ගම්පහ දිස්ත්‍රික්කයේ විහාරස්ථාන වලට පැමිණීම තහනම් කළේ තමන් කළ කුමන වරදක් නිසා දැයි තමන් නොදන්නා බව මුදල් අමාත්‍යවරයා ප්‍රකාශ කර තිබේ.
“මම පත්තරේකින් දැක්කා ගම්පහ දිස්ත්‍රික්කයේ පන්සල්වලට යන එක මට තහනම් කරලා කියලා.මට හිතුණෙ මං කරපු මොන වරදටද කියලා.” යැයි මංගල සමරවීර ඇමැතිවරයා 08 සෙනසුරාදා මාතර උයන්වත්ත ක්‍රීඩාංගණයේ පැවැති උත්සවයකදී කියා සිටියේය.
මේ වන විට ගම්පහ දිස්ත්‍රික්කයේ විහාරස්ථාන සංවර්ධනය සඳහා පමණක් රුපියල් මිලියන දෙසීයකට වඩා වැඩි මුදලක් යොදවා ඇති බව ද ඇමැතිවරයා පෙන්වා දුන්නේ.
“ගම්පහ දිස්ත්‍රික්කයේ බෞද්ධ විහාරස්ථාන 378 සඳහා මම මිලියන 208ක වැඩ කරගෙන යනවැයි කියන්න ඕනේ.”
අභියෝගයන්ට මුහුණ දෙමින් ජාති ආගම් භේද වලින් තොරව ලංකාව පුරාම සංවර්ධන කටයුතු සිදු කරන බව දමංගල සමරවීර අමාත්‍යවරයා අවධාරණය කළේය.
එම ගමනට ඊර්ෂ්‍යා කරන මාධ්‍ය හා දේශපාලන පක්ෂ සිටින බව කී ඇමැතිවරයා ඔවුන් කළු ජුලියක් ඇති කරමින් සියල්ල කඩා කප්පල් කිරීමට වෙර දරණ බවට චෝදනා කරන ලදී.
රටේ සියලු ජාතීන් ශ්‍රී ලාංකිකයන් ලෙස එක් වී ශ්‍රී ලාංකික මානසිකත්වයක් ඇතිව වැඩ කළොත් රට ගොඩ ගත හැකි බවට විශ්වාසය පළ කළ මුදල් ඇමැතිවරයා “මේ රට අපිට ගොඩගන්න පුලුවන්. අපි ගොඩ ගන්නවා.” යැයි පැවසීය.
මුදල් අමාත්‍ය මංගල සමරවීර සහභාගී වන උත්සව සඳහා සහභාගි නොවෙන ලෙස මහා සංඝරත්නය විසින් පසුගියදා මාතරදි සංඝ ආඥාවක් පනවා තිබුණද මෙම උත්සවයට බෞද්ධ භික්ෂුන් එක්ව සිටින දක්නට ලැබුණ බවයි අප වාර්තාකරු කියා සිටියේ.
මේ අතර මාතර ප්‍රදේශයේ විහාරස්ථාන තුනක සංවර්ධන කටයුතු පිළිබඳ සාකච්ඡා කිරීමට මුදල් ඇමැති මංගල සමරවීර එම විහාරස්ථාන වෙත ගොස් මහා සංඝරත්නයේ අශිර්වාද ද ලබා ගත් බව ඔහුගේ මාධ්‍ය ඒකකය නිවේදනය කළේය.
Facebook Comments
