තමන් දෙමළ භාෂාව ඉගෙන නොගැනීම අඩුපාඩුවක් බව පවසන අගමැතිවරයා ඒ පිළිබඳව සිය කණස්සල්ල පළ කර තිබේ.
“අවාසනාවකට මනෝ ගනේෂන් ඇමතිතුමා මෙන් මට දෙමළ භාෂාව කතා කිරීමට නොහැකියි. ඒ කාලයේ අපි දෙමළ භාෂාව ඉගෙන ගත්තේ නැහැ. එය මගේ අඩුපාඩුවක්.” යැයි අගමැති රනිල් වික්‍රමසිංහ පවසා ඇත.
2018 වසරේ අධ්‍යයන පොදු සහතික පත්‍ර සාමාන්‍ය පෙළ විභාගයෙන් දෙවන භාෂාව සඳහා විශිෂ්ඨ ප්‍රතිඵල ලබාගත් ශිෂ්‍ය ශිෂ්‍යාවන් ඇගයීම වෙනුවෙන් 18 බ්‍රහස්පතින්දා අරලියගහ මන්දිරයේදී පැවති උත්සවයේදී අගමැතිවරය සිය කණගාටුව පළ කරන ලදී.
ජාතීන් අතර සුහදත්වය වර්ධනය විවිධ ජාතීන්ට අනන්‍ය භාෂා කතා කිරීමේ හැකියාව වැදගත් වන බව ද අගමැතිවරයා මෙහිදී කියා සිටියේය.
තමන් දෙමළ භාෂාව ඉගෙන නොගත් නමුත් ඉංග්‍රීසි භාෂාවෙන් සිංහල නොදන්නා මිත්‍රයන් හා ගණුදෙනු බව කී අගමැති රනිල් එහෙත් මෙරට බහුතර ජනතාවක් භාවිතා කළේ එක් භාෂාවක් පමණක් බව ද පෙන්වා දුන්නේය.
“මම ඉංග්‍රීසි භාෂාවෙන් කතා කළා. ඒ නිසා ද්‍රවිඩ, මුස්ලිම්, බර්ගර් ආදී විවිධ ජාතීන්වල මිත්‍රයන් රාශියක් මට සිටියා. නමුත් අපේ ගම්වල ජීවත් වූ ජනතාවගෙන් බොහෝ දෙනෙක් ඉගෙන ගත්තේ, කතා කළේ එක භාෂාවක් පමණයි. එදා ගම්මානවල ඉංග්‍රීසි ඉගෙන ගැනීමට අවස්ථාවක් නොතිබූ නිසා බොහෝ දෙනා සිංහල හෝ දෙමළ පමණක් කතා කළා.”
තම සහෝදර ජාතියේ භාෂාව නොදැන සිටීම යුද්ධය ඇති වීමට ප්‍රධානතම හේතුව බවට අගමැතිවරයා රනිල් වික්‍රමසිංහ වැඩි දුරටත් විශ්වාසය පළ කළේය.
Facebook Comments
