එක් රටක් එක් නීතියක් ලෙස සංකල්ප ඉදිරිපත් කරන රාජපක්‍ෂ ආණ්ඩුව රාජ්‍ය පරිපාලනයේදී කඳුකර ජනතාවට අඩු සැලකිල්ල දක්වන බවට චෝදනා එල්ල වී තිබේ.
“ජනගහනය අනුව බලා නුවරඑළිය දිස්ත්‍රික්කයට තවත් ප්‍රාදේශීය ලේකම් කාර්යාල පහක් ද ගාල්ල දිස්ත්‍රික්කයට තුනක් ද වශයෙන් 2019 ඔක්තෝම්බර් 19 වැනිදා ගැසට් කරා. දැන් සිංහල මිනිස්සු ඉන්න ගාල්ලේ ඒවා හදලාත් ඉවරයි.එත් දෙමළ වතු කම්කරුවෝ බහුතරය ඉන්න නුවරඑළියට ඒ ගැන කිසිම දෙයක් නැහැ,“යි කඳුකරයේ දේශපාලන හා සමාජ ක්‍රියාධරයකු වන සමාජ සංවර්ධන ආයතනයේ අධ්‍යක්‍ෂක පෙරියසාමි මුතුලිංගම් පවසයි.
නුවරඑළිය දිස්ත්‍රික්කයේ ජනයාට සිදු කෙරෙන මෙම අසාධාරණය ගැන ලංකා මානව හිමිකම් කොමිෂන් සභාවට ඉදිරිපත් කර ඇති පැමිණිල්ල ඉදිරියේදී විභාගයට ගනු ඇති බවට මුතුලිංගම් අපේක්‍ෂා පළ කරයි.
කඳුකරය නියෝජනය කරන මන්ත්‍රීවරුන්ගේ ඉල්ලීමට අනුව එකවට රාජ්‍ය පරිපාලන ඇමැති වජිර අබේවර්ධන කැබිනට් අනුමැතියකින් අනතුරුව ගැසට් නිවේදනයක් මගින් ප්‍රකාශයට පත් කර ඇත්තේ නුවරඑළිය දිස්ත්‍රික්කයේ ක්‍රියාත්මක ඒවාට අමතරව නව ප්‍රාදේශීය ලේකම් කාර්යාල පහක්, ගාල්ලට තුනක් හා රත්නපුරයට එකක් බැගිනි.
එහෙත් ගාල්ලේ හා රත්නපුරයට ලබා දී තිබුනත් වසර තුනකට ආසන්න කාලයක් ගෙවී ගියද නුවරඑලියට නව ප්‍රාදේශීය ලේකම් බල ප්‍රදේශ වෙනුවට උප කාර්යාල දෙකක් විවෘත කර තිබේ.
මේ ගැන නුවරඑලිය සංවර්ධන කමිටු රැස්වීමකදී ප්‍රශ්න කරමින් කඳුරට ජනතා පෙරමුණේ නායක, පාර්ලිමේන්තු මන්ත්‍රී වේලුසාමි රාධාක්‍රිෂ්ණන් කියා සිටියේ `එක් රටක් එක් නීතියක් කියන ආණ්ඩුවේ සංකල්පය කඳුකරයේදී සිංහලයාට එක් නීතියක් සහ දෙමළාට තවත් නීතියක්`ක්‍රියාත්මක වන බවය.
කඳුකර ජනයාගේ පරිපාලන කටයුතු පහසුව සඳහා ආණ්ඩුව අනුමත කළ ප්‍රාදේශීය ලේකම් කාර්යාල පහ ලබා නොදීමට එරෙහිව නුවරඑළියේ ග්‍රාම සංවර්ධන සංසදය නම් සංවිධානයක් දිස්ත්‍රික් ලේකම් කාර්යාලය ඉදිරිපිට උද්ඝෝෂණයක් ඉකුත් සතියේදී පත්වා තිබේ. මේ ගැන ඔවුන් දිස්ත්‍රික් ලේකම් වෙත සංදේශයක් ද බාර දුන් බව කඳුකරයේ මාධ්‍යවේදියෝ පවසති.
2019 නිකුත් කළ ගැසට් නිවේදනය අනුව නුවරඑලිය දිසාව සඳහා නව ප්‍රාදේශීය ලේකම් කාර්යාල පහක් පිහිටුවන ලෙස ඉල්ලා ආණ්ඩුවට බලකෙරෙන මහජන පෙත්සමකට අත්සන් ලබා ගැනීමේ ව්‍යාපාරයක් `කඳුකරයේ දේශපාලන වේදිකාව`නම් සංවිධානය මගින් දියත් කර තිබේ.
“කඳුකරයේ දෙමළ ජනයාට දීපු රජයේ පොරොන්දුව ක්‍රියාවට නංවන්න රාජපක්‍ෂ ආණ්ඩුව මැලිවෙනවා. මේක කඳුකරයේ බලය බෙදීම පිලිබඳ ගැටළුවක්. අපි මේ ගැන ලෝකයට කියනවා,“යි හිටපු පාර්ලිමේන්තු මන්ත්‍රී මයිල්වාගනම් ත්‍යාගරාජා පවසයි.
හැටන් නගරයෙන් ඇරඹි මහජන පෙත්සමට අත්සන් තැබීමේ ව්‍යාපාරයට යාපනයේදී එක්වූ දෙමළ ජාතික පක්ෂයේ ලේකම් එම්.කේ සිවාජිලිංගම් සහ ඊළාම් ජනතා විප්ලවකාරී විමුක්ති පෙරමුණේ නායක සුරේෂ් ප්‍රේමචන්ද්‍රන් සිය සහාය පළ කර තිබේ.
Facebook Comments
