අලුත්ගම ජාතිවාදී ප්‍රහාරය “පළවැනි වතාවත් නොවේ, අවසන් වතාවත් නොවේ” යයි අනතුරු අඟවන රජයේ කැබිනට් ප්‍රකාශකවරයා එම ප්‍රහාරයේ වගකීම එවක පාලක මහින්ද රාජපක්ෂ භාරගත යුතු බව කියා සිටියේය.
අලුත්ගම දර්ගා නගරයට 2014 ජූනි මාසයේ බොදුබල සේනාවේ මෙහෙයැවීමෙන් එල්ල කෙරුණු ප්‍රහාරයෙන් හානියට පත් දේපල සඳහා වන්දි මුදල් ප්‍රදානය කරමින් දොස්තර රාජිත සේනාරත්න අමාත්‍යවරයා, “වග කියන්න ඕනෙත් අපි – වන්දි ගෙවන්නෙත් අපි” යි ප්‍රකාශ කළේය.
අලුත්ගම මුස්ලිම් විරෝධි ප්‍රහාරයෙන් තිදෙනෙකු මියගිය අතර දහස් ගණනකට උන් හිටි තැන් අහිමි විය.
නිවාස සහ වෙළෙදසැල් 122 ක් වෙනුවෙන් රුපියල් කෝටි 19 කට ආසන්න එම මුදල පුනරුත්ථාපන සහ නැවත පදිංචි කිරීමේ අමාත්‍ය ඩී.එම් ස්වාමිනාදන්ගේ ද සහභාගිත්වයෙන් බෙදා දෙනු ලැබුවේ අළුත්ගම දර්ගා නගරයේ සහිරා විද්‍යාලයේ දී ය.
වන්දි ලබා දීම අවස්ථාව “බලය ගැනීම සඳහා මේ රටේ ඇති කළ කාලකන්නි දේශපාලනයෙන් විපතට පත් වුවන්ට වන්දි ගෙවීමක්” ලෙසයි ඇමැති රාජිත සේනාරත්න හඳුන්වා දෙනු ලැබුවේ.
ශ්‍රී ලංකාවේ ඉතිහාසයේ ඇත්තේ “බලය ගැනීම සඳහා රටේ ජනතාව පාවාදීමේ ජාතිවාදය පිලිබඳ කතාව” යැයි පැවසු අමාත්‍යවරයා එවැනි“කාලකන්නි සිතුවිලි හා ක්‍රියා වලට” විරුද්ධව නැගී සිටින ලෙස ඉල්ලා සිටියේය.
ආවේග මත ජාතිවාදයට යට නොව ලෙස ඉල්ලා සිටින ඇමැතිවරයා “ජාතික සංහිදියාව ගොඩනගන්න. මෙම ප්‍රශ්නය විසඳන තුරු රට සංවර්ධනය වන්නේ නැහැ.” අවධාරණය කළේය.
තමන් අමාත්‍යධුරය දරන ආණ්ඩුවේ “විවිධ අඩුපාඩු තිබුනත්” කිසිදු නායකයකු ජාතිවාදයට යටත් නොවන බව කියා සිටිමින්ම රාජිත සේනාරත්න අමාත්‍යවරයා වර්තමාන පාලන සමයේත් ජාතිවාදී ප්‍රහාර දියත් වූ බව පිළිගත්තේය.
වත්මන් පාලන යටතේ සිදුවු අම්පාර, ගිංතොට හා දිගන ප්‍රහාරවලට ගොදුරු වූවන්ටත් වන්දි ලබා දෙන බවට ද අමාත්‍ය රාජිත සේනාරත්න වැඩි දුරටත් සහතික විය.
Facebook Comments
