පළාත් පාලන ජන්දය පරාජයෙන් පසුව යහපාලන රජයේ ඇතිව තිබු අස්ථාවරත්වය අවසන් කරමින් අගමැති ධුරයේ වෙනසකින් තොර දිගටම පවත්වාගෙන යාමට තීරණය කර ඇති අතර තවදුරටත් යහපාලන රජයේ රැඳී සිටිනවාද නැද්ද යන්න අවසන් තීරණයට ශ්‍රී ලංකා නිදහස් පක්ෂය මෙතෙක් එළඹ නැත.
ජනාධිපති අගමැති සහ කතානායක අතර 18 ඉරිදා ජනපති නිල නිවසේදී පැවති සාකච්ඡා වල දී අගමැති ධුරයේ වෙනසක් නොකර දිගටම පවත්වාගෙන යාමේ අවසන් තීරණයට පැමිණ ඇත.
පාර්ලිමේන්තුවේ සම්මත කෙරෙන විශ්වාසභංග යෝජනාවකින් මිස තමා අග්‍රාමාත්‍යධූරයෙන් ඉවත් නොවන බව රනිල් වික්‍රමසිංහ විසින් ජනාධිපති මෛත්‍රීරීපාල සිරිසේන හට මෙම සාකච්ඡාවේදී දැනුම් දුන් බව බීබීසි සිංහල සේවය වාර්තා කර තිබුණි.
මේ අතර කැබිනට් මණ්ඩලය නියෝජනය කරන අමාත්‍යවරුන්ගේ විෂය පථ වෙනස් කිරීම ඇතුළුව කරුණු ගණනාවක් සම්බන්ධව ජනාධිපතිවරයා සහ අග්‍රාමාත්‍යවරයා එකඟතාවකට පැමිණ ඇත.
ජනාධිපති අගමැති සහ කතානායකගේ හමුවේදී ගත් තීරණ ඊයේ රාත්‍රීයේ අරලිය ගහ මන්දිරයේ පැවති හමුවකදී එක්සත් ජාතික පෙරමුණේ පාර්ලිමේන්තු කණ්ඩායමට ද දැනුම් දී තිබේ.
ශ්‍රීලනිප අවසන් තීරණය අද
ජනාධිපති අගමැති සහ කතානායකගේ හමුව අවසන් වනවාත් සමඟ ශ්‍රීලනිප කණ්ඩායමක් ජනාධිපතිවරයා හමු වු අතර එහිදි යහපාලන රජයේ රැඳි සිටිනවාද නැද්ද යන්න සම්බන්ධයෙන් අවසන් තීරණය ගැනීමට නොහැකි වු බව පක්ෂ අභ්‍යන්තර ආරංචි මාර්ග පවසයි.
එම කණ්ඩායම 19 සඳුදා ජනාධිපතිවරයාව නැවත හමුවීමට නියමිත අතර එහිදි අවසන් තීරණයක් ගැනීමට නියමිත බව ද වාර්තා වේ.
මේ අතර ශ්‍රීලනිපය යහපාලන රජයෙන් වෙන් වීමට තීරණය කලහොත් එම පක්ෂයේ කණ්ඩායමක් එක්සත් ජාතික පක්ෂයට එක් වීමට බලාපොරොත්තුවෙන් සිටින බව මාධ්‍ය වාර්තා කර තිබුණි.
Facebook Comments
