වා දෙන ගුරු සංගම් නායකයා අවධාරණය කරන්නේ පෞද්ගලික පාසල් ගුරුවරු එවැනි විධිමත් ආකාරයකට බඳවා නොගන්නා බවයි.
එවැනි තත්වයක් තුළ උත්තර පත‍්‍ර පරීක්ෂා කිරීම හා විභාග කටයුතු සම්බන්ධයෙන් ඔවුන් කිසිදු වගකීමකට බැඳී නොසිටින බව ගුරු සංගම් නායක ජෝසප් ස්ටාලින් පෙන්වා දෙයි.
“එම තත්වය තුළ එවැනි වගකීමකින් තොර පිරිසක් උත්තර පත‍්‍ර ඇගයීම් කටයුතුවලට යොදා ගැනීමෙන් සිසුන්ට බරපතල අසාධාරණයක් සිදු විය හැකිය. එවැනි පසුබිමක රජය මෙලෙස වගකීමකින් තොරව ජාතික විභාග සම්බන්ධයෙන් තීරණ ගැනීමෙන් පැහැදිලි වන්නේ පෞද්ගලික අධ්‍යාපනයට මග පෑදීමට දරණ උත්සාහයයි.”
මේ දිනවල උපකාරක පන්තිවල ඉගැන්වීමේ නිරත කණ්ඩායම් සමග ආණ්ඩුව දිගින් දිගටම සාකච්ඡා කරමින් විභාග සම්බන්ධයෙන් ඔවුන් හා තීන්දු තීරණ ගැනීම තුළ ද රජයේ පාසල් 10174 ක සේවය කරන ගුරුවරු හෑල්ලූවට ලක්කර ඇති බවටත් ගුරු සංගම් නායක ජොසප් ස්ටාලින් රජයට චෝදනා කරයි.
“මේ වන විට පාසල්වල උසස්පෙළ පන්තිවල ඉගැන්වීම් කරන ගුරුවරුන්ගේ කාර්ය භාරය නොසලකා උපකාරක පන්තිවලට බර තැබීමේ කි‍්‍රයාකාරීත්වයකට ආණ්ඩුව පැමිණ ඇත්තේ උපකාර පන්ති පවත්වන මහාපරිමාණ ව්‍යාපාරිකයන් වර්තමාන රජයේ මැතිවරණ ක්‍රියාදාමයේ උදව්කරුවන් වන නිසාය.”
අධ්‍යාපනය සම්බන්ධයෙන් පත් කළ කාර්යසාධක බලකාය ඇතුළු විවිධ කමිටුවලට පෞද්ගලික පාසල් ව්‍යාපාරිකයන් ද ඇතුළත් කර තිබීම තුළ මෙම තත්වය මනාව ප‍්‍රදර්ශනය වී ඇති බව ලංකා ගුරු සංගමය නිකුත් කළ මාධ්‍ය නිවේදනයේ වැඩි දුරටත් සදහන්ව තිබේ.
Facebook Comments
