ශ්‍රී ලංකා පොදු ජන පෙරමුණ – එක්සත් ජාතික පක්‍ෂ හවුල් ආණ්ඩුව ගෙන යන මර්දනයේ තවත් පියවරක් දියත් කරමින් අරගල සමයේ අරලිය ගහ මන්දිරයට ඇතුල්වූවන්ගෙන් යළි ප්‍රශ්න කිරීම අපරාධ පරීක්ෂණ දෙපාර්තමේන්තුව විසින් ආරම්භ කර තිබේ.
පොලිසිය පවසන්නේ මේ සම්බන්ධයෙන් අරගලකරුවන් පහළොස් දෙනෙකුට පමණ නඩු පවරා ඇති අතර ඒ සඳහා ඔවුන්ගේ ප්‍රකාශ සටහන් කර ගැනීම දැන් සිදුකරන බවයි.
අරලිය ගහ මන්දිරයට ඇතුල්වූ තරුණ ක්‍රියාකාරීන් යුවලක් වන නලින්ද කුරේ හා නදීරා ෆ්‍රැන්සිස්, දාබරේ ගමගේ ඇතුළු තවත් අරගලකරුවන් දෙදෙනෙකු ඉකුත් 18 වැනිදා රහස් පොලිසිය වෙත කැඳවා තිබිණි.
අරගල සමයේදී මෙම තරුණ ක්‍රියාකාරීන් යුවල අත්අඩංගුවට ගත් පොලිසිය පසුව නීතිඥයන්ගේ මැදිහත් වීමෙන් ඇප මත මුදා හැරිණි.
අරගලකරුවන් පවසන්නේ අරලිය ගහ මන්දිරයට ඇතුල්වීම එහි දේපල වලට හානි කිරීම හෝ සොරා ගැනීම ගැන මෙහිදී පොලිසිය ඔවුන්ගෙන් විමසා ප්‍රකාශ සටහන් කර ගත් බවයි.
අරගලකරුවන්ට අමානුෂික ප්‍රහාරයක් එල්ල කරන්නට අනුබල සැපයු බවට චෝදනා එල්ලවූ වත්මන් වැඩබලන පොලිස්පති දේශබන්ධු තෙන්නකෝන් යටතේ යළි කැඳවා ඇති මෙම පරික්ෂණ වල ස්වාධිනත්වය ගැන ඔව්හු සැක පළකරති.
මෙම කැඳවීම් කිරීමේදී අපරාධ පරීක්ෂණ දෙපාර්තමේන්තුවේ ව්‍යාජ මුදල් කාර්යාංශයේ ස්ථානාධිපති වෙත වාර්තා කරන ලෙස දැනුම් දීම නොමග යන සුළු ක්‍රියාවක් බව අරගලකරුවෝ පෙන්වා දෙති.
2022 මැයි මස 09 වැනිදා ගාලු මුවදොර පිටියේ පැවැති “ගෝඨා-ගෝ-ගම” අරගලයට පහර දීමේ සිද්ධියට අදාළව සැකකරුවකු ලෙස එවකට බස්නාහිර පළාත බාර නියෝජ්‍ය පොලිස්පති දේශබන්දු තෙන්නකෝන් නම් කරන ලෙස නීතිපතිවරයා විසින් ලිපියක් නිකුත් කර තිබිණි.
පසුව දේශබන්ධු තෙන්නකෝන් විසින් අභියාචනාධිකරණයට යොමු කළ රිට් පෙත්සමකට ලබා දුන් ආඥාවක් මගින් එම ලිපිය බල රහිත කරනු ලැබුවේ අරගලකරුවන් ජනාධිපති මන්දිරයට ඇතුළු වූ අවස්ථාවේ දී එහි තිබී රුපියල් එක්කෝටි හැත්තෑ අට ලක්ෂයකට අධික මුදලක් සොයා ගැනීමේ සිද්ධියට අදාළව සැකකරුවකු වශයෙන් පෙනී සිටින ලෙස දන්වා කොළඹ කොටුව මහේස්ත්‍රාත් අධිකරණය නිකුත් කළ සිතාසිය ද අවලංගු කරමින්ය.
ජනාධිපති මන්දිරයේ තිබී සොයා ගත් එම මුදල් පොලිසිය වෙත ලබා දීමෙන් අනතුරුව එවකට නියෝජ්‍ය පොලිස්පති දේශබන්ධු තෙන්නකෝන් බාරයට ගත් මුත් නියෝගයක් නිකුත් කරන තෙක් එය උසාවියට ලබා දීමට ඔහු ක්‍රියා කර නොතිබිණි.
මිල්ලෑව ප්‍රදේශයේ පදිංචි ඩබ්ලිව්.රංජිත් සුමංගල නමැති හිටපු හමුදා සෙබළා 2010 වසරේදී අත්අඩංගුවට ගෙන, නීති විරෝධී ලෙස රඳවාගෙන අමානුෂික වධ හිංසාවලට ලක් කිරීම වෙනුවෙන් රුපියල් ලක්ෂ පහ බැගින් වන වන්දි සිය පෞද්ගලික මුදලින් එම පුද්ගලයා වෙත ගෙවන ලෙස එවක නුගේගොඩ ප්‍රදේශයේ භාරව සිටි පොලිස් අධිකාරිවරයා ලෙස කටයුතු කළ වත්මන් වැඩ බලන පොලිස්පති දේශබන්දු තෙන්නකෝන්, මිරිහාන පොලිසියේ හදිසි ඒකකයේ ස්ථානාධිපති භාතිය ජයසිංහ, පොලිස් නිලධාරී බණ්ඩාර සහ සිවිල් පුද්ගලයකු වන අජිත් වනසුන්දරට නිලධාරීන් ශ්‍රේෂ්ඨාධිකරණය මගින් පසුගිය 14 වැනිදා නියෝග කළේය.
කුමුදුනී වික්‍රමසිංහ සහ ප්‍රියන්ත ප්‍රනාන්දු විනිසුරන්ගේ එකඟත්වය සහිතව ශ්‍රේෂ්ඨාධිකරණ විනිසුරු එස්. තුරෙයිරාජා විසින් මෙම තීන්දුව ලබා දුන්නේ වධ හිංසාවට ලක් වූ හිටපු හමුදා සෙබලා ගොනු කළ මුලික මිනිස් අයිතිවාසිකම් පෙත්සමක් විභාග කිරීමෙන් අනතුරුවයි .
පොලිස් නිලධාරීන්ට ලැබී තිබෙන බලතල හුදු වගකීමේ සංකේත බව සිහි තබාගත යුතු බවත්, ඒවා බලය පෙන්වන ආභරණ නොවන බවත් නඩු තීන්දුව මඟින් අවධාරණය කළ ශ්‍රේෂ්ඨාධිකරණය එම පොලිස් නිලධාරීන් සම්බන්ධයෙන් විනය ක්‍රියාමාර්ග ගැනීමට නඩු තීන්දුවේ පිටපත් ජාතික පොලිස් කොමිසම සහ නීතිපතිවරයා වෙත යොමු කෙරිණි.
“අජිත් වනසුන්දර නමැති සිවිල් පුද්ගලයාත් එක්ක ආපු මිරිහාන පොලිසියේ බණ්ඩාර සහ භාතිය ජයසිංහ කියන නිලධාරීන් දෙදෙනා 2010 වසරේ දෙසැම්බර් මස 18 වැනිදා ත්‍රිරෝද රථයකින් පැමිණ මාව අත්අඩංගුවට අරන් දඹර පැත්තේ මිනී කනත්තකට රැගෙන ගිහින් මේ වග උත්තරකාර පොලිස් නිලධාරින් එම ප්‍රදේශයේ වෙන මංකොල්ලකෑම් හා යුද හමුදාවේ සිටියදී භාවිත කළ ගිනි අවියක් ගැන ප්‍රශ්න කරමින් මට අමානුෂික ලෙස පහර දෙමින් මිරිස් කුඩු තැවරු ප්ලාස්ටික් උර දෙකක් ඔළුවට බහා හුස්ම ගන්නැයි බල කළා,“ යැයි රංජිත් සුමංගල නමැති හිටපු හමුදා සෙබලා විසින් ගොනු කළ පෙත්සම මගින් පෙන්වා දී ඇත.
මිරිහාන පොලිස් ස්ථානයේදී දේශබන්දු තෙන්නකෝන්ම වධහිංසා කළ බව අධිකරණයේදී තහවුරු විය.
මෙම ශ්‍රේෂ්ඨාධිකරණ තීන්දුව හමුවේ වැරදිකරුවකු වූවද දේශබන්දු තෙන්නකෝන් පොලිස්පතිවරයා ලෙස වැඩ බැලීමට ජනාධිපති රනිල් වික්‍රමසිංහ ඇතුළු ආණ්ඩුවේ අප්‍රසාදයක් එල්ල වී නොමැත.
ආර්ථික අර්බුදය, ජිවන වියදම ඉහල යාම, පොදු දේපල විකිණීම ඇතුළු කාරනා හේතුවෙන් නැගී එන විරෝධය හමුවේ ජනතාව බියපත් කිරීමට මෙවැනි ක්‍රියාමාර්ග දියත් කිරීම ආණ්ඩුවේ අරමුණ වී ඇතැයි අරගලකරුවෝ පවසති.
ගාලු මුවදොර අරගලයට එක්ව සිටී තරුණ ක්‍රියාකාරියෙකු වූ ප්‍රියත් නිකේෂල අඟහරුවාදා [19] රහස් පොලිසියට කැඳවා ප්‍රකාශ ලබා ගෙන තිබිණි.
ඉදිරි දිනයන්හි තවත් ක්‍රියාකාරීන් පොලිසියට කැඳවා යළිත් ප්‍රකාශ සටහන් කර ගැනීමට නියමිතය.
Facebook Comments
