ඊළම් කොඩි දැම්මා කියා පොලිසිය ඇල්ලූ හතරකට උසාවියෙන් ඇප

දෙමළ ඊළම් විමුක්ති කොටි සංවිධානය භාවිත කළ දෙමළ ජාතික වර්ණ ලෙස යොදාගන්නා කහ සහ රතු පාටින් යුත් කොඩි වලින් මහවිරු සුසාන භුමියක් සැරසීම වරදක් බවට චෝදනා කරමින් නොවැම්බර් 27 වැනිදා රාත්‍රියේ වාලච්චේන පොලීසිය විසින් අත්අඩංගුවට ගත් හය දෙනාගෙන් සිව් දෙනකු අධිකරණය විසින් ඇප මත නිදහස් කර තිබේ.

නිදහස ලැබු සිව් දෙනා අතර ලබන ජනවාරියේ උසස් පෙළ විභාගයට පෙනී සිටිමට නියමිත පාසල් සිසුවකුද වන බවයි පළාත් බද වාර්තාකරුවන් පවසන්නේ.

ශ්‍රී ලංකා හමුදා විසින් 2009 වසරේදී සහමුලින්ම විනාශ කරන ලද මඩකලපුව තරවෙයි මහවිරු සුසාන භුමිය සරසා තිබු රතු සහ කහ පැහැති කොඩි ගලවා ඉවත් කළ පොලීසිය නොවැම්බර් 27 දාද් තරවෙයි මහවිරු අනුස්මරණ කමිටුවේ ප්‍රධානියා ඇතුළු හය දෙනකු අත්අඩංගුවට ගත් අතර අනුස්මරණය සඳහා යොදාගත් ශබ්ද විකාශන යුගල 2ක් සහ විදුලි ජනක යන්ත්‍රයක් ද පොලිස් භාරයට ගෙන තිබුනි.

වාලච්චේන මහේස්ත්‍රාත් එම්.අයි.එම් රිස්වාන් දෙසැම්බර් 19 වැනිදා නියෝග කර ඇත්තේ නිව්ටන් ධනුජන්, සින්තතම්බි නිදර්ශන්, ෂන්මුගනාදන් නවජීවන් සහ ෆැන්සින් ඇන්ටන් නිවුටන් යන සිව් දෙනා එක් අයකුට රුපියල් ලක්ෂය බැගින් වු ශරීර ඇප දෙකක් මත නිදහස් කරන ලෙසයි.

ඇප ලබා නිදහස් වීමෙන් පසු මාධ්‍ය වෙත අදහස් දක්වමින් 18 වියැති පාසල් සිසු නිව්ටන් ධනුජන් සදහන් කළේ කිසිදු ත්‍රස්තවාදී ක්‍රියාකාරකමක නිරත නොවු නමුත් පොලීසිය විසින් තමන් ඇතුළු පිරිස අත්අඩංගුවට ගන්නා ලද බවයි.

“අපි කිසිම ත්‍රස්තවාදී ක්‍රියාකාරකමක් කරේ නෑ. මහවිරුවන් සිහිපත් කරන ගීත විතරයි අපි දැම්මේ. ඒකට මගේ තාත්තාව අත්අඩංගුවට ගත්තත් කිසිදු සාක්ෂියක් නැතිව මාවත් අත්අඩංගුවට ගත්තා. ජනවාරි 6 වැනිදා උසස් පෙළ විභාගය තියනවා කියලා කිව්වත් ඒ ගැන එයාලා ගනන් ගත්තේ නැ. මහ වැස්සේ බල්ලෝ වගේ ඇදගෙන ගියා.”

මෙලෙස අත්අඩංගුවට ගත්තේ මඩකලපුවේ පදිංචිකරුවන් වන K. කූගකුමාරරාජ් (53), K. ජනෝජන් (24), S.K. නිදර්ශන් (47), F.A. නිව්ටන් (43), N. ධනුෂන් (19) සහ S.නවජීවන් (34) බව ශ්‍රි ලංකාවේ ප්‍රජාතන්ත්‍රවාදය සඳහා වූ ජනමාධ්‍යවේදියෝ [JDS] සංවිධානය විසින් ප්‍රකාශයට පත් කර තිබුනි.

යුද්ධයේදී ඝාතනයට ලක් වු තම සමීපතමයන් අනුස්මරණය කිරීමේ ආරම්භය සනිටුහන් කරමින් 27 වැනිදා පස්වරු හයයි පහට පහන් දැල්වීම සදහා උතුරු නැගෙනහිර දෙපළාතේ ස්ථාන රැසක දෙමළ ජනයා සුදානමින් සිටියදී නැගෙනහිර පළාතේ, මඩකලපුව තරවෙයි මහවිරු සුසාන භුමියට පැමිණි වාලච්චේන පොලිස් නිලධාරීන් එම සුසානය සරසා තිබූ රතු සහ කහ පැහැති කොඩි ඉවත් කරන ආකාරය ද වීඩියෝ ගතව තිබේ.

පොලීසිය සිදු කරන බාධා කිරීම් සම්බන්ධයෙන් දෙමළ ජාතික සන්ධානයේ රාසමානික්‍යම් ශානක්‍යන් හා දෙමළ ජාතික ජනතා පෙරමුණේ සෙල්වරාජා ගජේන්ද්‍රන් පාර්ලිමේන්තු මන්ත්‍රීවරුන් පොලීසියෙන් විමසීම් කරන අවස්ථාවේ ජ්‍යෙෂ්ඨ පොලිස් අධිකාරිවරයකු කියා තිබුනේ පහන් පත්තු කිරීමට බාධාවක් නොමැති නමුත් මහවිරු සුසානය සරසා තිබෙන කොඩි තිබියදී පහන් පත්තු කිරීමට ඉඩ දිය නොහැකි බවයි.

ඊට හේතු ලෙස ඔහු පවසා තිබුනේ දෙමළ ඊලාම් විමුක්ති කොටි සංවිධානයද භාවිත කළේ එවැනි ම කොඩි බවයි.

කහ-රතු යනු දෙමළ ජාතික වර්ණ බව ගජේන්ද්‍රකුමාර් පොන්නම්බලම් මන්ත්‍රීවරයා පාර්ලිමේන්තුවේ පැහැදිලි කිරීමක් කර තිබුණි.

2024 ජනවාරි 24 වැනිදා වාලච්චේන මහේස්ත්‍රාත් අධිකරණයේ දී නඩු විභාගය යළි කැඳවීමට නියමිතය.