වත්මන් යහපාලන රජය මේ වන විට සිටින්නේ අවයව බද්ධයක් අවශ්‍ය මොහොතක බව පවසන සුව ඇමැතිවරයා ඒ සියල්ලටම වඩා ජනතාවගේ අවයව රැක ගැනීම වැදගත් බව පෙන්වා දෙයි.
“රජය මේ වනවිට අවයව බද්ධ කරන වෙලාවකයි සිටින්නේ. ඒ වුනත් ජනතාවගේ අවයව රැකගැනීම ඊට වඩා වැදගත්.” යැයි 18 ඉරිදා ශ්‍රී ජයවර්ධනපුර මහ රෝහල විසින් සංවිධානය කළ අවයව දන්දීමේ දින පාගමනට එක්වෙමින් සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න කියා සිටියේය.
තමන් ඇමැති ධුරයට පත් වන විට අවයව බද්ධ කිරීම අකර්මන්‍ය වී තිබු බව පැවසු ඇමැතිවරයා “ඉන් පසු අක්මා බද්ධය ආරම්භ කළ අතර, පසුව හෘද බද්ධ කිරීම් පවා සිදු කළා. අනුරාධපුරය, මහනුවර, පේරාදෙනිය, ශ්‍රී ජයවර්ධනපුර යන මහ රෝහල්වල දී අවයව බද්ධ කිරීම් සිදු කරනවා. මෙහිදී හෘද බද්ධය විශේෂිත වුනා. මමත් මහනුවරට ගොස් වෛද්‍යවරුන් සහ රෝගියා හමු වී අවශ්‍ය පහසුකම් ලබාදුන්නා.” යි සඳහන් කළේය.
ඉදිරියේදී අවයව බද්ධ කිරිම පුලුල් කරන බව මෙන්ම එය කඩාකප්පල් නොකර සහාය ලබා දෙන ලෙසට ද රාජිත් සේනාරත්න ඇමැතිවරයා මෙහිදී ඉල්ලා සිටියේය.
අවයව බද්ධ කිරිම අතින් ආසියාව ඉහල ස්ථානයක සිටින බව පෙන්වා දුන් ඇමැතිවරයා ශ්‍රී ලංකා තුල අවයව ඡාවාරමට ඉඩ නොතබන බව අවධාරණය කළේය.
අවයව දන් දෙන රෝගීන්ගෙන් කිසිදු ගාස්තුවක් අය නොකරන ලෙස පෞද්ගලික රෝහල් සහ ශ්‍රී ජයවර්ධනපුර මහ රෝහලේ පාලන අධිකාරියෙන් ඉල්ලා සිටි ඇමැති රාජිත සේනාරත්න ජාති, ආගම්, කුලය නොබලා මානව දයාවෙන් යුතුව අවයව දන් දෙන ලෙසට ද මහජනතාවගෙන් ඉල්ලා සිටියේය.
Facebook Comments
