උසාවි ලියවිලි හොර රහසේම සීඅයිඩී ය කොමිසමකට දීලා

ඉහල පෙලේ නාවික නිලධාරිනට එරෙහිව අධිකරණයේ විභාග වන නඩුවක ලේඛන අනවසරයෙන් ජනාධිපති කොමිසමකට ලබා දුන් අපරාධ පරීක්ෂණ දෙපාර්තුමේන්තුව උසාවියේ දෝෂ දර්ශණයට ලක්ව තිබේ.

කෙළඹ ඇතුළු තදාසන්න ප්‍රදේශ වලින් 11 දෙනකු පැහැරගෙන ගොස් අතුරුදහන් කිරීමේ චෝදනා යටතේ කොළඹ ත්‍රිපුද්ගල මහාධිකරණයේ ගොනු කර ඇති නඩුවේ ලේඛන අධිකරණ අවසරයකින් තොරව දේශපාලන පළිගැනීම් සම්බන්ධයෙන් විමර්ශනය කරන ජනාධිපති කොමිසමට ලබා දී ඇත්

මෙම නඩුවේ සාක්ෂිකරුවන් 37 දෙනෙකුගේ ප්‍රකාශවල පිටපත් විත්තිකරුවන් වෙත ලබාදීමට නියමිතව තිබෙන බවත් එම ප්‍රකාශ අඩංගු අපරාධ පරීක්ෂණ දෙපාර්තමේන්තුවේ තිබූ මුල් ලිපිගොනු ජනාධිපති පරීක්ෂණ කොමිසම වෙත භාර දී තිබෙන බවත් මේ නිසා මෙම නඩුවේ කටයුතු අන්‍යාකාරයකින් අඩාලවීමේ අවදානමක් මතුව ඇති බව නීතිපති වෙනුවෙන් පෙනී සිටි අතිරේක සොලිසිටර් ජනරාල් සරත් ජයමාන්න අධිකරණය හමුවේ පෙන්වා දුන්නේය.

එම ඉල්ලීම පිළිගත් ත්‍රිපුද්ගල විනිසුරු මඩුල්ල අදාළ නියෝගය අපරාධ පරීක්ෂණ දෙපාර්තමේන්තුවේ අධ්‍යක්ෂවරයා වෙත නිකුත් කළ අතර එම නියෝගයේ පිටපතක් දැනගැනීම සඳහා අදාල ජනාධිපති පරීක්ෂණ කොමිසමේ සභාපතිවරයා වෙත යොමු කරන ලෙස නියම කළේය.

අදාළ නඩුව 24 සඳුදා කැඳවු අවස්ථාවේදී එම ලේඛණ වහාම නැවත ගෙන්වා ගන්නා ලෙසට විශේෂ ත්‍රිපුද්ගල මහාධිකරණ විනිසුරු මඩුල්ල අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට නියම කර ඇත.

මේ අතර මෙම නඩුවේ උසාවිය මඟ හැර සිටින හිටපු නාවික හමුදාපති වසන්ත කරන්නාගොඩ හට සිතාසි බාර දීමට නොහැකිවීම සම්බන්ධයෙන්ද පොලිසිය අධිකරණයේද දෝෂ දර්ශණයට ලක්වු අතර එය සුළුවෙන් තැකිය නොහැකි බව හා ඒ සම්බන්ධයෙන් පොලිසිය ලැජ්ජාවට පත්විය යුතු බවත් නීතිය සැමට එකසේ ක්‍රියාත්මක විය යුතු බව ද විනිසුරු තුන් කට්ටුව අවධාරණය කළේය.

මීට ඉහත නඩුව විභාගයට ගත් අවස්ථාවේදී නාවික හමුදාපතිවරයා සහ වැඩබලන පොලිස්පති වරයා මාර්ගයෙන් සිතාසි යොමු කරන ලෙසට චම්පා ජානකී රාජරත්න, අමල් රණරාජා සහ නවරත්න මාරසිංහ යන යන විනිසුරු මණ්ඩලය නියෝග කර තිබුණි.

නාවික හමුදාපතිවරයා විසින් සිතාසි භාර දීමේ ක්‍රියාවලිය පිළිබඳව අධිකරණයට වාර්තාවක් ඉදිරිපත් කර ඇති අතර විත්තිකාර හිටපු හමුදාපතිවරයා තමන් යටතේ සේවය කරන අයෙකු නොවන බවත් ඔහුගේ ආයතන ප්‍රධානියා තමන් නොවන බව එහි සඳහන් කර තිබේ.

අදාල සිතාසිය ක්‍රියාත්මක කිරීමේ කාර්යය අපරාධ පරීක්ෂණ දෙපාර්තමේන්තුවේ අධ්‍යක්ෂවරයා යොමු කළ අතර එම දෙපාර්තමේන්තුවේ නිලධාරීන් කරන්නාගොඩ මහතා පදිංචිව සිටින බැද්දගාන සහ කිරුළපන ප්‍රදේශයේ පිහිටි නිවෙස් වලට ගියද එහි කිසිවකු නොසිටි බවට පොලිස්පතිවරයා විසින් ද වාර්තා කර ඇති බව නිතිපති වෙනුවෙන් පෙනී සිටි අතිරේක සොලිසිටර් ජෙනරාල් සරත් ජයමාන්න කියා සිටියේය.

මෙය ඉතා ඛේදජනක තත්ත්වයක් බව සඳහන් කර සිටි අතිරේක සොලිසිටර් ජෙනරාල්වරයා නාවික හමුදාවේ අද්මිරාල් වරයෙකු වන විත්තිකාර වසන්ත කරන්නාගොඩ සොයා ගැනීමට නොහැකි වන තරමටම පොලිස්පතිවරයාගේ බුද්ධි සේවය දුර්වල ද යන ගැටලුව මතු වන බව පැවසීය.

විත්තිකාර කරන්නාගොඩ ඉකුත් 14 වනදා මෙම නඩුව කැඳවූ දිනයේ ප්‍රසිද්ධ පාසැලක උත්සවයකට සහභාගී වූ බවත් ඉකුත් 18, 19 සහ 20 වනදා යන දිනවල කොමිෂන් සභාවක් හමුවට ගොස් සාක්ෂි ලබාදී තිබෙන බවද අතිරේක සොලිසිටර් ජෙනරාල්වරයා අධිකරණය හමුවේ කියා සිටියේය.

මෙවර සිව්වෙනි වතාවට විත්තිකාර වසන්ත කරන්නාගොඩ හට ආරක්ෂක අමාත්‍යංශයේ ලේකම්වරයා මාර්ගයෙන් සිතාසියක් යොමුකරන ලෙස මහධිකරණ විනිසුරු මඩුල්ල නියෝග කළේය.

එමෙන්ම අදාල සිතාසියේ පිටපතක් ලියාපදිංචි තැපෑලෙන් විත්තිකරු වෙත යොමු කරන ලෙසත් සිතාසියේ පිටපතක් හිටපු නාවික හමුදාපතිවරයාගේ නිවසේ සිටින සේවකයෙකුට හෝ ඥාතියකුට භාර දෙන ලෙස හා ඔහුගේ නිවසේ ප්‍රසිද්ධ ස්ථානයක අලවන ලෙසට විනිසුරු මඩුල්ල නියෝග කර ඇත.

කෙසේ වෙතත් පොලිසියට සොයා ගත නොහැකිව උසාවිය මඟ හරිමින් සිටින ශ්‍රී ලංකා නාවික හමුදාවේ ඉහලම තනතුරු හිමි හිටපු නැව්පති වසන්ත කරන්නාගොඩ පෙබරවාරි 11 වනදා දේශපාලන පලිගැනිම් පිළිබඳ සෙවීමේ ජනාධිපති පරීක්ෂණ කොමිශන් සභාව පෙනී සිටියේය.

නඩුවේ වැඩිදුර විභාගය මාර්තු මස 20 වනදා ට කල් තැබීමට විනිසුරු මණ්ඩලය නියෝග කළේය.