ඉදිරි පළාත් පාලන මැතිවරණයට ශ්‍රී ලංකා පොදු ජන පෙරමුණ (පොහොට්ටුව) සහ එක්සත් ජාතික පක්ෂය එක්ව තරග කිරීමට තීන්දු කර තිබේ.
පළාත් පාලනය මැතිවරණ කටයුතුවලට සහභාගි නොවන බවට ජනාධිපතිවරයා පවසා තිබුනද මැතිවරණය සම්බන්ධ පොහොට්ටුවේ සහ එජාප සාකච්ඡා 10 අඟහරුවාදා ජනාධිපති ලේකම් කාර්යාලයේදී පැවති බව මාධ්‍ය වාර්තා කර ඇත.
තමන් කිසිදු ආකාරයකින් මැතිවරණ කටයුතුවලට සහභාගි නොවන බවත් තමන්ට වරමක් දී ඇත්තේ මැතිවරණ පවත්වා පක්ෂයට ජයග්‍රහණ අත්පත් කර දීමට නොව, දෙවසරක් තුළදී රට ආර්ථික ආගාධයෙන් ගොඩ ගැනීමට බවට එක්සත් ජාතික පක්ෂයේ ඉහළ පෙළේ නිලධාරීන්ට ජනාධිපති රනිල් වික්‍රමසිංහ දැනුම් දුන් බවට මීට පෙර මාධ්‍ය වාර්තා කර තිබුනි.
අද පැවති සාකච්ඡාවලදි දිස්ත්‍රික්කවල තරග කරන ආකාරය සහ ලාංඡනය ගැන සාකච්ඡා කළ බව එක්සත් ජාතික පක්ෂයේ මහලේකම් පාලිත රංගේ බණ්ඩාර මාධ්‍ය වෙත කියා සිටියේය.
“අපි ඒ ඒ දිස්ත්‍රික්කවල දෙපාර්ශවයේම ප්‍රධානීන් නියමුවන් ගෙනල්ලා සාකච්ඡා කරලා අලියා ලාංඡනයෙන් තරග කරන පළාත් පාලන ආයතන මොනවාද පොහොට්ටුව ලාංඡනයෙන් තරග කරන පළාත් පාලන ආයතන මොනවාද ඒ වාගේම පොදු ලාංඡනයෙන් තරග කරන පළාත් පාලන ආයතන මොනවාද කියන එක සම්බන්ධවත්, එකට තරග කරන ස්ථානවලදී අපේක්ෂකයන් බෙදාගැනීමේ පදනම මොකක්ද කියන එක පිලිබඳව සාකච්ඡා කරලා එකඟතාවයන්වලට පැමිණියා. දිස්ත්‍රික් 5ක අද සිදුකළා. ඉතිරි දිස්ත්‍රික්ක ගැනත් ඉදිරි දිනවල සාකච්ඡා කරලා එවැනි තීන්දුවක් ගැනීමට බලාපොරොත්තු වෙනවා”
මැතිවරණයට තරග කරන පොදු ලාංඡනය සම්බන්ධව ඉදිරියේදී සාකච්ඡා කර තීන්දුවක් ගන්නා බව හෙතෙම වැඩිදුරටත් කියා සිටියේය.
Facebook Comments
