නව ආණ්ඩුක්‍රම ව්‍යවස්ථාවක් සම්පාදනය කිරීම සහ අතුරුදහන් වුවන් සොයාගැනීම සඳහා කාර්යාලයක් පිහිටුවීම අත් හිටුවන ලෙස රජයට බලකර සිටින ශ්‍රී ලංකාවේ භික්ෂු සමුළුවක් රජය සංහිඳියාව යනුවෙන් මිත්‍යා ක්‍රියාකාරකමක යෙදෙන බවට චෝදනා කරයි.
මහනායක හා අනුනායක හිමිවරුන් ප්‍රමුඛ හැත්තෑපස් නමකගේ පමණ සහභාගිත්වයෙන් 04 අඟහරුවාදා පැවති සංඝ සම්මේලනයකදී එම තීරණයට එළඹි බවයි මාධ්‍යවේදීන් අමතමින් අස්ගිරි පාර්ශ්වයේ ලේඛකාධිකාරී ආණමඩුවේ ධම්මදස්සි අනුනාහිමියන් ප්‍රකාශ කළේ.
මල්වතු පාර්ශවයේ නියංගොඩ විජිතසිරි අනුනායක හිමියන් රජයට චෝදනා කළේ අලුත් ව්‍යවස්ථාවක් සකස් කරන්නට පියවර ගැනීම මැතිවරණයේදී දුන් වරම ඉක්මවා යාමක් ලෙසයි.
භයානක ප්‍රශ්න වලට අතගැසීමක්
බලය බෙදීම සම්බන්ධයෙන් ද විරෝධය පලකළ උන්වහන්සේ රජයේ ක්‍රියා පිළිවෙත හැඳින්වූයේ “සංහිඳියාව නමින් හැඳින්වෙන මිත්‍යා ක්‍රියාකාරකම්,” ලෙසිනි.
ව්‍යවස්ථා සංශෝධනය සඳහා රජය දියත් කර ඇති වැඩ පිළිවෙල ශ්‍රී ලංකා අමරපුර නිකායේ මහනායක හිමියන් විසින් “භයානක ප්‍රශ්න වලට අතගැසීමක්” හඳුන්වන දුන් අතර එය වහාම අත්හිටුවන ලෙස උන්වහන්සේ රජයට බල කළේය.
භයානක පනතක්
මේ අතර පාර්ලිමේන්තුව හමුවට ගෙන ඒමට නියමිතව තිබු අතුරුදහන් වුවන් වෙනුවෙන් කාර්යාලයක් පිහිටුවීම පිලිබඳ පනත් කෙටුම්පතද අකුලා ගන්නා ලෙස රජයෙන් ඉල්ලා සිටින බව ආණමඩුවේ ධම්මදස්සි අනුනාහිමියෝ මාධ්‍යවේදීන් හමුවේ ප්‍රකාශ කළහ.
උන්වහන්සේ එම පනත හැඳින්වූයේ “අහිංසක සොල්දාදුවන්ට දඬුවම් කරන්නට” ජාත්‍යන්තර අවශ්‍යතාවට ගෙන එනු ලබන “භයානක පනතක්” ලෙසයි.
කෙසේවෙතත්, අතුරුදහන් වුවන් සඳහා වන කාර්යාලය (OMP) විසින් හෙළි කරගන්නා තොරතුරු වලින් වගකිව යුතු කිසිවකුට එරෙහිව කිසිදු සාමාන්‍ය හෝ සාපරාධි හෝ වගකීමක් යටතේ දඬුවම් පමුණුවන්නේ නැති බව රජය විසින් දිගටම සහතික කොට තිබේ.
සංඝ සභාවේ තීන්දු රැගත් නිවේදනයක් භාරදීමට සංඝ නියෝජිත මණ්ඩලයක් 6 බ්‍රහස්පතින්දා ජනාධිපතිවරයා මුණගැසීමට නියමිතව ඇත.
Facebook Comments
