විනිසුරු පුවත පළ නොකරන්න “තොරතුරු නිලධාරිනියගෙන්” මාධ්‍යයට බලපෑම්

ශ්‍රී ලංකා අධිකරණ කේෂ්ත්‍රයේ සුවිශේෂී සන්ධිස්ථානයක් සනිටුහන් කරමින් සිවිල් සංවිධානයක් සිදුකළ පැමිණිල්ලක් අනුව මහේස්ත්‍රාත්වරයෙකු එම ධූරයෙන් ඉවත් කිරීමේ පුවත වාර්තා නොකරන ලෙස රජයේ ප්‍රවෘත්ති දෙපාර්තමේන්තුවේ තොරතුරු නිලධාරිනියක් මාධ්‍ය ආයතන කිහිපයකයට බලපෑම් කර තිබේ.

දුරකථන ඔස්සේ ඇමතුම් ලබා දෙමින් එම පුවත වාර්තා නොකරන ලෙස ඇය ඉල්ලා ඇති අතර මේ වන විටත් පුවත පල කර තිබු බෙව් අඩවි කිහිපයක් එම පුවත ඉවත් කර ගැනීමට කටයුතු කර ඇති බව සිලෝන් ජර්නල්ස් වෙත වාර්තා වේ.

පල නොකරන ලෙස මාධ්‍ය වෙත බලපෑම් එල්ල වන පුවත පහලින්

ශ්‍රී ලංකා අධිකරණ කේෂ්ත්‍රයේ සුවිශේෂී සන්ධිස්ථානයක් සනිටුහන් කරමින් සිවිල් සංවිධානයක් සිදුකළ පැමිණිල්ලක් අනුව මහෙස්ත්‍රාත්වරයෙකු මහෙස්ත්‍රාත් ධූරයෙන් ඉවත් කොට ඇති බව ශ්‍රී ලංකා මානව හිමිකම් කේන්ද්‍රය පවසයි.

මෙසේ ඉවත් කොට ඇත්තේ කොළඹ 10, වතුර ටැංකිය පාරේ ව්‍යාජ ලිපිනයකින් අධිකරණ සේවයේ පත්වීම් ලැබූ ඩී.එම්.ඒ.අයි.දිසානායක නම් 2 වන පන්තියේ 1 ශ්‍රේණියේ අධිකරණ මහෙස්ත්‍රාත්වරයෙක් බවයි එම කේන්ද්‍රය පවසන්නේ.

ශ්‍රී ලංකා මානව හිමිකම් කේන්ද්‍රයේ විධායක අධ්‍යක්ෂ කීර්ති තෙන්නකෝන් විසින් මහේස්ත්‍රාත්වරයා ගේ පත්වීමට එරෙහිව අධිකරණ සේවා කොමිෂන් සභාවට පැමිණිල්ලක් ඉදිරිපත් කර තිබුණි.

එම පැමිණිල්ල මගින් දක්වා තිබුණේ මොහු කොළඹ 10, වතුර ටැංකිය පාර, අංක 73/1 දරණ ස්ථානය ව්‍යාජ ලිපිනයක් ලෙස භාවිත කරමින් අධිකරණ සේවයට අයදුම් කොට ඇති බවයි.

එමෙන්ම දිගු කලක් ක්‍රියාකාරී දේශපාලයේ සෘජුව නිරතවී සිට ඇති බවත් ශිරාණි බණ්ඩාරනායක අගවිනිසුරු ධූරයෙන් ඉවත් කිරීමේ කුප්‍රකට දෝෂාභියෝග ක්‍රියාවලියේ දී එයට පක්ෂපාතී ලෙස දේශපාලන රැස්වීම් සංවිධානය කිරීමත් එම පැමිණිල්ල මගින් දක්වා තිබුණි.

එමෙන්ම ශ්‍රි ලංකා නීතිඥ සංගමයේ පොදු තීරණයට එරෙහිව ශිරාණි බණ්ඩාරනායක ය ඉවත් කිරීම සදහා වන මෙහෙයුමේ ක්‍රියාකාරී ලෙස සහභාගිවී ඇති බවද එම පැමිණිල්ල මගින් පෙන්වා දී ඇත.

මහෙස්ත්‍රාත් පත්වීම් ලැබූ අසංක දිසානායක තම මුහුණු පොතේ අතිශයින් දේශපාලනික සටහන් පළ කරමින් දේශපාලන කටයුතු නිරතවන බව ද ශ්‍රී ලංකා මානව හිමිකම් කේන්ද්‍රය වෙනුවෙන් කීර්ති තෙන්නකෝන් ඉදිරිපත් කළ පෙත්සමේ දැක්වෙන බව ශ්‍රී ලංකා මානව හිමිකම් කේන්ද්‍රයේ මාධ්‍ය ඒකකය 02 බ්‍රහස්පතින්දා නිකුත් කළ නිවේදනයක දැක්වේ.

ශ්‍රී ලංකා මානව හිමිකම් කේන්ද්‍රය පවසන පරිදි 1977 න් පසුව සමාජ ක්‍රියාකාරිකයෙකු ගේ පැමිණිල්ලක් මත මහෙස්ත්‍රාත්වරයෙකු අධිකරණ සේවයෙන් ඉවත් කළ පළමු අවස්ථාව මෙයයි.