වර්තමාන ආණ්ඩුවේ මුල්ම එක්සත් ජාතීන්ගේ නිත්‍ය නියෝජිත ලෙස නම්කර තිබූ සී ඒ චන්ද්‍රප්‍රේම ජිනීවා නුවර යාම අත්හිටුවා තිබේ.
අසුව දශකය අගභාගයේ අතුරුදහන් කිරීම් සහ මිනීමැරීම් සම්බන්ධයෙන් චෝදනා ලබන ප්‍රා සංවිධානයේ නායකයකු වන “තඩි ප්‍රියන්ත” ලෙසින් ප්‍රසිද්ධ වර්තමාන ජනාධිපතිවරයාගේ නිල ජීවිත රචකයා වන මාධ්‍යවේදී චන්ද්‍රප්‍රේම ජිනීවා තානාපති ධුරය සඳහා තම සුදුසුකම් ඔප්පු කළ යුතු පාර්ලිමේන්තු කමිටුවට දෙවතාවක්ම කැඳවා තිබුණද ඊට සහභාගී නොවූ බව සන්ඩේ ටයිම්ස් පුවත්පත වාර්තා කර තිබුනි.
ජනතා විමුක්ති පෙරමුණේ දෙවැනි කැරැල්ල සමයේ ඝාතක කල්ලියක ප්‍රමුඛයකුව සිටි බවට චෝදනා ලද අයෙක් ජිනීවා නුවර නව ශ්‍රී ලංකා තානාපති ලෙස පිළිනොගන්නා ලෙස සත්‍යය සහ යුක්තිය සඳහා වන ජාත්‍යන්තර ව්‍යාපෘතිය (ITJP) හා ජේඩීඑස් සංවිධානය ඔහු පිළිබඳ වාර්තාවක් එලි දක්වමින් ස්විස් රජයෙන් ඉල්ලා සිටියේය.
කෙසේ වෙතත් ශ්‍රී ලංකාවේ පොලිසිය පාර්ලිමේන්තු කමිටුවට දන්වා තිබුනේ සී ඒ චන්ද්‍රප්රෙමට එරෙහි කිසිදු පැමිණිල්ලක් නැති බවයි.
එය පොලිසිය විසින් පාර්ලිමේන්තුව නොමග හැරීමක් බව පෙන්වා දෙන JDS සංවිධානය ජවිපෙ දෙවැනි කැරැල්ල සමයේ භීෂණය පැතිරවූ රාජ්‍ය අනුග්‍රහ ලත් මිනීමරු කල්ලියක නායකයකු ලෙස මානව හිමිකම් නීතිඥයන් දෙදෙනකු මරා දැමීමේ චෝදනා යටතේ 2000 වසරේ සී ඒ චන්ද්‍රප්‍රේම රිමාන්ඩ් ගත කර තිබුණ බව හෙළි කර තිබේ.
ජ්‍යෙෂ්ඨ පොලිස් අධිකාරී ඩග්ලස් පීරිස් විසින් එවකදී නිකුත් කළ දිවුරුම් ප්‍රකාශයක් මගින් චරිත ලංකාපුර හා කාංචන අබේපාල යන මානව හිමිකම් නීතිඥයන් දෙදෙනාගේ මරණ සම්බන්ධයෙන් කන්දඋඩ ආරච්චිගේ චන්ද්‍රප්‍රේම හෙවත් “තඩි ප්‍රියන්ත” වගකිව යුතු ඝාතකයා වශයෙන් නම් කර තිබේ.
ජනාධිපති ගෝඨාභය රාජපක්ෂගේ නිල ජීවිත කතාවේ රචකයා වන සී ඒ චන්ද්‍රප්‍රේම ජිනීවා යාම වැලැක්වීම සඳහා ශ්‍රී ලංකා කැම්පේන් සංවිධානය විසින් අන්තර්ජාලය හරහා පෙත්සමක් ජාත්‍යන්තර වශයෙන් දියත් කර තිබු අතර මානව හිමිකම් මණ්ඩලයේ අසුන් ගෙන සභාවේ ගෞරවය පහත හෙලනු ඇති බව හා සමුළු වාර වලට සහභාගි වීම සඳහා ශ්‍රී ලංකාවේ සිට ජිනීවා යන මානව හිමිකම් ක්‍රියාධාරින්ට ඔහු තර්ජනයක් වනු ඇති බවට අනතුරු අඟවා තිබුනි.
Facebook Comments
