පුද්ගලික අංශ කම්කරුවන්ගේ අර්ථ සාධක අරමුදල රැක ගැනීම වෙනුවෙන් කළ සටනේදී මරා දැමු කටුනායක නිදහස් වෙළඳ කලාපයේ රොෂේන් චානක අද කම්කරුවන්ට සහ වෘත්තිය සමිති වලට අමතක වී ඇති බව නිදහස් වෙළඳ කලාපීය සහයෝගීතා සංවිධානය පවසයි.
එම සටනේදී මියගිය රොෂේන් චානක සහ ආබාධිතවුවන් වෙනුවෙන් කටුනායක වෙළඳ කලාපයේ ජුනි 01 වැනිදා පැවති හය වැනි සැමරුමට ඉතා සුළු කම්කරුවන් පිරිසක් සහභාගී වු බවයි නිදහස් වෙළඳ කලාපීය සහයෝගීතා සංවිධානයේ සම කැඳවුම්කාර බ්‍රිටෝ ප්‍රනාන්දු සිලෝන් ජර්නල්ස් හා කියා සිටියේ.
රොෂේන චානක මරා දැමීමෙන් මසකට පමණ පසු පැවති සමරුවකදී එවක විපක්ෂ නායක රනිල් වික්‍රමසිංහ එම සැමරුමට සහභාගී වෙමින් මෙම සිද්ධි සම්බන්ධව සොයා බැලිය යුතු බව සහ රොෂේන් චානක වෙනුවෙන් පිළිරුවක් සෑදිය යුත් බවට යෝජනා කලද ඔහු අගමැති වී වසර තුනක් ගතව ඇතත් ඒ කිසිවක් සිදුව නොමැති බවද සඳහන් කළේය.
වාර්තාව සඟවා රාජපක්ෂවරු රකිනවාද?
අර්ථ සාධක අරමුදල රැක ගැනිමේ සටනේදී මරා දැමු රොෂේන්ට හෝ ආබාධිත වුවන්ට මෙතෙක් සාධාරණය හා යුක්තිය ඉටු නොවු බවට පවසන බ්‍රිටෝ ප්‍රනාන්දු මෙම සිද්ධිය සම්බන්ධව සකස් කළ මහානාම තිලකරත්න කොමිසම් වාර්තාව වත්මන් ආණ්ඩුව විසින්ද සඟවන බවට චෝදනා කරයි.
රාජපක්ෂ පාලන සමයේ සිදු වු මෙම නීති විරෝධි ඝාතනය හා පහර දීම සම්බන්ධව සොයා බැලීමට එම පාලන සමයේම පිහිටු වු මහනාම තිලකරත්න කොමිසම සිය වාර්තාව නිකුත් කළ ද වත්මන් යහපාලනයද එම වාර්තාව සඟවමින් රාජපක්ෂවරුන් සහ සිද්ධියට සම්බන්ධ පුද්ගලයින් ආරක්ෂා කරන බවට නිදහස් වෙළඳ කලාපීය සහයෝගීතා සංවිධානයේ සම කැඳවුම්කාර බ්‍රිටෝ ප්‍රනාන්දු සැක පළ කරයි.
ජනාධිපතිවරයා, අගමැතිවරයා සහ හිටපු විදේශ අමාත්‍ය මංගල සමරවීර සමඟ මේ සම්බන්ධව කිහිප වතාවකදීම සාකච්ඡා කල බව කී බ්‍රිටෝ ප්‍රනාන්දු එහිදී මෙම වාර්තාව ලබා දීමට හැකි බව ප්‍රකාශ කලද මෙතෙක් එය ප්‍රසිද්ධ නොකරන්නේ ඇයි දැයි රජයෙන් ප්‍රශ්න කර සිටී.
මවකගේ අයිතිය
තම දරුවා මියගිය ආකාරය දැන ගැනීම මවකගේ අයිතියක් බවත් රොෂේන් චානකගේ මවට ඇති එම අයිතිය තහවුරු කිරීමට රාජපක්ෂ පාලනය මෙන්ම වත්මන් යහපාලන රජයද අසමත් වී ඇති බවටයි ඔහු චෝදනා කරන්නේ.
තොරුතුරු දැනගැනිමේ අයිතිය යට‍තේ මහානාම තිලකරත්තන වාර්තාව ඉල්ලමින් රොෂේන් චානකගේ මව අයදුම්පතක් ඉදිරිපත් කල විට එය ලබා දීමට හැකි බව පැවසු නමුත් පසුව එය ලබා දිය නොහැකි බවට ජනාධිපති ලේකම් කාර්යාලයෙන් දැනුම් දී තිබේ.
රාජපක්ෂ පාලන සමයේ සිදු වු මෙම නීති විරෝධී ක්‍රීයාව සම්බන්ධව තොරුතුරු සහ වරදකරුවන් සැඟවීමට යහපාලන රජයට අවශ්‍යතාවක් නැති බවට විශ්වාසය පළ කල නිදහස් වෙළඳ කලාපීය සහයෝගීතා සංවිධානයේ සම කැඳවුම්කාර බ්‍රිටෝ ප්‍රනාන්දු සිද්ධිය සම්බන්ධ මහානාම තිලකරත්න වාර්තාව ප්‍රසිද්ධ කරන තෙක් සටන් කරන බව වැඩිදුරටත් පැවසීය.
Facebook Comments
