අතීතය අමතක කර නව ව්‍යවස්ථාවක් හරහා ජාතික ප්‍රශ්නයට විසඳුම් ලබා දීමට ගන්නා උත්සාහයට අකුල් නොහෙලා සහය දෙන ලෙස විපක්ෂ නායකවරයා හිටපු ජනාධිපතිවරයාගෙන් ඉල්ලීමක් කර තිබේ.
කොළඹ පැවති චීන හමුදා උත්සාහයකට සහභාගී වු අවස්ථාවේදී හිටපු ජනපති මහින්ද රාජපක්ෂ හා හිටපු ආරක්ෂක ලේකම් ගෝඨාභය රාජපක්ෂ හමුවු අවස්ථාවේදී මෙම ඉල්ලීම කරන ලද බව 28 සෙනසුරාදා ත්‍රිකුණාමලයේ පැවති උත්සවයකදී ආර්.සම්බන්දන් විපක්ෂ නායකවරයා කියා සිටියේය.
“එතුමගේ කාලේ දෙමළ ජාතික ප්‍රශ්නයට විසඳුම් ලබා දෙන්න කැමති වුණත් ඒක කර ගන්න බැරි වුණ හේතු කිහිපයක් කිව්වා. මම එතුමට කිව්වා පරණ දේවල් අමතක කරන්න කියලා. නව ව්‍යවස්ථාවක් හදලා ඒ හරහා ප්‍රශ්නය විසඳන්න අපි උත්සාහ ගන්නවා එ් උත්සාහයට විරුද්ධ නොවී සහය දෙන්න කියා මම එතුමගෙන් ඉල්ලුවා. ඒක එතුමගෙ යුතුකමක් කියල මම කිව්වා.” යි විපක්ෂ නායකවරයා සඳහන් කළේය.
තම ඉල්ලීමට හිටපු ජනපති මහින්ද රාජපක්ෂ විරුද්ධ නොවු බව කී විපක්ෂ නායකවරයා ඔහු ඒ ගැන සිතා බලන්න පොරොන්දු වු බව ද පැවසුහ.
මෙරට දියුණුවට නව ව්‍යවස්ථාවක අවශ්‍යතාවය හිටපු ජනපති හට පැහැදිලි කර දුන් බව පවසන විපක්ෂ නායකවරයා තමන් මහින්ද රාජපක්ෂගෙන් සහය ඉල්ලා සිටියේ දෙමළ ජනයා වෙනුවෙන් පමණක් නොව සමස්ත රටේ ජනතාව වෙනුවෙන් බව අවධාරණය කර සිටියේය.
“මෙය දෙමළ ජනතාව වෙනුවෙන් කරන ඉල්ලීමක් නෙමේ, රට වෙනුවෙන් කරන ඉල්ලීමක් කියලා මම එතුමට කිව්වා. රටේ දියුණුවට නව ව්‍යවස්ථාව අත්‍යවශයි. එම වැඩපිළිවලට සහය දෙන්න කියලයි මම එතුමගෙන් ඉල්ලුවේ.”
සහය ලැබෙනවාද නැද්ද යන්න වැදගත් නොවුවද හැම දෙනෙකුගේම සහය ලබා ගැනීමට උත්සාහ කිරිම යුතුමක් බවයි විපක්ෂ නායක ආර්.සම්බන්දන් වැඩි දුරටත් පෙන්වා දෙන්නේ.
Facebook Comments
