බුද්ධාගමේ හරය නියෝජනය නොකර, ආණ්ඩුව සහ වෙනත් ජාතීන් අතර ප්‍රශ්න ඇති කිරීමට උත්සාහ ගන්නා හාමුදුරුවරුන්ට එරෙහිව පියවර ගන්නා බව විදේශ අමාත්‍ය මංගල සමරවීර පවසයි.
පන්දහසකට අධික අත්සන් රැගත් පෙත්සමක් මගින් අත් අඩංගුවට ගන්නා ලෙස කරන ලද ඉල්ලීම පරිදි නීතිමය පියවර නොගෙන අධිකරණ අමාත්‍යවරයා බොදුබල සේනා නායකයා සහ අම්පිටියේ සුමන වැනි භික්ෂුන් සමග රාජ්‍ය මට්ටමින් ගනුදෙනු කිරීම සම්බන්ධයෙන් මාධ්‍යවේදියෙක් නැඟු පැනයට අමාත්‍යවරයා මෙසේ කියා සිටියේ පසුගියදා ශ්‍රී ලංකාවේ සංහිඳියා ක්‍රියාදාමය පිළිබඳව ලන්ඩනයේ දී පැවති ප්‍රසිද්ධ දේශනයකදීය.
ඇමතිවරයා හා එම කණ්ඩායම් සාකච්ඡා කල දේ හෝ ඇමතිවරයා කී දේ ආණ්ඩුව නොදන්නා බවත් “ඔබ සඳහන් කළ හාමුදුරුවන් ආණ්ඩුවට අනුව බුද්ධාගමේ හරය නියෝජනය කරන අය නෙවෙයි. මටනම් ඒ අය සිවුරු පොරවාගත් මහත්තුරු විතරයි. ඒත්, අපිත් පිලිගන්නවා ඒ අය සම්බන්ධයෙන් වහාම පියවර ගත යුතු බව. මොකද, ප්‍රජාවන් අතර බේද අවුස්සන්න හදන අමනාපයෙන් සිටින දේශපාලකයන් කණ්ඩායමක් ඉන්නවා.” යනුවෙන් ප්‍රකාශ කළේය.
ජනාධිපති සිරිසේන පත් කළේ සියලුම ජන කොට්ටාශ වල ඉහලම ඡන්ද ප්‍රතිශතයෙන් බව පෙන්වා දෙන විදේශ ඇමතිවරයා කියා සිටියේ වත්මන් ජනාධිපතිවරයා රටේ ඉතිහාසයේ එකම නියම ශ්‍රී ලාංකික ජනාධිපතිවරයා ලෙස හැඳින්විය හැකි බවයි.
සුළුතර කණ්ඩායම් වල සහාය නැතිව කවදාවත් බලයට එන්න බැරි බව දන්නා අසන්තෝෂයෙන් ඉන්න දේශපාලන කණ්ඩායම් ආණ්ඩුව සහ වෙනත් ජාතීන් අතර ප්‍රශ්න ඇති කිරීමට උත්සාහ කරමින් සිටින බව සහ ඔවුන්ට එරෙහිව පියවර ගැනීම සඳහා ජාතීන් අතර වෛරය වැපිරීමට විරුද්ධ නව නීති ගෙන එන බවයි විදේශ අමාත්‍ය මංගල සමරවීර එහිදී වැඩි දුරටත් පවසා ඇත්තේ.
Facebook Comments
