පාස්කු ප්‍රහාර සම්බන්ධව සොය බැලීමට පත් කරන ලද පාර්ලිමේන්තු තේරීම් කාරක සභාව පිළිබඳව ජනාධිපතිවරයා සහ කතානායක අතර මත ගැටුමක් ආරම්භ වී ඇතැයි පෙනෙන්නට තිබේ.
ජනාධිපතිවරයා විසින් පොලිස් ප්‍රධානින් හමුවේ තේරිම් කාරක සභාව විවේචනය කිරිම හා රාජකාරියේ නිරත කිසිඳු නිලධාරියෙකුට එම කමිටුව වෙත ඉදිරිපත් වීමට ඉඩ නොදෙන බවට කරන ප්‍රකාශ වලින් පසු මත බේදය ඇරඹී ඇත.
“දැන් මෙතෙක් තේරීම් කාරක සභාවට ගියෙ මම සේවා වලින් ඉවත් කරපු නිලධාරින්. සිසිර මෙන්ඩිස් මහත්තයත් අපි සේවයෙන් ඉවත් කළා.සේවාවන් වල දැන් යෙදී සිටින ආරක්ෂක අමාත්‍යංශයේ හෝ පොලිස් දෙපාර්තුමේන්තුවේ කිසිම කෙනෙක් තේරීම් කාරක සභාවට මම යවන්නේ නැත.” යැයි ජනපති මෛත්‍රීපාල සිරිසේන පොලිස් දෙපාර්තමේන්තුවේ ජ්‍යෙෂ්ඨ නිලධාරින් සමඟ පැවැත්වෙන මාසිකව රැස්විමේදී කියා තිබුනි.
ජනපති පොලිස් ප්‍රධනීන් හමුවේ කරන ලද ප්‍රකාශ ගැන පිළිතුරු ලිපියක් යොමු කරන කතානායකවරයා පෙන්වා දී ඇත්තේ වර්තමානයේ පවතින නීතිය අනුව යම් නිලධාරියෙක් පාර්ලිමේන්තුවේ කැඳවීමකට අවනත වීමට බැඳී සිටින බව සහ එය කඩකිරීමේ ප්‍රතිවිපාක පිළිබඳව ඔවුනට පැහැදිළි අවබෝධයක් ඇති බවයි.
කාරක සභාව මාධ්‍යයට විවෘත කිරීම හරහා ආරක්ෂාවට බලපෑමක් නැති බව ජාත්‍යන්තරයේ උදාහරණ සහිතව පෙන්වා දෙන කතානායක කරූ ජයසුරිය එය දියුණු ප්‍රජාතන්ත්‍රවාදී ලක්ෂණයක් බවයි අවධාරණය කරන්නේ.
“මෑතක දී ඇමරිකා එක්සත් ජනපදයේ නීතිපතිවරයා සහ රහස් තොරතුරු සේවයේ (CIA) අධ්‍යක්ෂ වරයා ඇමරිකානු මහජන කොන්ග්‍රසය විසින් පත් කළ කාරක සභාවක් හමුවට කැඳවා ප්‍රශ්ණ කරන අයුරු ලොව පුරා ජාත්‍යන්තර මාධ්‍යය සජීවීව විකාශය කළ ආකාරය ද මෙහි ලා පෙන්වා දිය හැක. එය ඇමරිකා එක්සත් ජනපදයේ පමණක් නොව ලොව දියුණු ප්‍රජාතන්ත්‍රවාදයක් පවතින රටවල සාමාන්‍ය ලක්ෂණයකි.”
පාර්ලිමේන්තු ස්ථාවර නියෝගයන් ට අනුව පොදු එකඟතාවයකින් ආරම්භ කළ, පාර්ලිමේන්තුව අනුමත කරන ලද ක්‍රියාදාමයන් නැවැත්වීමේ අවසන් බලය පාර්ලිමේන්තුව සතුවම පවතින බැවින් මෙම විශේෂ කාරක සභාවේ කටයුතු වැළැක්වීමේ බලයක් තමන්ට නොමැති බව ද කතානායකවරයා පෙන්වා දෙයි.
කිසිවිටකත් පාර්ලිමේන්තුව ජනාධිපතිවරයාගේ බලතල අභියෝගයට ලක් නොකරන නමුත් පාර්ලිමේන්තුව විසින් අනුමත කරන ලද කාරක සභාවක ක්‍රියාදාමය විවේචනයට ලක්වීම තුළින් ජනතාව තුළ ඇතිවිය හැකි වැරදි මතයක් පිළිබඳවෙ නිවැරදි තොරතුරු සැළකිරීම සඳහා පමණක්ම තමන් විසින් මෙම ලිපිය යොමු කරන බවයි කතානායක කරූ ජයසුරිය වැඩි දුරටත් සඳහන් කර ඇත.
Facebook Comments
