මිග් යානා ගණුදෙනුවේ සිදුව ඇති වංචා දුෂණ සහ පසුගිය සමයේ අපරාධ වලට හිටපු ආරක්ෂක ලේකම්වරයා සම්බන්ධ බවට හෙළි වී ඇති බැවින් ඔහු අත්අඩංගුවට ගැනීමට සියල්ල සුදානම් බව අමාත්‍ය රාජිත සේනාරත්න පවසයි.
පොහොට්ටුවේ අනාගත ජනාධිපති අපේක්ෂකයා හිටපු ආරක්ෂක ලේකම් ගෝඨාභය රාජපක්ෂ කී ඇමැතිවරයා ඔහු විදෙස් ගතව සිටින්නේ අත්අඩංගුවට ගනිවි යැයි බියෙන් බව 31 බදාදා කඩවත කිරිල්ලව පැවති ජන හමුවකදී කියා සිටියේය.
“රටේ ප්‍රධාන පෙලේ පුවත්පත් කතුවරයෙකු ප්‍රථම වරට ඝාතනය කළේ රාජපක්ෂ යුගයේ දීයි. ඒ ලසන්ත වික්‍රමතුංග මහතායි. හිටපු ආරක්ෂක ලේකම්වරයා විසින් සිදු කළ මිග් යානා ගණූදෙනුව පිළිබද මාධ්‍ය යේ ලිපි පළ කිරීම එම ඝාතනයට හේතු වී තිබෙනවා. එය රණවිරු ගැහිල්ලක්. අද මෙම රණවිරුවා රටෙත් නැහැ. ඇමරිකාවට පැනලා ඉන්නේ. පොහොට්ටුවේ අනාගත ජනාධිපති අපේක්ෂකයා ඔහුයි. රටේ නැති අනාගත ජනාධිපති අපේක්ෂකයා ලංකාවට එන්නේ දොලොස්වන දායි. ඒ මැතිවරණය අවසන් වූ පසුවයි. අත්අඩංගුවට ගනියි කියලා රටෙන් පැනලා ඉන්නේ.” යැයි ඇමැති රාජිත පවසයි.
2018 වසර පසුගිය රජයේ දුෂිතයින් සිරගෙට යන වසර බව පෙන්වා දුන් ඇමැතිවරයා 2020 වනවිට රාජපක්ෂවරුන් හමු විය හැක්කේ වැලිකඩ හිරගෙදර දී බවද ප්‍රකාශ කළේය.
රජය පිහිටුවීමට දායක වූ පමණින් සියලු දෙනාම ශුද්ධවන්තයින් නොව බව කී සෞඛ්‍ය අමාත්‍ය රාජිත සේනාරත්න “එක්සත් ජාතික පක්ෂය වැරදි කළ පුද්ගලයින්ටත් දඩුවම් ලබාදෙනවා. පක්ෂයේ උපනායක රවීකරුණානායක මහතා එම ධූරයෙන් ඉවත් කරන ලෙස තිලක් මාරපන කමිටුව නිර්දේශ කර තිබෙනවා. මේ පිළිබදව අග්‍රාමාත්‍යවරයා අපි සමග සාකච්ඡාවකුත් පැවැත්වූවා. එයයි අපේ පක්ෂයේ වෙනස.” යැයි වැඩි දුරටත් කියා සිටියේය.
Facebook Comments
